0
0
Թուրքիոյ Եւրոպական Միութեան հարցերով զբաղուող պետական նախարար Էկէմեն Պաղըշ, քանի մը շաբաթ առաջ մեծ փոթորիկ ստեղծած էր, Ժընեւի (Զուիցերիա) մէջ, ամէնայն խանդավառութեամբ, Հայոց Ցեղասպանութեան ուրացման մասին արտայայտութիւն մը կատարելով:
Այսօր, Պաղըշի Հայոց Ցեղասպանութիւնը ժխտող հաստատումը կարելի է կրկնել, աշխարհագրական փոքր փոփոխութիւն մը կատարելով.- “Մենք այժմ Ֆրանսայի մէջ ենք, եւ ես կը յայտարարեմ, որ 1915-ի դէպքերը ցեղասպանութիւն չեն: Թող գան ու ձերբակալեն զիս“:
Պաղըշ իր այդ յանդուգն եւ “սրտբաց“ յայտարարութիւններուն մէջ, կատարած էր այն հաստատումը թէ իւրաքանչիւր ժողովուրդի պատմութեան մէջ մութ պահեր կան:
Անոր խօսքերէն ներշնչուելով, ահաւասիկ մութ պահ մը մարդկային իրաւունքներու համար սատար հանդիսացող, ազատութեան, հաւասարութեան եւ եղբայրութեան համար պայքարող…լոյսերու քաղաքէն` Փարիզէն:
Այսպէս, Ֆրանսայի Սահմանադրական խորհուրդը Հայոց Ցեղասպանութեան ժխտումը քրէականացնող օրինագիծը Ֆրանսայի սահմանադրութեան հակասող նկատեց, յատկապէս շեշտելով թէ ժխտումի համար տուգանք եւ քրէական պատասխանատուութիւն սահմանելով, օրէնսդիրները հակասահմանադրական ոտնձգութիւն կատարած են խօսքի եւ արտայայտման ազատութեան նկատմամբ:
…Տարօրինակ տրամաբանութիւն, որ յար եւ նման է վերացական գրականութեան եւ թատերգութիւններուն: Նոյնիսկ պատահած իրադարձութիւններուն ետին գտնուող իրավիճակն ու “թայմինկ“ը, կը փաստեն թէ մութ են մո՜ւթ…լոյսերու քաղաքէն ներս տեղի ունեցած հաշիւները:
Այսուամէնայնիւ, հոս խոշորացոյցով պէտք է հաստատել թէ գաղտնի քուէարկութեամբ կատարուած այս որոշումը, որեւէ վճիռ չէ արձակած Յունուար 29, 2001-ին որդեգրուած Հայոց Ցեղասպանութեան ճանաչման օրէնքին վերաբերեալ:
Այսպէս…հայու ճակատագիր… “Զարթի՛ր Լաօ“ն որ Ֆրանսահայը, ամէնայն խանդավառութեամբ եւ յուզմունքով երգած էր, այսօր պիտի շարունակուի շատ աւելի բարձր ձայնով, գէթ սկիզբէն` զերոյէն, ամէնայն ինքնավստահութեամբ, հաւատքով եւ համբերութեամբ:
ՀԱՅՐԵՆԻՔ
