0
0
Երուզեռի մէջ է հայրենի քաղաքական կեանքը: Եւ որքա՜ն խորհրդարանի ընտրութիւններու օրը` Մայիս 6, 2012 թուականը կը մօտենայ, այդքան կը բարձրանայ այս հեւքը:
Հ.Յ.Դաշնակցութիւնն ալ, իր կարգին գործի լծուած է եւ հետեւողական նիստերով ու հանդիպումներով, կը քննարկէ ներկայ տիրող իրավիճակը, քարոզչական ռազմավարութիւնը եւ այլ հարցեր:
Սակայն հոս, անյապաղօրէն մէկ բան նշելի է թէ Հ.Յ.Դաշնակցութիւնը միայն ընտրութիւններու նախօրեակին չէ, որ պէտք է աշխատի, գործի լծուի հանրութեան հետ:
Ի շահ ժողովուրդին ծառայելու գաղափարներն ու առաջարկներ են, որոնցմով տուեալ կուսակցութիւն մը, գէթ Հ.Յ.Դաշնակցութիւնը կը փափաքի…առ ի արդար յատուցում` քուէ ակնկալելու:
Ներկայ իրավիճակին ու կացութեան լոյսին տակ, յստակ է թէ անպայման բաղձալի են ՓՈՓՈԽՈՒԹԻՒՆՆԵՐ: ժողովրդավարական, ընկերային, տնտեսական, քաղաքական եւ այլ բազմաթիւ մակարդակներու վրայ շուտափոյթ եւ լուրջ փոփոխութիւններու կարիքն ու անհրաժեշտութիւնը կայ:
Ասոր կողքին, անհրաժեշտ է յատուկ ուշադրութեան առարկայ դարձնել ընտրակարգի բիւրեղացման եւ կատարելագործման համար կեղծ ու շպարային փոփոխութիւնները` թափանցիկ ու արմատական փոփոխութիւններու վերածելու անհրաժեշտութեան վրայ:
Առանց համամասնական ընտրակարգին անկարելի է ժողովրդավարական ընտրութիւններ կատարել, եւ հոս, յիշատակելի եւ ողջունելի է “Քուէն ուժ է“ շարժումի սկզբունքներուն տարածումը, հարիւր առ հարիւր համամասնական ընտրակարգի ամրագրման նպատակով տարուող աշխատանքները, որոնք դեռ յաւելեալ կարիքն ունին ընդհանրանալու, ընդարձակուելու եւ վերածուելու համազգային շարժումի: Ի վերջոյ հայորդիին համար յստակացած էր եւ ապացուցելու ալ կարիք չկար թէ մեծամասնական ընտրակարգը դարձած է լուրջ գործիք ընդդիմութիւնը դուրս մղելու եւ իշխանութեան վերարտադրութեան համար:
Միւս կողմէ, միջազգային ընտանիքի պահանջը ազատ եւ թափանցիկ ընտրութիւններ կազմակերպելու, իշխանութիւններու հրապարակային յանձնառութիւնը այս ուղղութեամբ եւ ընդդիմութեան առաջադրանքները գրեթէ նոյնն են: Մեծ պետութիւններն ալ գործի լծուած են, իրենց մութ հաշիւներուն համար, մօտէն հետեւելու այս անցուդարձերուն:
ՀԱՅՐԵՆԻՔ
