ԻՆՉՊԷ՞Ս ԿԱՐԵԼԻ Է ՄԱՆՈՒԿՆ ՈՒ ՊԱՏԱՆԻՆ ՆԵՐԳՐԱՒԵԼ ԳԻՐՔԵՐՈՒ ԱՇԽԱՐՀԸ

0 0
Read Time:2 Minute, 2 Second

Layout 1

Ս. Մ.

Եթէ հարց տաք, թէ մանուկն ու պատանին ինչպէ՞ս կարելի է ներգրաւել ընթերցումի աշխարհէն ներս, մանկավարժ-դաստիարակ Սօնա Տիգրանեան կը պատասխանէ.- »Անոնց հաճելի ու գրաւիչ գիրքեր տրամադրեցէք«:
Սօնա Տիգրանեան այս պատասխանին շօշափելի մարմին տուած է երեք գունագեղ եւ գրաւիչ գրքոյկներով: «Ծաղկած Այբուբեն», «Երկիր» եւ «Անմոռուկ» խորագրեալ գրքոյկները արգասիքն են տարիներու աշխատանքի, եւ լոյս աշխարհ եկան 2015ի տարեփակի օրերուն, Լոս Անճելըսի մէջ, «Վարդգէս Պետրոսեան Մշակութային Ֆոնտ»ին ճամբով, արեւելահայերէն ու արեւմտահայերէն տարբերակներով:
Կողքին ու էջերուն տեսքն իսկ գրաւիչ է, եւ նախամուտը կը կազմէ հաճելի ու դաստիարակիչ բովանդակութեան. չափածոյ եւ արձակ գրութիւններուն կþընկերանան նիւթին համապատասխանող գծանկարներ, յատկապէս պատրաստուած այս շարքին համար: Խորքին մէջ, կարելի էր երեք հատորիկները դիւրութեամբ համախմբել մէկ կողքի տակ, ենթաբաժանումներով, սակայն յայտնապէս այդպէս չէ եղած մանկավարժական նկատումներով, որպէսզի մանուկին ձեռքը չտրուի «հաստափոր» հատոր մը:
«Ծաղկած Այբուբեն» խորագիրը կը մատնէ բովանդակութիւնը: Հեղինակը գողտրիկ ոտանաւորներ հիւսած է մեր ոսկեղնիկին բաղկացուցիչ տառերուն մասին. Այբէն սկսեալ ու յաջորդաբար՝ մեր տառերը կը զրուցեն ընթերցողին հետ, անոր կը պատմեն իրենց գաղտնիքները: Իւրաքանչիւր էջէ կը ճառագայթէ գեղանկարուած տառ մը, որուն կþընկերանան գրութիւնն ու գեղանկարներ: «Երկիր»ն ու «Անմոռուկ»ը եւս կազմուած են չափածոյ եւ արձակ գողտրիկ կտորներով, որոնք երբեմն հեքիաթային են, յաճախ հայրենի աշխարհն ու բնութեան տարրերը, ծառն ու ծաղիկը, պտուղներն ու թռչունները հաղորդակից կը դարձնեն ընթերցողին, անոնց հանդէպ սէր կը ներարկեն հոգիներուն: Ուշագրաւ եւ տիրապետող գիծ մըն է հայրենասիրութիւնը՝ հայրենիքի լերան, լիճին ու բնութեան հանդէպ սիրոյ զգացումը, որ կը բխի հեղինակին հոգիէն ու միտքէն եւ ուժեղ թափով կը հոսի ընթերցողին աչքերէն ու էութենէն ներս, վարակելու համար մանուկն ու պատանին, ինչո՞ւ չէ նաեւ… ծնողները:
Մանկապատանեկան գրականութեան մէջ, ընդհանրապէս գեղարուեստի երեսը շատ չի փնտռուիր, հիմնական նախապայման չի նկատուիր: Այս պարագային, սակայն, ընթերցողը կը նկատէ, որ բանաստեղծական շունչ մը կայ քիչ մը ամէն տեղ, եւ ահա այդ շունչն է որ հայրենիքին, բնութեան, կենդականական աշխարհին ու աշխարհի տարբեր բարիքներուն հանդէպ սիրով կը վարակէ ընթերցողը:
Այս մատենաշարին կարեւոր արժանիքներէն մէկն ալ այն է, որ մեր լեզուի երկու հարստութեանց՝ Արեւելահայերէնին ու Արեւմտահայերէնին միջեւ կամուրջ մը կը ստեղծէ, ըսել կþուզենք՝ քանի մը քարով կþամրապնդէ արդէն իսկ գոյութիւն ունեցող կամուրջը: Սա կը բխի մեր այս երկու գանձերուն նկատմամբ հեղինակին հաւատքէն ու սէրէն. խորքին մէջ, այս շարքը կարելի է գործնական հրաւէր մը նկատել այդ կամուրջին աւելի եւս ընդարձակման:
Մեր մանուկներուն ու պատանիներուն գրադարանները հարստացնող նմանօրինակ հրատարակութիւններ ողջունելի են անկասկած, մինչեւ իսկ եթէ երբեմն հրատարակչական աշխատանքին «պարտադրած» մանր վրիպակներով կը ներկայանան: Ցանկալի է, որ նման շարքեր չմնան անվաղորդայն եւ իրենց բարերար դերը ունենան նոր սերունդին մօտ մայրենիին ամրակայման առաքելութեան ճամբուն: Իսկ այդ դերին ճամբայ բացողներն են ծնողներ եւ ուսուցիչներ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՍՈՒՐԻԱԿԱՆ ՊԱՏԵՐԱԶՄԸ, ՀԱՅՈՒԹԻՒՆԸ, ԱԶԳԱՅԻՆ ԻՆՔՆՈՒԹԵԱՆ ԵՒ ՀԱՄՐԱՆՔԻ ՊԱՇՏՊԱՆՈՒԹԻՒՆԸ
Next post Բուն Բարեկենդանի Տօնախմբութիւն

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles