Խաչքարերը, Յուշարձանները Կը Տարհանուին Բերձորէն, Աղաւնոյէն եւ Սուսէն

0 0
Read Time:2 Minute, 25 Second

Արցախի Հանրապետութեան կառավարութիւնը Բերձորէն, Աղաւնոյէն եւ Սուսէն կը տարհանէ հայկական յուշարձանները, որովհետեւ աչքի առաջ ունի Ատրպէյճանի վարած քաղաքականութիւնը` հայկական յուշարձանները ոչնչացնելու բազում օրինակներ կան: Եւ այդ հանգամանքէն մեկնելով` որոշած են այս անգամ զանոնք չձգել թշնամիին հսկողութեան տակ անցնող բնակավայրերուն մէջ:

Լրագրողներու հետ զրոյցի ընթացքին Արցախի Հանրապետութեան կրթութեան, գիտութեան, մշակոյթի եւ մարմնակրթութեան փոխնախարար Լեռնիկ Յովհաննիսեան ըսաւ, որ քաղաքացիական պաշտպանութեան ծրագրին համաձայն, երբ սկսաւ բնակչութեան տարհանումը, պէտք է տարհանէին յուշակոթողները եւ միայն կոթողական արուեստի յուշարձանները, խաչքարերը եւ այլն:

«Մենք այդ աշխատանքները սկսանք տարհանել, ո՛չ միայն յուշարձանները, այլեւ` գրադարանի գիրքային ֆոնտը: Բերձորի քաղաքային գրադարանէն 10 հազարէ աւելի գիրք ամբողջութեամբ տեղափոխուած է Ստեփանակերտ: Կը տեղափոխենք Բերձորի, Աղաւնոյի եւ Սուսի կոթողական յուշարձանները, զանոնք կը հաւաքենք Ստեփանակերտի մէջ մէկ տեղ: Կան տարբեր առաջարկներ այդ յուշարձաններուն հետագայ ճակատագրին գծով: Օրինակ` Հայ առաքելական եկեղեցւոյ Արցախի թեմի հետ համաձայնութիւն ունինք, որ Ստեփանակերտի Աստուածամօր Սուրբ Յովհաննու եկեղեցւոյ մօտ ստեղծուի համապատասխան պուրակ եւ այնտեղ տեղադրուին յուշակոթողներէն քանի մը հատը: Ստեփանակերտի Սուրբ Յակոբ եկեղեցւոյ մօտակայքը եւս կը տեղադրուին որոշ յուշակոթողներ, խաչքարեր:

Կան նաեւ մասնաւոր առաջարկներ, օրինակ` Շուշիի յուշարձանախումբի հեղինակէն, որ նմանատիպ յուշարձանախումբի պուրակ կրնայ ստեղծուիլ նաեւ Ստեփանակերտի, Մարտակերտի կամ այլ վայրի մէջ: Այսինքն մենք այս ամէնը կը տեղափոխենք եւ արդէն կը սկսինք այս կամ այն վայրին մէջ զանոնք տեղադրել ու պահպանել:

Ունինք 12-13-րդ դարերու խաչքար, որ բնականաբար իր տեղը կը գտնէ պատմական երկրագիտական թանգարանի մէջ», նշեց Լեռնիկ Յովհաննիսեան:

Ըստ անոր, այս պահուն ալ յուշարձանները տարհանման փուլի մէջ են, աւարտած է Ներքին Սուսի, Աղաւնոյի կոթողական յուշարձաններու տեղափոխութիւնը: Արդէն աւարտին կը մօտենայ Բերձորի ճանապարհի եզրերուն գտնուող յուշարձաններու տարհանումը:

«Յաջորդը պիտի զբաղինք Բերձորի կեդրոնական մասին մէջ գտնուող յուշահամալիրի խաչքարերու տեղափոխութեան հարցով, կան որոշակի թեքնիք հարցեր: Այդուհանդերձ, մեզի տրուած ժամկէտին մէջ դուրս կը հանենք բոլոր յուշարձանները:

Տարհանուող խաչքարերուն, յուշարձաններուն եւ կիսանդրիներուն մօտաւոր թիւը ներկայ պահուն 47 է: Սակայն կը պատահին դէպքեր, երբ տեղական իշխանութիւնը դիմում կը ներկայացնէ, թէ այսինչ վայրին մէջ ալ խաչքարեր կան, մենք անոնց անմիջապէս կ՛արձագանգենք: Կան մարդիկ, որոնք կը դիմեն, որպէսզի տարհանենք նաեւ իրենց բակերուն մէջ գտնուող որոշ յուշակոթողներ: Այսինքն երբ այդ ամէնը տեղափոխենք, արդէն յստակ թիւ կ՛ունենանք», աւելցուց Յովհաննիսեան:

Լեռնիկ Յովհաննիսեանի խօսքով, առհասարակ բոլորին յայտնի է Ատրպէյճանի վարած քաղաքականութիւնը հայկական մշակոյթի նկատմամբ, այդ քաղաքականութիւնը Ատրպէյճանը նոյնիսկ չի թաքցներ եւ կ՛իրականացնէ պետական մակարդակով:

«Յատկապէս 90-ականներէն ետք տեղադրուած յուշակոթողները, յուշարձանները անմիջապէս կ՛ոչնչացնեն, վկան Ջրականի եկեղեցին է եւ բազմաթիւ այլ եկեղեցիներ ու յուշակոթողներ, որոնք մնացած են բռնագրաւուած տարածքներուն մէջ: Բնականաբար, այդ ամէնը տեսնելով, մենք քաղաքացիական պաշտպանութեան ծրագրին համաձայն, ամէն ինչ կը տարհանենք, որպէսզի նոյն ճակատագրին չարժանանան», շեշտեց ան:

Տակաւին այս տարուան մայիսին Արցախի Հանրապետութեան նախագահը հրամանագիր ստորագրած է` բռնագրաւուած տարածքներուն մէջ յուշարձաններու պահպանութեան պետական խորհուրդ ստեղծելու մասին, եւ ըստ Լեռնիկ Յովհաննիսեանի, այդ խորհուրդը կը ննարկէ տարհանուած յուշարձաններու վերաբերող բոլոր հարցերը, եւ կը կայացուին համապատասխան որոշումներ:

«Կան խաչքարեր, որոնք նուիրուած են այն ազատամարտիկներուն, որոնք զոհուած են այդ շրջանները ազատագրելու ժամանակ: Բնականաբար այդ ազատամարտիկներուն երեխաները, հարազատները կը դիմեն այսպիսի խնդրանքով, որպէսզի այդ խաչքարերը տեղափոխեն այս կամ այն վայր, ուր իրենք կ՛ապրին: Կը կարծեմ` բոլոր լուծումները կը գտնենք», եզրափակեց Լեռնիկ Յովհաննիսեան:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles