ԼՈՒՐԵՐ ՆԻՒ ԵՈՐՔԷՆ.- ՏԱՂԱՆԴԱՒՈՐ ՀԱՅ ՆՈՐ ԱՍՏՂԵՐ ՔԱՐՆԸԿԻ ՀԱՄԵՐԳԱՍՐԱՀԻ ԲԵՄԱՀԱՐԹԱԿԻՆ ՎՐԱՅ

0 0
Read Time:1 Minute, 53 Second

p6-7 hagop varivarian

ՅԱԿՈԲ ՎԱՐԴԻՎԱՌԵԱՆ

Յաջորդական վեցերորդ տարին ըլլալով «Ուղղակի Օգնութիւն Հայ Ժողովուրդի» նիւ եորքեան կազմակերպութիւնը կը նախաձեռնէ մասնաւոր համերգ տաղանդաւոր հայ նորահաս աստղերուն համար, նուիրուած բոլոր անոնց, որոնք հասած են մրցոյթին աւարտական փուլը։ Դատական մարմինը կը բաղկանայ ծանօթ երաժիշտներէ` Մեթրոփոլիթըն Օփերայի տիվա` Լուսին Ամարայէ եւ համաշխարհային վարկ վայելող դաշնակահար Շահան Արծրունիէ, ինչպէս նաեւ` մաէսթրօ Խորէն Մէյխանէճեանէ, պարիթոն Վաղարշակ Օհանեանէ, դաշնակահարուհիներ Լուսին Պատալեանէ ու Կարինէ Պօղոսեանէ, երգահան ու դաշնակահար Կարէն Յակոբեանէ եւ ջութակահար Տայանա Վասիլեանէ։

Անցեալ տարիներուն նման այս տարուան եզրափակիչ համերգը եւս տեղի ունեցաւ Նիւ Եորքի Քարնըկի Հոլի Ուայլ համերգասրահին մէջ, Հոկտեմբեր 11ին, Շաբաթ օր կէսօրուան ժամը 1.00ին, ներկայութեամբ Մ.Ա.Կ.ի մօտ Հ.Հ. մշտական ներկայացուցչութեան հաւատարմատար դեսպան Զօհրապ Մնացականեանի, ծանօթ բարերարներու, արուեստասէր հասարակութեան եւ յայտագրին մէջ բաժին վերցնող պատանիներու ծնողներուն։

Այս տարուան համերգը նուիրուած էր Ցեղասպանութեան դարադարձին եւ այս առթիւ ալ,  արհաւիրքի զոհ մեծ երաժիշտին` Կոմիտաս Վարդապետին գործերը լայնօրէն ներկայացուեցան ու արձագանգուեցան այդ օր։  Սերունդներ ամբողջ հասակ առին հայ երաժշտութեան մեծագոյն դէմքին` անմահն Կոմիտասի ստեղծագործութիւններով ու այսօր ալ բարեբախտաբար աշխարհի ամէն կողմ ու Յաւերժական Հայաստանի մէջ կը լսուին Կոմիտասի ազգային արժէք ներկայացնող երաժշտութիւնն ու երգերը։

Քսանէ աւելի պատանիներ 13էն 18 տարեկան հասակի մէջ ներկայացան առանձինն կամ խմբային յայտագրով։ Բացի Կոմիտասէ հնչեցին Արամ Խաչատուրեանի, Համբարձում Պէրպէրեանի, Այվազեանի, Սպենդիարեանի, Ջրբաշեանի կամ ժողովրդական գործերը, եւ միջազգային երաժիշտներէն` Օֆֆէնպախի, Մոցարթի, Շոփէնի եւ Ալպանեզի ծանօթ ստեղծագործութիւններէն գեղեցիկ փունջ մը։

Կþարժէ անպայմանօրէն յիշատակել Յարութիւն Տիրացուեանի դաշնակի ելոյթը Խաչատուրեանի «Սփարթաքիւս»ի «ատաճիօ»ն, բարձրասրինգի (oboe) վրայ Էնտրու Էօրտէլեանի՝ Մոցարթի «Ալեկրօ Ափերթօն», Անի Չօրպաճեանի՝ Շոփէնի դաշնակի «Ֆանթէզի Էմփրոմփթիւ»ն եւ Նիքոլա Պոմփարթի՝ Սպենդիարեանի «Այ վարդը»ն ու Ծովինար Այվազեանի՝ Օֆընպախի «Les oiseaux dans la Charmille»ը։

Նոյն ընտանիքէն Արիա, Սարին Պալեաններու սրինգի վրայ Խաչատուրեանէն երկու ստեղծագործութիւն եւ Նարեկի նոյն հեղինակէն ծանօթ ,Թոքաթա»ն վկայակոչեցին անոնց ունեցած տաղանդը։ Գեղեցիկ մեկնաբանութեամբ Ճուլիա Նալճեանի՝ Պէրպէրեանի ,Անոր»ը նորութիւն մըն էր հանդիսականներուն համար։ Իսկ Լորա Նաւասարդեան գրաւեց ներկաները թաւջութակի վրայ Այվազեանի ,Էթիւտ Քոնսանթրանթօ» նուագով։

Համերգի աւարտին խօսք առաւ միութեան գործադիր վարչութեան հիմնադիրատենապետուհին Տոքթ. Սվեթլանա Ամիրխանեան, որ հրաւիրեց դեսպանը տալու իր խօսքը։  Պարոն Մնացականեան քաղցր պարտականութիւն ունէր յանձնելու Վաղարշակ Օհանեանին Հ.Հ. Մշակոյթի նախարարութեան ,Նարեկացի» մետայլը արուեստագէտին տարիներու վրայ երկարող հայ մշակոյթի տարածման եւ ուսուցման աշխատանքին համար։ Այնուհետեւ ան յայտնեց գնահատանքի իր խօսքը այս համերգին առթիւ։ Մշակոյթի ամսուան եւ Ցեղասպանութեան հարիւրամեակին առիթներով այս համերգը վստահաբար արձանագրուած պիտի մնայ նիւ եորքահայ տարեգրութեան մէջ իր տեսակին մէջ որպէս եզակի համերգ։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles