ԿԵԴՐՈՆԱԿԱՆՑԻՆ ԿԸ ԶԲԱՂԻ ԻՐԱՒ-ԿԵՂԾ ԳԵՂՈՒՀԻՆԵՐՈՎ

0 0
Read Time:1 Minute, 52 Second

 

            Ինչե՜ր գիտէ, ինչե՜ր կը տեսնէ Կեդրոնականցին:

            Վերմակի նմանող վերարկուներու մէջ փաթթուած եկան Էլպիսն ու Արմենակը, Կեդրոնականցին միշտ խօսակիցի, աւելի ճիշդ՝ լսողի պէտք ունի: Մենք ալ պէտք ունինք արդէն երկու տարուան մեկուսացումէ դուրս գալու եւ հայաշխարհէն տեղեակ ըլլալու:

            Մակարուհին անմիջապէս թէյ պատրաստեց, ես ալ Նոյ կոնեակի շիշը բերի:

            Օրուան հրատապ հարցն է, ի հարկէ, Ֆրանսայի նախագահական ընտրութիւնը, որ ինչպէս ամէն տեղ, հոս ալ փառասիրութիւններու թատրոն է: Չանտեսենք Հայաստանը, որ նոր նախագահ պիտի ընտրէ: Ամէն տեղ հեռատեսիլ, ձայնասփիւռ եւ թերթեր առատ նիւթ ունին:

            – Մակա՛ր, լրագրողներու եւ քաղաքական մեկնաբաններու ճարտարութիւնը զիս կը զարմացնէ, ինչպէ՞ս նոյն հարցը քանի մը հարիւր տարբեր ձեւերով կը ներկայացնեն: Լսողն ալ կը կարծէ, որ նոր բան կ’ըսուի:

          – Այդպէս պէտք է ընել, որ հեռատեսիլը լուռ չմնայ, թերթերն ալ սպիտակ էջերով լոյս չտեսնեն,- ըսի:

            Արմենակ շարունակեց.

            – Հայաստան ալ ետ չեն մնար: Իրարու նմանող քաղաքական լուրերը կը համեմուին նաեւ հայ գեղուհիներու հին եւ նոր պատկերներով, երբեմն ալ կ’ըսեն, որ հիմա… աւելի գեղեցիկ են, բայց չեն աւելցներ՝ շնորհիւ «պլատիկ»ի: Մակա՛ր, գիտես, Հայաստան ճարտարարուեստ է «պլատիկ միջամտութիւնը», եթէ օր դադրեցնեն, հազարաւորներ գործազուրկ կ’ըլլան, կը ստեղծուի ընկերային եւ տնտեսական տագնապ,- մեկնաբանեց Կեդրոնականցին:

            – Հայ նախկին գեղուհիները եւ այդ փափաքը ունեցողները, նաեւ այլ երկիրներու մէջ, ետ չեն մնար: Մայրեր կը քաջալերեն «պլաստիկ»ով գեղեցկացումը:  Մայր մը ըսաւ, որ եթէ կարելի է աւելի գեղեցիկ ըլլալ, ինչո՞ւ այդ չընել,- աւելցուցի իմ կարգիս:

            – Հայաստանեան մամուլին մէջ լոյս տեսած էին երկու  լուսանկարները նոյն «հոլիվուտեան աստղի», որ կը մերժէ «պլաստիկ միջամտութիւնը»: Մտածեցի, որ միթէ՞ հայ թերթը բարոյախօսութեան համար հրատարակած է այդ լուսանկարները, որպէսզի հայ նոր եւ հին գեղուհիներ «չպլաստիկանան» եւ «հոլիվուտեան աստղ»ի արդիականութեան հետեւին,- մեկնաբանեց Արմենակ:

            Այս ըսելէ ետք, համացանցէն արտատպած լուսանկար մը դրաւ սեղանին վրայ: Հիմա Արմենակ քիչ մը աւելի արդիականացած է եւ գունաւոր տպիչ ունի:

            Ահաւասիկ նկարը, թերթին գրածով: Կը համոզուի՞ն «պոթոքս»ի գեղուհիները:

«Հոլիվուտեան աստղեր, որոնք մերժում են պլաստիկ միջամտութիւնները…

Վերջին տարիներին աւելանում է համարձակ աստղերի թիւը, որոնք չեն թաքցնում, որ դիմում են պլաստիկ միջամտութիւնների: Ոմանք էլ համառօրէն հրաժարւում են արհեստականօրէն իրենց երիտասարդացնելու գաղափարից կամ գոնե պնդում են, որ մերժում են: Վերջիններս վստահեցնում են, որ չեն վախենում իրենց տարիքին համապատասխան արտաքին ունենալուց» (ընդգծ. Մ.):

Արգիլուած չէ լաւատես ըլլալ, եւ խեղճ երիտասարդներուն կը խնայուի «պլաստիկ» համբուրել փոխան շրթներու,- որպէս եզրակացութիւն ըսաւ գեղագէտ եւ հեշտասէր Կեդրոնականցին:

 

Մակար ի Գաղիա, 26 Յունուար 2022

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles