0
0
Հայ Օգնութեան Միութեան Ա.Մ.Ն. Արեւելեան շրջանի 89րդ պատգամաւորական ժողովը տեղի ունեցաւ Իլինոյի Կլէնվիու շրջանին մէջ, հիւրընկալութեամբ Շիքակոյի «Զապէլ» մասնաճիւղին, Յուլիս 16էն 19, 2009ին:
Ամէն ճիգ թափուած էր յաջող ձեւով կազմակերպելու համար այս ժողովը: Պատգամաւորական ժողովի մասնակիցները ներկայացուցին Հ.Օ.Մ.ի Արեւելեան Ա.Մ.Ն.ի Նիւ Ճըրզիի, Նիւ Եորքի, Ռոտ Այլընտի, Մասաչուսէցի, Փէնսիլվանիայի, Քանեթիքըթի, Վիրճինիայի, Միշիկընի, Իլինոյի, Ուաշինկթընի, եւ Ուիսքանսընի մասնաճիւղերը: Ներկայացուցիչներուն միացան Հ.Օ.Մ.ի Արեւելեան Ա.Մ.Ն.ի կեդրոնական վարչութիւնը եւ հիւրեր:
Ժողովի ընթացքին տարեկան նիւթաբարոյական ատենագրութիւնը ներկայացուեցաւ: Երեք նոր անդամներ ընտրուեցան յառաջիկայ տարեշրջանի Շրջանային Վարչութեան անդամ: Զանազան առաջարկներ կատարուեցան յարաբերական եւ տնտեսական բնագաւառէն ներս, եւ վաւերացուեցաւ 2009-2010 տարեշրջանի հաշուեցոյցը:
Ժողովի ատենապետներն էին ընկհ. Զապէլ Մուրատեան Ֆէյ (Պինկհամթընի «Անահիտ» մասնաճիւղ)եւ ընկհ. Քարոլին Շմավոնեան (Ֆիլատելֆիոյ, «Արտեմիս» մասնաճիւղ). Ժողովի քարտուղարուհիներն էին ընկհ. Հօլի Խալիկեան (Ռէյսինի, «Սօսէ» մասնաճիւղ), ընկհ. Անի Փիլիպոսեան (Տիթրոյթի, «Շաքէ» մասնաճիւղ), եւ ընկերուհիներ Անիկ Քէշիշեան եւ Ռաքել Ասատուրեան (Նիւ Ճըրզիի Հատսըն գաւառի «Շաքէ» մասնաճիւղ):
Հ.Օ.Մ.ի կեդրոնական վարչութիւնը կը ներկայացնէր ընկերուհի Մայտա Մելքոնեան: Ժողովի հաշուեքննիչ, արխիւային, եւ բանաձեւութեան յանձնախումբերու ընտրութենէն վերջ, արծարծուեցան յառաջիկայ տարեշրջանի գործերն ու ծրագիրները:
Բանաձեւութեան յանձնախումբի անդամներն էին ընկհ. Մելանի Հարոյեան (Կրանիթ Սիթիի «Ռուպինա» մասնաճիւղ), ընկհ. Մէկի Խաչերեան (Ուաթըրթաունի «Լէօլա Սասունի» մասնաճիւղ), եւ ընկհ. Թալին Յակոբեան (Տիթրոյթի «Մարօ» մասնաճիւղ):
Արխիւային յանձնախումբի անդամներն էին ընկհ. Սօնա Միշիկեան (Տիթրոյթի «Սիպիլ» մասնաճիւղ), Շնորիկ Քարաքելեան (Ֆիլատելֆիոյ «Անի» մասնաճիւղ), եւ Կայանէ Շիրոզեան (Ֆիլատելֆիոյ «Արտէմիս» մասնաճիւղ):
Հաշուեքննիչ յանձնախումբի անդամներն էին ընկհ. Փըրլ Պարղամեան Թիկ (Լօուըլի «Լուսնթագ» մասնաճիւղ), ընկհ. Անի Քէշիշեան (Նիւ Ճըրզիի Հատսըն գաւառի «Շաքէ» մասնաճիւղ), եւ ընկհ. Մինա Յովսէփեան (Նիւ Եորքի «Մայր» մասնաճիւղ):
Ընտրողական յանձնախումբի անդամներն էին ընկհ. Մէրի Արապեան, Քնար Աբգարեան, Մանիա Պարտագճեան, Երան Մանճիկեան, եւ Մարօ Նալպանտեան:
Ընկհ. Ճոյս Երեմեան ընտրուեցաւ խորհրդական, ընկհ. Մէլանի Քերնեքլեան ժողովի լրագրող եւ Սօնա Կարապետեան՝ ներկայութեան պատասխանատու: Հրաւիրուած հիւրերն էին – Հ.Օ.Մ.ի հարիւրամեակի յանձնախումբի նախագահ՝ ընկհ. Անժէլ Մանուկեան, Ճոյս Երեմեան, ընկհ. Ճորճի-Ան Օշական, եւ ընկհ. Միմի (Միւրիէլ) Բարսեղեան (Կեդրոնական Վարչութեան անդամ, որ ծառայած էր շրջանային վարչութենէն ներս մինչեւ իր ընտրութիւնը կեդրոնական վարչութեան Հոկտեմբեր 2008ին):
Համաշխարհային տնտեսական անկման հետեւանքները նիւթ դարձան, յատկապէս Հ.Օ.Մ.ի մարդասիրական եւ կրթական ծրագիրներու քննարկման ժամանակ: Շատ մը ծրագիր-աշխատանքներ մօտէն քննարկուեցան: Բազմաթիւ հարցեր կախեալ են շրջաններու կատարելիք դրամահաւաքէն, որ հետզհետէ աւելի դժուարութեամբ կը կատարուի:
Հ.Օ.Մ.ի Արեւելեան Ա.Մ.Ն.ի անդամները կը շարունակեն մասնակցիլ Միութեան համաշխարհային ծրագիրներուն մէջ: Ստորեւ, ատենագրութեան մէջ նշուած կարեւոր իրադարձութիւնները.-
Հայաստանի եւ Արցախի մէջ կատարուած որբերու յատուկ «Sponsor a Child» հիմնադրամին, ցայսօր կարելի եղած է եօթ հազար որբեր օժանդակել: 1992էն սկսեալ, որբերու կրթութեան յատուկ հիմնադրամին՝ «Orphan Education Fund»ի միջոցաւ, կրթաթոշակներ յատկացուած են Հայաստանի եւ Արցախի մէջ որբ ուսանողներուն: Կարելի եղած է միշտ նեցուկ կանգնիլ «Սօսէ» մանկապարտէզի հիմնարկին, որ Արցախեան գիւղերու մայրերու եւ մանուկներու օգնութիւն կը հայթայթէ: Միեւնոյն աշխատանքը կատարուած է Գիւմրիի շրջանին մէջ, Հ.Օ.Մ.ի «Մայր ու Զաւակ» դարմանատան եւ ծննդաբերութեան կեդրոնին, որոնք շրջանի ընտանիքներու առողջութիւնը կ’ապահովեն: Յատուկ օժանդակութիւն կատարուած է նաեւ «When September Comes» ծրագրին, որ Հայաստանի մէջ աշակերտներու գրենական պիտոյքներ կը հայթայթէ:
Հ.Օ.Մ.ի Արեւելեան Ա.Մ.Ն.ի կողմէ համալսարանական հայ ժառանգութիւն ունեցող աշակերտներ կրթաթոշակներ ստացան իրենց ուսումը օժանդակելու համար: Կարգ մը աշակերտներ ստացան «Լազարեան» կրթաթոշակը‘ մասնագիտական ուսում շարունակողներու համար: Միութիւնը կ’օժանդակէ ամէնօրեայ եւ շաբաթօրեայ վարժարաններ, եւ նոյնպէս «United Armenia Fund» հիմնադրամին: Միութիւնը նաեւ բարոյական եւ նիւթական օժանդակութիւն կը կատարէ «Քէմփ Հայաստան»ին:
Հ.Օ.Մ.ի հարիւրամեակի յանձնախումբի նախագահ, ընկհ. Անժէլ Մանուկեան (Հ.Օ.Մ.ի հարիւրամեակի տօնակատարութիւնը տեղի պիտի ունենայ 2010ին), խօսք առաւ նշելով հիմնադրութեան հեռատեսութիւնը, եւ կարիքը յայտնեց վերարժեւորելու կազմակերպութեան աշխատանքները հասնելու համար դրամահաւաքութեան նպատակներուն: Ընկհ. Մանուկեանի պատրաստակամութիւնը, հաստատակամութիւնը, լաւատեսութիւնն ու կայտառութիւնը ոգեւորեց ներկայ պատգամաւորները: Ան նաեւ ներկայացուց «Դար Մը Յուշեր» (A Century of Memories), պատմական հրատարակութիւն մը, Հ.Օ.Մ.ի կատարելագործած աշխատանքներուն մասին, կատարուած վերջին հարիւր տարիներու ընթացքին, որ լոյս տեսաւ եւ ցրուեցաւ Հ.Օ.Մ.ի Արեւելեան Ա.Մ.Ն.ի ճաշկերոյթին, կատարուած անցեալ աշնան, Նիւ Եորքի մէջ, նախաձեռնելով շրջանի դրամահաւաքական աշխատանքները հարիւրամեակի տօնակատարութեան առթիւ:
Այս տարուան «Ակնունի» տիտղոսը յանձնուեցաւ ժողովի հիւր, ընկհ. Ճոյս Երեմեանի, Հայ Օգնութեան Միութենէն ներս կատարած իր հետեւողական աշխատանքին պատճառով: Ընկհ. Երեմեան համեստաբար, հրճուանքով եւ քիչ մըն ալ զարմանքով ընդունեց տիտղոսը, յայտնելով թէ սոյն միութեան ծառայելը, իրեն համար պատիւ է:
Նշենք թէ, ընկհ. Քնար Քիլէճեան «Դար Ակումբ»ի շրջուն բաժակը ներկայացուց Նիւ Ճըրզիի «Շաքէ» մասնաճիւղին, նկատի ունենալով որ շրջանը կրցած էր լաւագոյն անդամարշաւը կատարել: Հ.Օ.Մ.ի Ռէյսինի «Սօսէ» մասնաճիւղը վերոյիշեալ բաժակին տիրացած էր 2008ին:
Շիքակոյի «Զապէլ» մասնաճիւղի անդամ, ընկհ. Արփի Քիլեան խօսք առնելով, կարեւորեց Հ.Օ.Մ.ի առաքելութիւնը, հայ կանացի գործունէութիւնը, եւ կազմակերպութեան բարեսիրական եւ խնամատարական լայնածաւալ աշխատանքը:
Յաջորդաբար իններորդ անգամ ըլլալով, Հայ Մշակութային Կեդրոնին կազմակերպած նաւապտոյտի ընթացքին, անդամներ զրուցեցին, խորհրդակցութիւններ կատարեցին, ճաշեցին, պարեցին, եւ վայելեցին Շիքակոյի սքանչելի երկնագերերու տեսարանը:
Պատգամաւորական ժողովը շնորհակալութիւն յայտնեց 2008-2009 տարեշրջանի Շրջանային Կեդրոնական Վարչութեան ընկերուհիներ Միմի Բարսեղեանի (մինչեւ Հոկտեմբեր 2008), Քնար Քիլէճեանի, Անի Աթթարի, Սիլվա Գույումճեանի, Գոհար Դաւիթեանի, Անայիս Չոլաքեանի, եւ Վարսէն Պետրոսեանի, իրենց նուիրումին եւ ճանաչան աշխատանքին համար:
Հրաժարեալ Շրջանային Վարչութեան անդամներն էին ընկերուհիներ Քիլէճեան, Աթթար, եւ Տաղլեան: Նոր Շրջանային Վարչութիւնը կը բաղկանայ, հետեւեալ եօթը անդամներէ.- Սիլվա Գույումճեան (Նիւ Ճըրզիի «Շաքէ» մասնաճիւղ), Գոհար Դաւիթեան (Նիւ Եորքի «Մայր» մասնաճիւղ), Անայիս Չոլաքեան (Նիւ Եորքի «Մայր» մասնաճիւղ), Վարսէն Պետրոսեան (Նիւ Ճըրզիի «Սաթենիկ» մասնաճիւղ), Քարօլ Ճաֆարեան (Ուստըրի «Քնար» մասնաճիւղ), Քարոլին Շմավոնեան (Ֆիլատելֆիոյ «Արտեմիս» մասնաճիւղ), եւ Սիւզան Ազարեան (Նիւ Ճըրզիի Պերկըն գաւառի մասնաճիւղ):
