0
0
ՅԱԿՈԲ ՎԱՐԴԻՎԱՌԵԱՆ
29րդ անգամ ըլլալով Վարդանանց Ասպետներու Եղբայրակցութիւնը կը յիշատակէ Ցեղասպանութեան տարեդարձը Նիւ Եորքի սրտին վրայ եղող “Թայմզ Սքուէր“ի վրայ: Արդէն աւանդութիւն դարձած այս ազգային հաւաքը իրար կը բերէ ազգային մեր կարեւոր հաստատութիւններու ներկայացուցիչներն ու հայութիւնը:
Ապրիլ 27, 2014, Կիրակի օր կէսօրէ ետք ժամը 2էն սկսեալ այս մեծ ոստանի նշանաւոր հրապարակը ժամադրավայրն էր Մեծագոյն Նիւ Եորքի պահանջատէր եւ ազգային գիտակցութիւն ունեցող հայորդիներուն, որոնց թիւը կը հասնէր 2,500ի: Շրջանի հայկական կեդրոններէն ու եկեղեցիներէն պըսերով խումբ առ խումբ եկած էին ամէն տարիքէ մեր հայրենակիցները: Դժբախտաբար, այս տարի առաջին անգամ ըլլալով բացակայ էին վերապրողները, որոնք հայկական ծերանոցներու իրենց սենեակներէն հեռուստատեսիլով հետեւեցան հանդիսութեան յայտագրին, խոստանալով` յառաջիկայ տարի Մեծ Եղեռնի դարադարձին անպայմանօրէն ներկայ գտնուիլ Նիւ Եորքի այս հրապարակը:
Յիշատակումը եղաւ այս հաւաքը կազմակերպող առաջին ու երկարամեայ ատենապետին` Սեմ Ազատեանին, որ կրցած էր ժամանակին արտօնութիւն ստանալ քաղաքապետարանէն կազմակերպելու համար Ցեղասպանութեան նուիրուած այս հանրային բողոքի ցոյցը:
Հանդիսավարութիւնը կատարեցին Գընեթիքըթ Համալսարանի նախագահ Դոկտ. Մէյրի Փափազեան եւ իրաւաբան Արմէն ՄքՔամպըր: Պետական զոյգ հիմները նուագեցին “Արենի“ նուագախումբը: Բացման աղօթքը կատարեց Օշական Արք. Չօլոյեանը` առաջնորդը Ազգային Առաջնորդարանի:
Այս տարի եւս յիշատակումի այս հաւաքին բերին հայ ժողովուրդի արդար դատին հաւատացող ամերիկացի քաղաքական դէմքերը` ծերակուտականներ Չաք Շումըր (Նիւ Եորքէն) եւ Րապըրթ Մենենտէս (Նիւ Եորքէն որ Ամերիկայի Ծերակոյտի արտաքին յարաբերութեանց յանձնախումբի որպէս ատենապետ ան յաջողած էր Ցեղասպանութեան բանաձեւը ընդունիլ տալ Ամերիկայի զոյգ կուսակցութեանց անդամներուն եւ զայն յանձնել Ծերակոյտին` քուէարկութեան համար): Խօսք առին նաեւ Ներկայացուցիչներու Տան անդամներ Ֆրանք Փելոն (Նիւ Ճըրզիէն որ Տան Հայկական քոքըսի համաատենապետն է եւ մեր իրաւունքները պաշտպանող գլխաւոր պետական քաղաքական անձնաւորութիւնը), Քարոլայն Մելլոնի (Նիւ Եորք), Էլիըթ Էնկըլ (Նիւ Եորքէն, որ նոր կը վերադառնար Հայաստանէն, ուր ներկայ գտնուած էր Ցեղասպանութեան յիշատակութեան եւ խոնարհելով իր ծաղիկը զետեղած էր Ծիծեռնակաբերդի Յուշարձանին առաջ) եւ Նիւ Եորք քաղաքի քաղաքապետարանի անդամ Փոլ Վելոն (կինը հայ): Խօսք առաւ նաեւ “Jewish Press”ի ազդեցիկ թերթի խմբագիրը Սիւզըն Ռոզընպլաթ, որ ազդու կերպով արդարութիւն պահանջեց թուրքերէն ճանչնալու Հայոց Ցեղասպանութիւնը: 
Յաջորդաբար խօսք առին ազգային մեր կազմակերպութիւններէն` Դոկտ. Տենիս Բաբազեան (Վարդանանց Ասպետներ), Լիսա Գրաճեան (Աւագ Տիրուհի Դստերք Վարադանանցի), Ալեքս Կարապետեան (Ամերիկայի Ազգային Համագումար), Քիմ Եագուպեան (Հ.Բ.Ը.Մ.), Տոքթ. Վաղինակ Դարբինեան (Ռ.Ա.Կ.), Աճէմեան (Ս.Դ.Հ.Կ.) , Անահիտ Ուղուրլեան (Հ.Յ.Դ.) եւ երիտասարդութեան անունով` Աննա Մարի Տատեան:
Գեղարուեստական յայտագիրով հանդէս եկաւ Լոս Անճելըսէն ծանօթ երգիչ Ար-Մին:
Հուսկ խօսք առաւ ու փակման աղօթքը կատարեց Ամերիկայի Հայոց Բարեխնամ Առաջնորդ Խաժակ Արք. Պարսամեան:
Շնորհաւորելի է կազմակերպիչ յանձնախումբին կատարած աշխատանքը եւ մասնաւորաբար ատենապետին` Հրանդ Կիւլեանին եւ փոխ ատենապետին` Տիգրան Սարգսեանին մեծ ներդրումը այս գործին յաջողութեան մէջ:
