0
0
Շռնդալից ու կայծակնային արագութեամբ փոխուած է եւ դեռ ալ պիտի փոխուի կեանքի ապրելաձեւը: Այնքան մը, որ արդի արհեստագիտական բնագաւառէն ներս տարրական փոփոխութիւններ կը կրեն …գրեթէ ամէն ինչ:
Կրկնութիւն պիտի ըլլայ, այս գծով անդրադառնալ քարոզչական զօրաւորագոյն մեքենայ` մամլոյ եղափոխութեան մասին մանրամասնoրէն զեկուցել:
Այսպէս, “Դրօշակ“ն ալ կը շարունակէ ծածանիլ, քայլ պահելով արդի պայմաններուն հետ…կայքէջէն մինչեւ համացանց, միշտ ալ պահելով իր հարազատ ու վաւերական տպարան յանձնուած “շօշափելի“ օրինակը: Ինչ որ ալ ըլլան պայմանները, Հ. Յ. Դաշնակցութեան կեդրոնական պաշտօնաթերթը, պահած է այդ գիծը, որ կը հանդիսանայ նոյնինքն Հ. Յ. Դաշնակցութեան հայեացքներուն եւ գաղափարախօսութեան թարգմանը:
Իր խմբագրականներուն, առաջնորդող յօդուածներուն միջոցաւ, “Դրօշակ“ը հայ ազգային-պետական, քաղաքական-տնտեսական եւ ընկերային-մշակութային բովանդակ շահերու պաշտպանութեան դիրքերէն եւ արժէքներու համակարգէն մեկնելով, կը մեկնաբանէ համաշխարհային ու շրջանային անցուդարձերը, հայութեան եւ Հայ Դատին վերաբերող խնդիրները, Հայաստանի ու Արցախի Ղարաբաղի Հանրապետութիւններուն, Ջաւախքի եւ Արեւմտահայաստանի առնչուող հիմնահարցերը:
Կրկնելով այդ կոչերն ու արձագանգները, Հ. Յ. Դ. պաշտօնաթերթը կ՛արծարծէ այս բոլորը` մնայուն կերպով ուղենիշ ունենալով ժամանակի ոգին եւ յառաջխաղացքը, յստակ բաղդատական մը կատարելով, որոնց կարգին միջազգային արժէքները` աշխարհաքաղաքացիական ըմբռնումներէն, համամարդկային նուաճումները` համաշխարհայնացում կոչեցեալ ախտին, ստեղծած թնճուկներէն:
Պարզ ու մէկին, “Դրօշակ“ը, զանազան շահերու, պաշտպանութեան դիրքերէն մեկնելով, կը քննարկէ Հայաստանի ու հայութեան կեանքի նաեւ յոռի եւ բացասական երեսները` ապազգային քաղաքական ընթացքները, արտատնտեսական եւ ստուերային աղէտաբեր կացութաձեւերը, փտածութիւնը եւ “կէնկ“երու սանձարձակութիւնները, ճեղքուած եւ բեւեռացած հասարակութեան ընկերային յարաբերութիւնները, անյարիր եւ սադրիչ մշակութային երեւոյթները:
Որքա՜ն յուզիչ ու տպաւորիչ է թղթատել “Դրօշակ“ի անդրանիկ թիւը, ուր լոյս ընծայուած է Հայ Յեղափոխականների Դաշնակցութեան Մանիֆեստը…նաեւ ներածականը, որուն մէջ, պարզաբանուած են Հ.Յ.Դաշնակցութեան հետապնդած նպատակները եւ անշուշտ նոյնինքն “Դրօշակ“ի կատարելիք դերը:
Դեր մը…120-ամեայ ծածանում մը, որ ցայսօր կը շարունակուի:
“Հայրենիք“
