0
0
ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ Միացեալ Նահանգներու Քոնկրէսէն ներս, կայանալիք ու Արցախեան շարժումի 25ամեակին նուիրուած տօնակատարութեան, իր մասնակցութիւնը պիտի բերէ Արցախի Հանրապետութեան երիտասարդական ու մշակութային հարցերու նարարար նախարար Նարինէ Աղապալեան:
“Այս առիթը կ՛ուզենք օգտագործել դարձեալ շնորհակալութիւն յայտնելու համար Քոնկրէսին մէջ Հայկական համախմբումին, որ ջանք չի խնայեր քոնկրէսականները տեղեկացնելու Արցախի մէջ ժողովրդավարական կարգեր ամրապնդելու եւ խաղաղութիւն հաստատելու նպատակով տարուող աշխատանքներուն մասին: Քոնկրէսին մէջ կայանալիք տօնակատարութիւնը լաւ առիթ մը պիտի ըլլայ ոչ միայն Արցախեան շարժումին 25ամեակը եւ այդ թուականէն ետք արձանագրուած ժողովրդավարական, մշակութային ու տնտեսական զարգացումները տօնելու, այլ ցոյց տալու, թէ հանրապետութիւնը նաեւ ունի ղեկավարութեան նոր սերունդ մը, որ աշխատանք կը տանի աւելի փայլուն ապագայ մը կերտելու տեսլականով“, յայտնեց Ամերիկայի Հայ Դատի յանձնախումբի գործադիր վարիչ Արամ Համբարեանը:
Նախարար Նարինէ Աղապալեան, որ առանցքային դեր ունեցած է Շուշիի` որպէս մշակութային կեդրոնի վերականգման գործով, Մարտ 13-ին պիտի ժամանէ Միացեալ Նահանգներ եւ մասնակցի Քոնկրէսին մէջ, կայանալիք ուսուցողական ծրագրին եւ օրէնսդիրներու, քաղաքացիական առաջնորդներու եւ համայնքային կազմակերպիչներու հետ, միասին տօնելու Արցախի ազգային ազատագրական շարժման 25-ամեակը:
Նախարար Նարինէ Աղապալեան մասնագիտութեամբ լրագրող է եւ կը հանդիսանայ Արցախի ղեկավարներու նոր սերունդի ներկայացուցիչներէն մէկը:
