0
0
Կիրակի, Մարտ 5-ին, Սուրբ Լուսաւորիչ Մայր Եկեպեցւոյ մէջ, Ա.Մ.Ն. Արեւելեան Թեմի բարեջան Առաջնորդ՝ Գերշ. Տ. Անուշաւան Արքեպիսկոպոս Դանիէլեան պատարագեց եւ քարոզեց եկեղեցւոյ հոգեւոր հովիւ՝ Արժպ. Տ. Մեսրոպ Քհն. Լագիսեանի կողքին։
Յաւարտ Սուրբ Պատարագի, Առաջնորդ Սրբազան Հայրը նախագահեց Նիւ Եորքի Հայ Օգնութեան Միութեան «Մայր» մասնաճիւղի ճաշկերոյթին՝ Կանանց Միջազգային Օրուան առիթով, որ տեղի ունեցաւ «Բաշալեան» սրահին մէջ։
Բացման խօսքը կատարեցին մասնաճիւղի ատենապետուհի՝ Մարիա Ապրիմեան (հայերէն), որ նաեւ կատարեց հանդիսավարութիւնը, եւ փոխ-ատենապետուհի՝ Թալին Նիկտէլեան (անգլերէն)։ Հայկական եւ ամերիկեան քայլերգերը մեկնաբանեց Սինտի Օհանեան-Ալէճեան, որուն հետեւեցաւ Հ.Օ.Մ.-ի քայլերգը։ Անուշաւան Արք. Դանիէլեան անդրադարձաւ հայ կնոջ ու մօր կարեւորութեան, եւ այնուհետեւ Ազգային 
Առաջնորդարանի անունով հազար տոլարի վճարագիր մը յանձնեց «Մայր» մասնաճիւղին։
Յայտագիրը շարունակուեցաւ Վալանթին Պէրպէրեանի կազմակերպած բանախօսութեամբ՝ «Հայ կիները. իրաւունքներն ու դերակատարութիւնը պատմութեան ընթացքին»։ Անոր կարգ մը բաժինները ստանձնած էին չորս երիտասարդուհիներ, որոնք նախապէս վարժընթաց կատարած էին Մ.Ա.Կ.-ի մէջ Հ.Օ.Մ.-ի միջոցաւ՝ Թալին Նիկտէլեան, Նորի Պօյաճեան, Դալար Յովսէփեան եւ Արեւ Ապրիմեան։
Յայտագրի երկրորդ մասին, Սօսի Փօլատեան՝ Լիբանանցի Կիներու Ազգային Յանձնախումբի անդամ, խօսեցաւ սեռային հաւասարութեան մասին։ Ձեռնարկի ամենէն նշանակալից բաժինը 25 եւ աւելի տարիներ «Մայր» մասնաճիւղին ծառայած անդամներու մեծարանքն էր։ Մարիա Ապրիմեան եւ Հ.Օ.Մ.-ի Շրջանային Վարչութեան անդամ Մարկրէթ Պապիկեան յանձնեցին յուշանուէրներ 11 անդամ-անդամուհիներու։
Սինտի Օհանեան-Ալէճեան երկու երգ հրամցուց ներկաներուն։
Աւարտին, խօսք առաւ Արժպ. Տ. Մեսրոպ Քհն. Լագիսեան, որ Հ.Օ.Մ.-ի պատուոյ անդամ է: Ան բարձրօրէն գնահատեց «Մայր» մասնաճիւղի մնայուն աշխատանքն ու նուիրումը։ Տեղի ունեցաւ վիճակահանութիւն: Ներկաները մեկնեցան սրահէն ուրախ տրամադրութեամբ եւ ստանալով գեղեցիկ նուէրներ զոր նուիրուած էր մասնաճիւղի ընկերուհիներուն կողմէ: Ճաշկերոյթի ամբողջական հասոյթը պիտի տրամադրուի սուրիահայութեան։
