ԼՈՒՔԱՇԵՆՔՈՅԻ ԲՌՆԱՏԻՐԱԿԱՆ ՎԱՐՉԱԿԱՐԳԸ ԿԸ ՍԱՍՏԿԱՑՆԷ ՀԱԼԱԾԱՆՔԸ ԸՆԿԵՐՎԱՐ-ԺՈՂՈՎՐԴԱՎԱՐԱԿԱՆՆԵՐՈՒՆ ԴԷՄ

0 0
Read Time:4 Minute, 55 Second


ԺԱԳ ՅԱԿՈԲԵԱՆ

«Հայրենիք»

 

Օգոստոս 2020 թուականին Պելոռուսիոյ մէջ տեղի ունեցան նախագահական ընտրութիւններ, որոնք յատկանշուեցան զանգուածային կեղծարարութեամբ եւ ոչ թափանցիկ հոլովոյթով: Ընտրութիւններուն յաղթանակ արձանագրեց գործող նախագահ Ալեքսանտր Լուքաշենքոն, որ երկրին մէջ երկար տարիներէ ի վեր յայտնի է իր բռնատիրական գործելակերպով եւ բազմաթիւ վերլուծաբաններու կողմէ կը նկատուի իբրեւ ստալինականութեան ուղիի շարունակող:
Ընտրակեղծիքներով յատկանշուած նախագահական վերոնշեալ ընտրութիւններէն ետք երկրին մէջ ծայր տուին ժողովրդավարութեան կողմնակիցներու զանգուածային ցոյցեր: Իշխանութիւնները իրենց բոլոր ապահովական կառոյցները ծառայեցուցին բրտօրէն ճնշելու ժողովրդավարութեան կողմնակիցներու ցոյցերը, խեղդելու որեւէ ընդդիմադիր խօսք: Ժողովրդավարութեան հաստատման համար ընդդիմադիրներու կազմակերպած խաղաղ ցոյցերու գագաթնակէտին նախագահ Ալեքսանտր Լուքաշենքոն հրապարակայնօրէն երեւցաւ ձեռքը գնդացիրով՝ իբրեւ սպառնալիք ցուցարարներուն եւ իբրեւ պատգամ առ որ անկ է, որ ոչ ոք կրնայ տապալել իր բռնատիրական վարչակարգը, եւ այդպիսի փորձի ճակատագիրը կրնայ ըլլալ միայն ու միայն արեան մէջ խեղդուիլը: Անկէ ետք պիելոռուս պարզ քաղաքացիները սկսան դատուիլ կամ հալածուիլ ցոյց կատարելու, ընկերային ցանցերու վրայ իրարու հետ հաղորդակցելու եւ այդ միջոցով իրենց բողոքը արտայայտելու, կամ ալ բողոքի այդ նշանաւոր զանգուածային ցոյցերը խորհրդանշող գոյներով շապիկներ հագնելու յանցանքներով: Մինչ այդ, անոնք, որոնք ուղակիօրէն պատասխանատու էին բրտութիւններուն եւ ցոյցերը վայրագօրէն ճնշելուն, խոյս տուին արդարութենէն, անոնք հաշուետուութեան չկանչուեցան խաղաղ ցուցարարները սպաննելնուն համար՝ ցոյց տալով, թէ ինչպիսի՛ աստիճանի ստորադասուած է օրէնքի իշխանութիւնը Պելոռուսիոյ մէջ:
Բիրտ հալածանքի եւ վայրագութեան թիրախ դարձաւ մանաւանդ Պելոռուսիոյ ընկերվար-ժողովրդավարական կուսակցութիւնը՝ «Նարոտնայա Հրամատա»-ն (Ժողովուրդի համախմբումը), որ Ընկերվար միջազգայնականի անդամ կուսակցութիւն մըն է: Այս կուսակցութիւնը սկիզբէն ալ իր վրայ կրեց բռնատիրական իշխանութիւններու ճնշումներուն ամբողջ զրկանքները: Կուսակցութեան ղեկավարութեան անդամներուն երեք քառորդը կը գտնուի վտարանդի վիճակի մէջ՝ երկրէն աքսորուած անորոշ ժամանակով: Երկրին մէջ մնացած ղեկավարութիւնը, ներառեալ կուսակցութեան նախագահ Միքալայ Սթաթքեւիչը եւ ընդհանուր քարտուղար Սիարհէյ Սփարիչը ենթակայ դարձան կեղծ յանցակազմով բեմադրուած ոչ հրապարակային դատավարութեան: Այս կուսակցութեան պարզ անդամները եւս, ինչպէս նաեւ այլ ուժերու պատկանող քաղաքական գործիչներ ձերբակալուեցան եւ բանադրուեցան իրենց քաղաքական աշխարհահայեացքին եւ համոզումներուն համար՝ ենթարկուելով անմարդկային վերաբերմունքի եւ մարդկային իրաւանց ամէնօրեայ խախտման:
Բարացուցական է մասնաւորաբար «Նարոտնայա Հրամատա»-ի նախագահ Միքալայ Սթաթքեւիչի կրած հալածանքը Լուքաշենքոյի վարչակարգին կողմէ: Ան մանաւանդ յատկանշուած եղած է իշխանութիւններուն նկատմամբ իր արմատական ընդդիմութեամբ՝ երկար տարիներէ ի վեր: Իբրեւ նախագահական ընտրութիւններու թեկնածու ան առաջին անգամ ձերբակալուած եւ հինգ տարուան բանտարկութեան դատապարտուած է 2010 թուականին: Իսկ նախագահական վերջին ընտրութիւններէն դեռ ամիսներ առաջ՝ Մայիս 2020-ին, ան դարձեալ ձերբակալուեցաւ եւ բաւական ծանր պայմաններու մէջ բանտարկուած կը մնայ մինչեւ հիմա: Անոր դէմ ուղղուած է կեղծ ամբաստանութիւն՝ զանգուածային անհնազանդութիւն կազմակերպելու, Կեդրոնական ընտրական յանձնախումբի աշխատանքը խոչընդոտելու եւ ատելութիւն հրահրելու յանցանքներով՝ առանց անմեղութեան կանխավարկածը յարգելու:
Մօտ մէկ տարի առանց դատավարութեան մնալէ ետք Սթաթքեւիչի բեմականացուած դատավարութիւնը կեղծ ամբաստանութիւններով սկսաւ 24 յունիս 2021-ին: Այդ ամբողջ ժամանակաշրջանին ընթացքին անոր զլացուեցաւ որեւէ կապ հաստատել իր ընտանիքի անդամներուն հետ, իսկ իր սեփական փաստաբանին հետ իր հանդիպումները բաւական սահմանափակ էին…
Ընկերվար Միջազգայնականը Միքալայ Սթաթքեւիչի անարդար ձերբակալութեան առաջին օրէն յատուկ ուշադրութիւն կեդրոնացուցած էր անոր ճակատագիրին վրայ, մանաւանդ որ Սթաթքեւիչ Ընկերվար միջազգայնականի կազմակերպութեան բաւական աշխուժ անդամներէն մէկն է եւ համանախագահն է կազմակերպութեան ԱՊՀ-ի երկիրներու, Կովկասի եւ Սեւծովեան շրջանի յանձնախումբին: Ան այդ յանձնախումբին համանախագահը եղած ամբողջ ժամանակաշրջանին ճիգ չխնայեց, ի գին իր ազատութեան, ժողովրդավարութիւն տարածելու եւ փոփոխութիւն կատարելու Պելոռուսիոյ մէջ: Եւ հալածանքներու եւ զանգուածային ձերբակալութեանց առաջին իսկ օրերէն Ընկերվար միջազգայնականը պահանջեց Միքալայ Սթաթքեւիչի եւ միւս քաղաքական բանտարկեալներուն անմիջական ազատ արձակումը: Անոնց թիւը մօտ հինգ հարիւր է, անոնք ամէնօրեայ տանջանքի եւ չարչարանքի կ՛ենթարկուին բանտերուն մէջ, ոմանք ալ այդ չարչարանքներուն չդիմանալով կը մահանան:
Դեկտեմբեր 14 2021-ին Միքալայ Սթաթքեւիչ փակ դռներու ետին, բեմականացած դատավարութեան մը վերջին նիստին ընթացքին, 565 օր անարդարացի բանտարկուած մնալէ ետք, դատապարտուեցաւ 14 տարուան բանտարկութեան՝ մարդկային իրաւանց ամէնէն կոպիտ խախտումով: Ընկերվար միջազգայնականը խստիւ դատապարտեց իր անդամ կուսակցութեան նախագահին ստացած այս անարդար վճիռը եւ դատավարութիւնը նկատեց «ամօթալի»: Ընկերվար միջազգայնականը նաեւ բողոքի ձայն բարձրացուց քաղաքական այս հալածանքին եւ բռնաճնշումին դէմ՝ կոչ ուղղելով միջազգային ընկերութեան, որ վերջինս նոյնպէս դատապարտէ այս դատավարութիւնը: «Լուքաշենքոն պէտք է հաշուեքննութեան կանչուի, եւ Ընկերվար միջազգայնականը կը վերահաստատէ իր նախկին կոչը քայլերու դիմելու՝ զօրակցելու համար անոնց, որոնք իրենց ազատութիւնը զոհեցին Պելոռուսիոյ մէջ ժողովրդավարութեան հաստատման դատին համար», կը նշուի Ընկերվար միջազգայնականի դատապարտանքի հաղորդագրութեան մէջ:
Դատապարտանքի այս հաղորդագրութեան գծով Ընկերվար միջազգայնականի մէջ ՀՅԴ-ի ներկայացուցիչ, Ընկերվար միջազգայնականի փոխնախագահ Մարիօ Նալպանտեան դեկտեմբեր 2021-ին «Երկիր» կայքին հետ ունեցած զրոյցի մը ընթացքին նշեց, որ Միքալայ Սթաթքեւիչի հետ տեղի ունեցաւ ստալինեան մոտելով դատավարութիւն, ինչ որ դատապարտելի է ամէն ձեւերով՝ ո՛չ միայն իբրեւ իրաւական մեծ յանցագործութիւն, այլ նաեւ տարրական մարդկային իրաւունքներու, քաղաքացիական իրաւունքներու խախտման տեսանկիւնէն: «Պելոռուսիան այսօր Եւրասիական տնտեսական միութեան մէջ կը գտնուի իբրեւ գործընկեր ե՛ւ Հայաստանի, ե՛ւ Ռուսիոյ, ե՛ւ ուրիշ երկիրներու հետ: Անիկա պէտք է ստանայ դատապարտում իր գործընկերներուն կողմէ», ըսաւ Մարիօ Նալպանտեան՝ վստահեցնելով, որ Ընկերվար միջազգայնականը՝ իրեն անդամ բոլոր կուսակցութիւններով, բոլորովին դէմ է այս վճիռին, աւելի քան 150 անդամ կուսակցութիւններ միացած են միջազգայնական կազմակերպութեան դատապարտման կոչին:
«Լուքաշենքոն պէտք է դադրեցնէ հալածանքը, ընդդիմադիրները հետապնդելու իր ծրագիրը եւ հիմնականին մէջ պէտք է դատապարտուի իր գործընկերներուն կողմէ, որոնք այսօր Պելոռուսիոյ հետ կը համագործակցին, ըլլան անոնք Եւրասիական տնտեսական միութեան թէ այլ համաձայնութիւններու անդամ: Լուքաշենքոյի մասին խօսիլը աւելորդ է, ան օրըստօրէ կը հաստատէ բռնատիրական կարգերը, ժողովուրդին վրայ ճնշում կը բանեցնէ եւ վատ օրինակ է ամբողջ շրջանին համար», ընդգծեց Մարիօ Նալպանտեանը: Ան աւելցուց, որ Ընկերվար միջազգայնականը եւ ՀՅԴ-ն կը դատապարտեն այս հոլովոյթը եւ մտահոգ են, որ շրջանը սկսած է ետքայլ արձանագրել ժողովրդավարութեան եւ մարդկային իրաւանց առումով, շրջանին մէջ սկսած են դրսեւորուիլ հարցեր, որոնք լրջօրէն պէտք է միջազգային հանրութեան ուշադրութիւնը գրաւեն:
«Միքալայ Սթաթքեւիչը Հայաստան այցելած է Ընկերվար միջազգայնականի շրջանային ժողովին մասնակցելու, ներկայ եղած է, յետոյ քանի մը օր մնացած է Հայաստանի մէջ, առիթ ունեցած ենք անոր հետ շրջելու Հայաստանի մէջ, ան իր զօրակցութիւնը յայտնած է, եւ իր կուսակցութիւնը, որ փոքր է, բայց յստակ, ուժեղ քաղաքական ծրագիրներով, ժողովուրդի արդարութիւն փնտռող կուսակցութիւն, պէտք է անպայման վերականգնէ իր գործունէութիւնը», ընդգծեց Մարիօ Նալպանտեան:
Մինսքի բռնատէրը՝ Ալեքսանտր Լուքաշենքոն Փետրուար 7 2022-ին ռուս նշանաւոր լրագրող Վլատիմիր Սոլովիովի հետ ունեցած հարցազրոյցի ընթացքին հաւանական Միութենական պետութեան ստեղծման մասին հարցումի մը պատասխանելով վարկաբեկիչ արտայայտութիւններ ունեցած էր հայութեան, Հայաստանի հասցէին: Ըսած էր՝ «Հայաստանը փախչելու տեղ չունի…Ի՞նչ է, կը կարծէք, թէ անոնք ոեւէ մէկուն պէ՞տք են…»: Մեկնելով յօդուածին ամբողջ շարադրանքէն, ի՞նչ կը կարծէք, Պելոռուսիան եւ իր բռնատէր նախագահը ոեւէ մէկուն պէ՞տք են մանաւանդ ազատ աշխարհին մէջ: Արաբական նշանաւոր առածը կ՛ըսէ. «Ան որ իր տունը ապակիէ է, ուրիշին վրայ քար չի նետեր»:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
100 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles