Ի  ՅԻՇԱՏԱԿ ԱՐԺՊ. Տ. ՎԱԶԳԷՆ Ա. ՔՀՆ. ՊԵՔԻԱՐԵԱՆԻ (1929-2021)

0 0
Read Time:1 Minute, 24 Second

Ա.Մ.Ն. արեւելեան թեմի  բարեջան Առաջնորդ՝ Անուշաւան Արքեպիսկոպոս, Ազգային Վարչութեան Կրօնական եւ Քաղաքական Ժողովները խոր կսկիծով տեղեկացան, թէ երեքշաբթի, Յուլիս 27-ին, Ուստըրի (Մասաչուսէց) մէջ վախճանած է հոգեւորական դասու երիցագոյն անդամ՝ Արժպ. Տ. Վազգէն Աւագ Քահանայ Պեքիարեանը:

Տան կարգը տեղի ունեցաւ ուրբաթ Յուլիս 30-ին Սուրբ Երրորդութիւն եկեղեցւոյ մէջ (Ուստըր) Անուշաւան Արքեպիսկոպոսի նախագահութեամբ։ Շաբաթ, Յուլիս 31-ին, Սուրբ  Պատարագն ու օծման կարգը կատարեց Սրբազան Հայրը։ Այնուհետեւ, հանգուցեալ Տէր Հօր մարմինը ամփոփուեցաւ Ուստըրի Hope գերեզմանատան մէջ։ Ընտանիքի խնդրանքով, փոխան ծաղկեպսակի նուիրատուութիւնները կատարել Սուրբ Երրորդութիւն եկեղեցւոյ։

Տ. Վազգէն Ա. Քհն. Պեքիարեան ծնած է Նիկոսիա (Կիպրոս), Մայիս  4, 1929-ին։ Ծնողքը՝ Կարապետ Պեքիարեան եւ Ռոզա Էպրէքճեան-Պեքիարեան, Մեծ Եղեռնի վերապրողներ էին։ Եօթ տարեկանին, սկսած է խորանին ծառայել։ Չափահաս տարիքին, աշխատած է իբրեւ հիւսուածեղէնի վաճառական եւ հետագային, Նիկոսիոյ Terra Santa քոլէճը յաճախելէ ետք, Լիբանան մեկնած ու մուտք գործած է Մեծի Տանն Կիլիկիոյ Կաթողիկոսութեան դպրեվանքը։

1978-ին, Միացեալ Նահանգներ փոխադրուած է ու քահանայական ձեռնադրութիւնը ստացած՝ Նիւ Ճըրզիի մէջ։ Նոյն տարին, Ս. Երրորդութիւն եկեղեցւոյ (Ուստըր) հոգեւոր հովիւի պաշտօնին նշանակուած է։ 2000-ին, 22 տարի պաշտօնավարելէ ետք, հանգստեան կոչուած է, բայց իր ծառայութիւնը կանգ առած չէ։ Յաջորդ քսանամեակին, շարունակած է ծառայել ուրիշ ծուխերու իբրեւ արտահաս հովիւ՝ Միշիկընէն մինչեւ Ֆլորիտա եւ Նիւ Եորքէն մինչեւ Իլինոյ եւ Միզուրի, միշտ ինքնաշարժով ճամբորդելով ամենէն հեռաւոր տեղերը նոյնիսկ։

«Հոգելոյս Տէր Վազգէնի ընտանիքն ու Ազգային Առաջնորդարանի մեծ ընտանիքը մշտապէս պիտի յիշեն Տէր Հօր անձնազոհ ծառայութիւնը ի սպաս Հայ Եկեղեցւոյ եւ մեր համայնքին։ Անոր ծառայութիւնը անջնջելի պիտի մնայ թեմէս ներս, օրինակ դառնալով մեր նորահաս սերունդին։ Մեր ցաւակցութիւնները կը յայտնենք երէցկին Անահիտ Պոյաճեան-Պեքիարեանին, զաւակներուն՝ Ռոզա, Ալիծ, Ատրինէ, Թամարա եւ Կարօ, տասներեք թոռներուն եւ տասը ծոռերուն, ինչպէս եւ ընտանեկան բոլոր պարագաներուն: Խունկ եւ աղօթք իր յիշատակին», կը ցաւակցի Ա.Մ.Ն. արեւելեան թեմը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles