«Խորհրդարանական Համակարգը Արդէն Իրականութիւն Է» Յայտարարեց Նախագահ Սարգսեան

0 0
Read Time:2 Minute, 0 Second

sahmanatroutyoun5
Հ.Հ. նախագահ Սերժ Սարգսեան, որ քուէարկելու ժամանակ, լրագրողներուն բոլոր հարցումներուն պատասխանեց.- «Հարցումներուն պիտի պատասխանեմ հանրաքուէէն ետք», Դեկտեմբեր 7-ին ն նախագահական նստավայրին մէջ հիւրընկալուած բազմաթիւ պաշտօնական անձնաւորութիւններուն, հասարակական եւ քաղաքական գործիչներուն դիմաց խօսք առաւ, յայտնելով թէ Հայաստանի համար արդէն կարելի է իրականութիւն նկատել կառավարման խորհրդարանական համակարգը:
Ան ըսաւ թէ.- «Այսօր իսկոյն պէտք է լծուինք աշխատանքի, որպէսզի պատրաստենք նոր Ընտրական օրէնսգիրք: Այդ աշխատանքը պէտք է աւարտած ըլլայ մինչեւ 1 յունիս 2016, որպէսզի 2017-ի խորհրդարանական ընտրութիւնները տեղի ունենան աւելի բարձր վստահութեան մթնոլորտի մը մէջ, որպէսզի ընտրութիւններուն արդիւնքները կասկած չյարուցեն ինչպէս կուսակցութիւններուն, այնպէս ալ մեր քաղաքացիներուն մօտ: Այսօր մեզի անհրաժեշտ է վստահութիւն ոչ միայն քաղաքական ուժերուն միջեւ, այլեւ հանրութեան մեծ վստահութիւն քաղաքական ուժերուն հանդէպ: Միայն այդ ձեւով քաղաքական ուժերը կրնան կայանալ` իբրեւ փոփոխութիւն իրականացնելու գործին մէջ հանրութեան լիազօր ներկայացուցիչներ: Ազգային ժողովը պէտք է դառնայ գաղափարական բանավէճերու, երկրին համար կարեւորագոյն լուծումներ գտնելու թիւ մէկ հարթակը:…Այս փոփոխութիւնը կը նշանակէ ուժեղ իշխանութեան եւ ուժեղ ընդդիմութեան առկայութիւն, քաղաքական կուսակցութիւններու դերի բարձրացում, անոնց զարգացման նոր կարելիութիւններու ընձեռում: Ատիկա կը նշանակէ նաեւ զարգացած կուսակցական համակարգ, որ որեւէ ժողովրդավարական պետութեան կարեւորագոյն նախապայմաններէն մէկն է: Անցումը խորհրդարանական համակարգին ժողովուրդին համար կ՛ապահովէ օրէնսդիր եւ գործադիր իշխանութիւններու գործունէութեան աւելի մեծ թափանցիկութիւն: Այսուհետեւ կը յստականայ գործադիր իշխանութեան պատասխանատուութիւնը եւ կը բարձրանայ անոր հաշուետուողականութիւնը, իսկ անոր գործունէութիւնը խորհրդարանին եւ ժողովուրդին համար կը դառնայ աւելի կանխատեսելի:
Վստահ եմ, որ համագործակցութեան այս շրջանակը պիտի շարունակուի ընդլայնիլ` յանուն մեր ազգային պետութեան, յանուն Հայաստանի Հանրապետութեան: «Ո՛չ»-ի կողմնակիցներէն շատերը իրենք իրենց մասին իբրեւ «ճակատ» կը խօսէին: Ես փորձած եմ այս բառէն կարելի եղածին չափ խուսափիլ: Իմ խորին համոզումով, երկրին մէջ մենք ճակատ ունենալու իրաւունքը չունինք: Հայ ժողովուրդի պատմութիւնը ունեցած ազգի մը համար ատիկա անթոյլատրելի շռայլութիւն է: Աւելի՛ն, այս փոփոխութիւններուն հիմնական նպատակներէն մէկը այն էր, որ երկրին մէջ ճակատ-ճակատի դուրս գալու եւ կռիւ տալու կարիքը չըլլայ: Այսօր մենք կրնանք արձանագրել, որ կառավարման խորհրդարանական համակարգը մեր պետութեան համար արդէն իրականութիւն է»:
Նախագահ Սերժ Սարգսեան դրական նկատեց, որ քարոզարշաւին ընթացքին իր ղեկավարած կուսակցութենէն բացի «Այո՛»-ի քարոզչութիւն կը կատարէին Հայ Յեղափոխական Դաշնակցութիւնն ու Բարգաւաճ Հայաստանը, ինչպէս նաեւ կարգ մը այլ կուսակցութիւններ, սակայն նաեւ նշած է` այդ «Այո՛»-ն չի նշանակեր, որ իրենց մէջ տարակարծութիւններ, բանավէճեր եւ սուր քննարկումներ չեն եղած», աւելցուց ան:
Ըստ նախագահին, այս փոփոխութիւնները նաեւ կարելիութիւն կու տան աւելի վստահ ըլլալու պետութեան անվտանգութեան ապահովման հարցին մէջ, զինուած ուժերու ղեկավարումը եւ գործնական կառավարումը ապահովող սահմանադրական լուծումները առիթ կու տան արագ եւ արդիւնաւէտ որոշումներ տալու` թէ՛ սովորական դարձած, եւ թէ՛ ճգնաժամային իրավիճակներու մէջ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles