Ի՞նչ Է Մեր Դրութիւնը Այսօր

0 0
Read Time:2 Minute, 3 Second

armenian garo

ԿԱՐՕ ԱՐՄԵՆԵԱՆ

Կ՛արձագանգեմ Թաթուլ Յակոբեանի կցեալ գրառման (Սերժ Սարգսեան. «Այո՛, ես համարում եմ, որ Աղդամը մեր հայրենիքը չէ», ազատագրուած տարածքներու կարգավիճակը այսօրուան իրականութեան պրիսմակէն դիտելու հրամայականէն դրդուած:
Պր. Յակոբեան կը խօսի 2001 թուականի մասին՝ մէջբերումներ ընելով այդ օրերու պաշտպանութեան նախարար, ներկայիս ՀՀ նախագահ պր. Սերժ Սարգսեանի խորհրդարանական ելոյթներէն: Ես չեմ գիտեր, թէ այսօր ի՛նչ մտայնութեամբ պիտի մօտենար պր. նախագահը այս հարցերուն: Պարզ է սակայն, որ այսօր որեւէ ժամանակէ աւելի սուր այժմէականութեամբ այս հարցերը դրուած են մեր պետութեան առջեւ, եւ անոնք են, որ պիտի ճշդեն մեր պետութեան ապագան:
Թէժ հարցադրումներու բովին մէջ եւ պաշտպանութեան նախարարի իր հանգամանքով, պր. նախագահը, ըստ հաղորդման, ըսած կը թուի ըլլալ, թէ Աղդամը մեր հայրենիքը չէ… այդ տարածքներու ազատագրումը համարելով լոկ մեր երկրի անվտանգութենէն բխող քայլ: Այսօր հարց պէտք է տանք, թէ իսկապէս ի՞նչ կը նշանակէ այլեւս այս ենթադրեալ զատորոշումը:
Երբ թշնամիդ կը պնդէ, որ քու հայրենիքդ իրն է, բնականաբար քու խնդիրդ է ճշդել, թէ ո՞րն է քու անվտանգութեան սահմանագիծդ, եւ այդ սահմանագիծն ալ անվիճելիօրէն կը յստակացնէ, թէ որո՞նք են քու հայրենիքիդ նուազագոյն սահմանները: Այսօր այլեւս անիմաստ է նրբերանգներով խօսիլ այս հարցին մասին: Մանաւանդ, որ մեր հայրենիքի պատմական սահմանները – բոլոր փաստերը կը հաստատեն – ոչ միայն կ՛ընդգրկեն Աղդամը, այլ շատ ուրիշ տարածքներ, որոնք մեզի կը պատկանին եւ մերը պէտք է ըլլան: Մեր երկրի լինելիութիւնը լիուլի ապահովուած էր, երբ մենք տէրն էինք այդ տարածքներուն: Մենք դարձանք վտարանդի մեր իսկ երկրին մէջ, երբ մենք այդ տարածքները զիջեցանք թշնամիին:
Մեր վախճանական խն-դիրն է ապահովել մեր հայրենիքի լինելիութիւնը (viability): Նոյնիսկ ազատագրուած տարածքներով դեռ շատ թերի է մեր աշխարհագրութիւնը: Մենք շատ հեռու ենք լինելիութեան պայմանը գոհացուցած ըլլալէ: ԻՍԿ ԱՌԱՆՑ ԼԻՆԵԼԻՈՒԹԵԱՆ՝ ՉԻ՛Ք ԱՆԿԱԽՈՒԹԻՒՆ: Զիջիլ այսօրուան ազատագրուած տարածքները համազօր է մեր կեանքի ենթահողը զիջելու: Մեր գոյութեան իրաւունքէ՛ն հրաժարելու:
Պր. նախագահը քաջ գիտէ, որ մենք շատ հեռու ենք բանակցութեան մէջ ըլլալէ, քանի որ բանակցելու մտայնութեամբ գործող թշնամի մը չունինք մեր առջեւ եւ երբեւէ պիտի չունենանք գէթ մեր կեանքի ընթացքին: Թուրքիա եւ իր արբանեակը՝ Ատրպէյճան միշտ գործած են Հայաստանն ու հայութիւնը բնաջինջ ընելու տրամաբանութեամբ: Եւ այդ բանին որպէս նախաքայլ՝ Հայաստանը պատանդ երկրի վերածելու յստակ դիտաւորութեա՛մբ: Հետեւաբար ինչպէս Իսրայէլը, Հայաստան եւ Արցախ եւս պիտի գործեն այդ տարբերակը զանց ընելով, քանի որ ան գոյութիւն չունի: Մեր գործը Թուրքիոյ եւ Ատրպէյճանի փանթուրքիստ եւ ֆաշիստ պետականութիւններուն հետ է: Ուզենք կամ չուզենք՝ մենք այս իրականութեան մէջն ենք թէ՛ Հայրենիքի եւ թէ Սփիւռքի մէջ: Մենք հող չունինք տալիք: Մենք հող ունինք առնելի՛ք: Զիջողական տարբերակը չէ, որ պիտի կարողանայ ապահովել մեր երկրի խաղաղութիւնը: Մեր երկիրը Սկանտինաւիոյ մէջ չէ, որ կը գտնուի:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles