0
0
Դեկտեմբեր 10-ին, Լիբանանի մէջ Հայաստանի Հանրապետութեան դեսպանութեան նախաձեռնութեամբ, Արժանթինի, Գերմանիոյ, Դանիոյ, Լեհաստանի, Յունաստանի, Չեխիոյ, Ռուսաստանի եւ Վատիկանի դեսպանները, այցելեցին Մեծի Տանն Կիլիկիոյ Կաթողիկոսութեան հովանիին տակ գործող Հայոց Ցեղասպանութեան Որբերու «Արամ Պէզիքեան» Թանգարանը:
Այցելուները ծաղիկներ զետեղեցին դանիացի միսիոնար Մարիա Եաքոպսընի շիրիմին: Ապա հիւրերուն իր ողջոյնի խօսքը փոխանցեց Դեսպան Աշոտ Քոչարեան: Այցելութիւնը տեղի ունեցաւ Մարդկային Իրաւանց միջազգային օրուան առիթով, որ կը նշուի ամէն տարի Դեկտեմբեր 10-ին: Դեսպանը նշեց, թէ այս տարի առաջին անգամ ըլլալով, Դետեմբեր 9-ին միջազգային ընկերութիւնը պաշտօնապէս նշեց Ցեղասպանութեան Զոհերու Յիշատակի եւ Ցեղասպանութեան Կանխարգիլման միջազգային օրը:
Այնուհետեւ ներկաները շրջագայեցան թանգարանը, ուր ցուցադրուած են զանազան փաստագրական նիւթեր Հայոց Ցեղասպանութեան, հայ որբերու, «Թռչնոց Բոյն» որբանոցի հիմնադրման եւ Մարիա Եաքոպսընի մարդասիրական գործունէութեան վերաբերեալ:
