Լիբանան.- Փառաշուք Հաւաք՝ Ի Յիշատակ Հայորդի Նահատակներուն

0 0
Read Time:1 Minute, 56 Second

p2 shaptvan ngare2

ՊԷՅՐՈՒԹ («Ազդակ»).- քառասուն տարի առաջ սկիզբ առած Լիբանանի քաղաքացիական պատերազմի ընթացքին զոհուած, նահատակ հայորդիներուն յարգանք մատուցելու եւ հաւաքական կամքն ու ուխտը վերանորոգելու համար, Սեպտեմբեր 15-28-ին, տեղի ունեցան բազմաթիւ ձեռնարկներ,
որոնց եզրափակիչ հանդիսութիւնը տեղի ունեցաւ Երկուշաբթի, Սեպտեմբեր 28-ին:
Տեղի ունեցաւ կարգապահ եւ ոգեւորիչ ջահերթը` մասնակցութեամբ բազմահարիւր երիտասարդներու, ընկերակցութեամբ Հ.Մ.Ը.Մ.-ի Լիբանանի Շրջանային վարչութեան շեփորախումբին եւ Հ.Մ.Ը.Մ.-ական սկաուտներու: Ապա Լիբանանի Երիտասարդական Միութեան անդամները ջահերով, իսկ Հ.Յ.Դ. Լիբանանի պատանեկան միութիւններու անդամները նահատակներու նկարները կրելով քալեցին մինչեւ «Փոլիկարպոս» կառատուն, ուր տեղի ունեցաւ ժողովրդային հանդիսութիւնը:
Լիբանանի հայոց թեմի առաջնորդ Շահէ եպս. Փանոսեան կարդաց Մեծի Տանն Կիլիկիոյ Արամ Ա. կաթողիկոսին պատգամը, որուն մէջ վեհափառ հայրապետը բարձրօրէն կը գնահատէ Լիբանանի քաղաքացիական պատերազմին ընթացքին զոհուած հայորդիներուն յիշատակը յարգելու, անոնց ծառայութեան անդրադառնալու եւ քաջութիւնը պանծացնելու նախաձեռնութիւնը: Արամ Ա. կաթողիկոսը շեշտեց, որ պատմութիւնը հերոսներով ու նահատակներով եւ ազգին ու հայրենիքին գերագոյն շահերուն համար յանձնառու կերպով ծառայող անձերով կը կերտուի, եւ այս «նուիրեալ անձերը» կը մնան պատմութեան մէջ` իրենց ճառագայթող ներկայութեամբ ու կը դառնան փարոսները նոր սերունդներուն:
Իսկ Լիբանանի մէջ Հայաստանի Հանրապետութեան դեսպան Աշոտ Քոչարեան կարդաց Հայաստանի Հանրապետութեան պաշտպանութեան նախարար Սէյրան Օհանեանին ուղերձը, որուն մէջ նախարարը կը շեշտէ, որ լիբանանահայութիւնը պատուով յաղթահարեց 1975-1990 թուականներու քաղաքացիական պատերազմը` հերոսաբար դիմակայելով սպառնացող վտանգները: Ուղերձին մէջ Օհանեան կ՛ըսէ. «Ձեր ցուցաբերած արիութեան եւ տոկունութեան շնորհիւ երաշխաւորուեցաւ հայկական թաղամասերու անդորր եւ բնականոն կեանքը: Կեանքի գնով ինքնապաշտպանութեան ուժերը կանխեցին օտար ուժերու ներթափանցումը, պահպանեցին ազգային կառոյցներն ու հաստատութիւնները:

Օրուան պատգամախօսն էր Հ.Յ.Դ. Լիբանանի Կեդրոնական կոմիտէի անդամ Յակոբ Հաւաթեան, որ յայտնեց, թէ նահատակներու յիշատակի օրը նաեւ յաղթանակի օր է, որովհետեւ լիբանանահայութիւնը յաղթած է այն բոլոր ներքին եւ արտաքին թշնամիներուն, որոնք փորձեցին ջլատել լիբանանահայութեան կենսունակութիւնը, հարուածել միասնականութիւնը, լուսանցքայնացնել համահայկական դերակատարութիւնը եւ վտանգել գոյութիւնը: Հաւաթեան հաստատեց, որ այսօր ալ քաղաքական զգօնութիւնը եւ հայ համայնքի միասնական դրսեւորումը կը շարունակեն մնալ ցնցումներէ եւ արկածախնդրութիւններէ հեռու պահելու կարեւոր նախադրեալները: Հայեցի դիմագիծի պահպանման վերաբերեալ Յակոբ Հաւաթեան նշեց, որ 40-ամեակը առիթ է վերանորոգելու մեր յանձնառութիւնը` դաշնակցական անկեղծ զինուորի անբասիր ու վեհանձն ոգիով:
Ժողովրդային հանդիսութեան ընթացքին ներկաները յոտնկայս յարգանքի տուրք մատուցեցին նահատակներուն յիշատակին, մինչ հանդիսավարները կարդացին նահատակներուն անունները: Ապա ներկաները դիտեցին Լիբանանի քաղաքացիական պատերազմը ներկայացնող տեսաներիզ մը, իսկ գեղարուեստական յայտագիրին իրենց մասնակցութիւնը բերին հայրենի երգիչներ, որոնք ներկայացուցին փունջ մը ազգային-յեղափոխական երգեր, նուիրուած լիբանանահայ նահատակներուն ու հերոսներուն, Արցախեան ազատամարտիկներուն եւ Հ.Յ. Դաշնակցութեան:
Լիբանանի քաղաքացիական պատերազմի 40-ամեակի հանդիսութիւնը փակուեցաւ «Արիւնոտ դրօշ»-ով` չորս երգիչներու կատարողութեամբ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles