Լիբանանի Նախագահ Աուն Այցելեց Հայաստան

0 0
Read Time:1 Minute, 36 Second

ԵՐԵՒԱՆ.- Չորեքղաբթի, Փետրուար 21-ին, Լիբանանի նախագահ Միշէլ Աուն պաշտօնական այցելութիւն մը տուաւ Հայաստան, ընդառաջելով Հ.Հ. նախագահ Սերժ Սարգսեանի հրաւէրին։ Աուն «Զուարթնոց» օդակայանին մէջ դիմաւորուեցաւ Հայաստանի կառավարութեան անդամներէն Դաւիթ Լոգեանի կողմէ։ Ուղեւորութեան ծրագրի սկիզբին ան այցելեց Ծիծեռնակաբերդի յուշահամալիրը։ Աուն Ծիծեռնակաբերդի մէջ ծաղկեպսակ մը զետեղեց, ապա մէկ վայրկեան յոտնկայս լռութեամբ յարգեց Ցեղասպանութեան զոհերուն յիշատակը: Ապա ան իր անունով մասնակցեցաւ Ցեղասպանութեան զոհերու յիշատակին նուիրուած ծառատնկումին եւ ուղղուեցաւ Ցեղասպանութեան թանգարան: Ցեղասպանութեան թանգարանի յիշատակի մատեանին մէջ նախագահ Աուն կատարեց հետեւեալ գրառումը. «Այս թանգարանին մէջ վկայեցի սարսափելի նկարներ ու շօշափելի փաստեր, որոնք կը պատմեն հայ ժողովուրդի պատմութեան արիւնալի փուլին մասին, երբ անոնք վայրագ սպանդներու ենթարկուեցան: Սպանդներ, որոնց նմանը դարերու ընթացքին քիչ պատահած է: Այս փաստերը կը մղեն, որ հաստատեմ, թէ Հայոց ցեղասպանութեան իմաստով արդարութիւնը պէտք է պարտադրուի, որպէսզի յիշողութիւնը բիւրեղանայ եւ անիրաւութեան դէմ իրաւունքի յաղթանակին նկատմամբ վստահութիւնը կարելի ըլլայ վերահաստատել: Կ՛ողջունեմ փառաւոր հայ ժողովուրդը, որ հակառակ իր դիմագրաւած տագնապներուն, դժուարութիւններուն եւ անիրաւութեան, կրցաւ հիմնել հպարտալի երկիր մը եւ կառչած մնալով հինէն եկող իր քաղաքակրթութեան կ՛ուղղուի կերտելու աւելի փայլուն ապագայ մը»:

Միշէլ Աուն այցելեց Մայր Աթոռ Սուրբ Էջմիածին, ուր հիւրընկալուեցաւ Ամենայն Հայոց Տ.Տ. Գարեգին Բ. Կաթողիկոսին կողմէ։ Բարձրաստիճան հիւրին ուղեկցեցաւ Հայաստանի Արտաքին գործոց փոխ-նախարար Արմէն Պապիկեան։ Վեհափառ Հայրապետը ուրախութիւն արտայայտեց բարեկամ երկրի ղեկավարի՝ Հայաստան եւ համայն հայութեան հոգեւոր կեդրոն այցելութեան կապակցութեամբ։ Ան գոհունակութեամբ հաստատեց, որ հայ-լիբանանեան սերտ կապերը ունին պատմական խոր արմատներ՝ ամրօրէն խարսխուած փոխադարձ վստահութեան վրայ։ Նորին Սրբութիւնը յոյս յայտնեց, թէ Աունի Հայաստան այցելութիւնը նոր խթան կը հանդիսանայ երկու երկիրներու միջեւ զանազան ոլորտներէ ներս գործակցութեան ամրապնդման եւ երկու ժողովուրդներու յարաբերութիւններու առաւել ընդլայնման տեսանկիւնէն։ Մայրավանքի համալիրէն ներս Աուն եւ ընկերակիցները այցելեցին նաեւ Մայր Տաճար եւ ծանօթացան աւանդատուն-թանգարանի երդիքին տակ ցուցադրուած հայ հոգեւոր մշակոյթի արժէքներուն։

 

 

Նախագահ Աունի ընկերակցող պաշտօնական պատուիրակութեան մաս կազմեցին Հ.Յ.Դ. Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, զբօսաշրջութեան նախարար Աւետիս Կիտանեան, ներքին գործոց նախարար Նուհատ Մաշնուք, ճարտարարուեստի նախարար Հիւսէյն Հաժ Հասան, եւ մեծ թիւով լրագրողներ:

 

 

 

 

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles