“ԹՈՒՐՔ ՀԱՍԱՐԱԿՈՒԹԻՒՆԸ ՓՈԽՈՒԵԼՈՒ ԳՈՐԾԸՆԹԱՑԻ ՄԷՋ Է։ … ԼՈՒՍԱՒՈՐ ԱՌԱՒՕՏ ՄՏԱՆՔ“ Կը Յայտնէ ԿԱՐՕ ՓԱՅԼԱՆ

0 0
Read Time:3 Minute, 51 Second

 

p2-3 Paylan
Յունիս 7-ին, Թուրքիոյ մէջ կատարուած խորհրդարանական 25-րդ ընտրութիւններուն, տարբեր կուսակցութիւններու կողմէ առաջադրուած ազգութեամբ հայ 5 թեկնածուներէն 3-ը յաղթական դուրս եկան: Անոնցմէ մէկը, տեղւոյն հայկական համայնքի կողմէ ամենէն աւելի ժողովրդականութիւն վայելող քրտամէտ ընդդիմադիր “Ժողովուրդներու Ժողովրդավարական“ Կուսակցութեան (HDP) կողմէ առաջադրուած Կարօ Փայլանն է, որ պատգամաւոր ընտրուելէ ետք, կը պատմէ իր նախկին գործունէութեան, ապագայ ծրագիրներու մասին ներկայացնելով Հայաստան-Թուրքիա յարաբերութիւններու կարգաւորման իր բանաձեւը: Ստորեւ, յապաւումով, լոյս կ՛ընծայենք Փայլանին անձնապէս ծանօթ եւ անոր գործունէութեան քաջատեղեակ Ermenihaber.am-ի թղթակից Աստղիկ Իգիթեանի կատարած մէկ հարցազրոյցը:

 

Հ.- Անցեալին աւելի շատ կրթական հարցերով կը զբաղէիր, քաղաքականութեամբ հետաքրքրուած չէիր , ինչպէ՞ս եղաւ թեկնածութեան առաջարկը :

Պ.- Իրականութիւնը Թուրքիոյ մէջ ,հայ եմե ըսելը արդէն իսկ քաղաքական բան մըն է: Եթէ հայերով հետաքրքրուած ես, սեփական ինքնութեամբ հետաքրքրուած ես, կը նշանակէ քաղաքականութեամբ ալ  հետաքրքրուած ես: Երիտասարդ տարիներէն սկսած հայկական կազմակերպութիւններուն մէջ կ’աշխատիմ, այնուհետեւ հայկական դպրոցի տնօրէն  եղած եմ: Եւ բոլոր աշխատանքներս հայկական համայնքի խնդիրներով եղած են: Բացի այդ Հրանդ Տինքի սպանութիւնը մեզի շատ քաղաքականացուց: Մինչեւ այդ ողբերգական իրադարձութիւնը ես դպրոցի տնօրէն էի, եւ միաժամանակ` գործարար: Սակայն Տինքի սպանութեան օրը ինծի համար դարձաւ բեկումնային օր, երբ հասկցայ, որ այս երկրին մէջ փող վաստակելս չէ, որ կարեւոր է:  Հասկցայ, որ ինչ-որ բան պէտք է փոխել եւ կեանքս նուիրեցի Հրանդ Տինքի սպանութեան մեղաւորները գտնելու պայքարին ու միեւնոյն ժամանակ հայ աշակերտներու խնդիրներու բարձրացման: Այնուհետեւ 2011 թուականին հասարակական գործիչներու խումբերու հետ հիմնեցինք Ժողովուրդներու դեմոկրատական Քոնկրէսը: Իսկ 2013-ին մեր կուսակցութիւնը հիմնեցինք:

 

Հ.- Եթէ այլ կուսակցութենէ ստանայիր առաջադրուելու առաջարկ, կ’ընդունէի՞ր:

Պ.- Ոչ, չէի ընդունիր: Ինծի համար կարեւոր է կեանքի բոլոր բնագաւառներուն մէջ հաւասարութիւնը: Իսկ միւս կուսակցութիւնները ժողովրդավարութեան վերաբերող հարցերուն ,բայցե-եր ունին: Անոնք չեն հաւատար հաւասարութեան եւ իրենց կուսակցութիւններէն ներս գերիշխողը մէկ ինքնութիւն է: Իսկ մեր կուսակցութեան մէջ հաւասարութիւն կայ ` առանց ,բայցերե-ու: Իմ կուսակցութեան մէջ անձս իբրեւ հայ օտարացուած չեմ զգար:

 

Հ.- Ինչպէս գիտես, Հանրապետական Ժողովուրդի կուսակցութեան (CHP) եւ Ազգայնական Շարժում կուսակցութեան (MHP) մէջ ալ հայ պատգամաւորներ կան: Պատգամաւորական գործունէութեանդ մէջ պատրա՞ստ ես անոնց հետ համագործակցելու, թէկուզ հայերուն վերաբերող հարցերուն:

Պ.- Սելինան շատ մօտ ընկերս է: (Սելինա Օզուզուն Տողանը Հանրապետական Ժողովուրդի կուսակցութեան (CHP)  ընտրուած հայ պատգամաւոր) կը կարծեմ, որ անոր հետ անցնելիք ճանապարհ ունինք: Իսկ Մարգարի  (Մարգար Եսայեանին իշխանական ,Արդարութիւն եւ Բարգաւաճում կուսակցութենէն ընտրուած հայ պատգամաւոր) հետ ժամանակին գաղափարակիցներ  եղած ենք, նոյնիսկ Էրտողանի դէմ համատեղ հռչակագիրներ  հեղինակած ենք: Սակայն Մարգարի վերջին 3 տարուան գործունէութեան եթէ նայինք, իշխանութիւններուն գովաբանող լեզուով կը խօսի: Իսկ ատոր ես երբեք չեմ կրնար մասնակցիլ: Եթէ ան կարենայ ձերբազատուիլ այդ գործունէութենէն, կը համագործակցինք, իսկ եթէ չէ, Մարգարի հայ ըլլալը ոչ մէկ նշանակութիւն չունի: Ինծի համար ազգութեամբ ոչ հայ ուրիշ մարդիկ Մարգարէն շատ աւելի կարեւոր կրնան ըլլալ: Օրինակ` ունիմ մեծ թիւով կուսակցիներ, որոնք հայեր չեն, բայց հայերուն վերաբերող հարցերուն Մարգարէն 1000 անգամ աւելի սրտացաւ են:

 

Հ.-  Ին՞չ է կը նշանակէ քեզի համար ըլլալ  հայ պատգամաւոր Թուրքիոյ խորհրդարանին մէջ: Հայկական խնդիրներով զբաղուելու պատասխանատուութիւն կը զգա՞ս:

Պ.- Անկասկած կը զգամ: Շարք մը խնդիրներ ունինք: Անցեալի հետ առերեսուելու, Հրանդի, Սեւակի, ցեղասպանութեան խնդիրներ ունինք: Մշակութային մեծ կորուստ ունինք, որն առ այսօր փոխհատուցուած չէ: Սակայն  ես այսպէս կը մտածեմ. եթէ այս բոլոր խնդիրներուն լուծման համար մենք հայերս միայնակ պայքարինք, յաջողութեան չենք հասնիր: Մեր կուսակցութեան սկզբունքներէն է, որ այս խնդիրներուն համար պայքարինք այլ ազգերու հետ միասնաբար: Բայց, բնականաբար, ես անձնապէս իմ պայքարը կը տանիմ: Ժխտողական քաղաքականութեան դէմ պայքարողներէն մէկը կ’ըլլամ, մեր համայնքին վերաբերող խնդիրներու լուծման համար կը պայքարիմ, անկախ այն բանէն ատոնք կ’ըլլան պատրիարքարանի, դպրոցներու թէ հիմնադրամներու խնդիրներ:

 

Հ.-  Թուարկած խնդիրներդ կը վերաբերին հայ համայնքին, իսկ Հայաստան-Թուրքիա յարաբերութիւններու կարգաւորման հարցով կը պատրաստուի՞ս ինչ-որ քայլեր ընել:

Պ.- Ի հարկէ: Բայց այս հարցով ինծի համար կարեւոր մէկ բան կայ: Հայոց Ցեղասպանութիւնը այստեղ  եղած է, բայց յաճախ կը դիտուի Հայաստան-Թուրքիա յարաբերութիւններու ծիրէն ներս: Ցեղասպանութիւնը այստեղ  տեղի ունեցած է ու առերեսումն ալ այստեղ պէտք է ըլլայ: Հայաստան-Թուրքիա յարաբերութիւնները կը կազմեն այս հարցի ընդամէնը մէկ մասը, բայց ոչ` հիմքը: Ես կը կարծեմ, որ քանի դեռ հանրութեան մէջ առերեսումը չէ հասունցած, արձանագրութիւնները իմաստ չեն կրնար ունենալ:

 

Հ.-  Այսինքն յարաբերութիւններու կարգաւորումը կը կապես ցեղասպանութեան ճանաչման հե՞տ: Ինչպէս գիտես, Հ.Հ. նախագահը առաջարկած էր առանց նախապայմաններու բանալ սահմանները:

Պ.- Այո, գիտեմ ու այդ տեսակէտը չեմ ընդունիր: Նախ եւ առաջ պէտք է Թուրքիոյ մէջ ցեղասպանութեան յանցանքը գիտակցուի, հայկական ինքնութիւնը կարգաւորուի  եւ Հայաստանի նկատմամբ թշնամանքը վերանայ: Անշուշտ, ես կը յարգեմ Հայաստանի եւ սփիւռքի մղած պայքարը: Բայց  կոչ կ’ուղղեմ բոլորին, բոլոր հայկական կուսակցութիւններուն, ինչպէս նաեւ` դաշնակցականներուն, եկէք այդ պայքարը այստեղ մղենք: Թուրքիա եկած ամէն մէկ հայ կ’ունենայ իր ներգործութիւնը:

 

Հ.- ,Ժողովուրդներու Ժողովրդավարական Կուսակցութեան (HDP) յաղթանակը սպասելի՛ էր քեզի համար:

Պ.- Սպասելի էր: Թուրք հասարակութիւնը փոխուելու գործընթացի մէջ է: Խօսք մը կայ` գիշերուան ամենամութ կէտը, ատիկա առաւօտուան ու արեւին ամենամօտ պահն է: Իսկապէս գիշերուան ամենամութ կէտին մէջ էինք եւ լուսաւոր առաւօտ մտանք:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles