0
0
ԼԱ ՀԷՅ․- Արդարադատութեան միջազգային դատարանը հրապարակեց Բերձորի միջանցքի ապաշրջափակման վերաբերեալ ժամանակաւոր միջոց կիրարկելու Հայաստանի պահանջի մասին որոշումը: Այսպիսով` դատարանը եզրակացուց, որ Ատրպէյճանը պարտաւոր է իր` հռչակագիրով ստանձնած պարտաւորութիւններուն համաձայն` ձեռնարկել իրմէ կախուած բոլոր միջոցները, որպէսզի ապահովէ անձերու, փոխադրական միջոցներու եւ բեռներու անխափան տեղաշարժը Բերձորի միջանցքով երկու ուղղութեամբ:
Դատաւորը նշեց, որ դատարանը կը նկատէ, որ 12 Դեկտեմբեր 2022-էն Լեռնային Ղարաբաղի եւ Հայաստանի Հանրապետութեան միջեւ կապը Բերձորի միջանցքով խաթարուած է: Դատարանը կ՛արձանագրէ, որ այս իրավիճակին պատճառով շարք մը հետեւանքներ ծագած են, եւ, որ հետեւանքները կրող անձերը կը շարունակեն մինչեւ հիմա այդ ազդեցութիւն կրել: Տեղեկութիւններուն համաձայն, նաեւ խոչընդոտուած է Լեռնային Ղարաբաղ կենսական ապրանքներու ներմուծումը, որուն հետեւանքով սնունդի, դեղորայքի եւ այլ կեանք փրկող պարագաներու պակաս յառաջացած է: Դատարանը կը գտնէ, որ վնասը կրնայ անուղղելի նկատուիլ, երբ համապատասխան անձեր կը յայտնուին կեանքի եւ առողջութեան համար վտանգաւոր հանգամանքներու մէջ: Դատարանը յիշեցուց, որ 30 Յունուար 2023-ին տեղի ունեցած դռնբաց նիստին Ատրպէյճանի ներկայացուցիչը հաստատած է, որ իր կառավարութիւնը պարտաւորուած է եւ կը շարունակէ պարտաւորուիլ ձեռնարկել իրմէ կախուած բոլոր քայլերը` երաշխաւորելու անձերու, փոխադրական միջոցներու եւ բեռներու ազատ տեղաշարժը Բերձորի միջանցքով` միաժամանակ շարունակաբար աշխատելով Կարմիր խաչի միջազգային կոմիտէին հետ:
