0
0
ՅԱԿՈԲ ՎԱՐԴԻՎԱՌԵԱՆ
Գալիֆորնիոյ տարածքին եւ հայաշատ աւաններուն մէջ մեծ ժողովրդականութեան հասած այս թատերախումբը կը հմայէ ամերիկահայ երիտասարդութիւնը: Լիովին հայկական նիւթերով, մեր ազգային ապրելակերպին, կեանքին, երազներուն, ցաւերուն, յաջողութիւններուն մէկ գեղեցիկ արտայայտութիւնն է որ կու տայ թատերախումբը, դիտուած` նոր սերունդին ակնոցով իսկ, որ երբեմն կը ցաւցնէ գոնէ մեզ` “մենք մեզ աւելի հայ զգացողներս“, իր ներկայացուցած կատակերգութեան ընդմէջէն իսկ: Ամերիկահայ հարազատ կեանքն է որ կը ներկայացնեն թատերախումբին 6-7 դերակատարները, որոնք հասակ առած են թէեւ հայկական աւանդական միջավայրի մը մէջ, սակայն չեն տարբերիր իրենց սերնդակից ամերիկացիներէն: Վերջապէս, այս ներկայացման մէջ կը տեսնենք ամերիկացիին մէջ հա՛յն ու հայուն մէջ ամերիկացի՛ն: Եւ անոնք այս երկու մշակոյթներու ձուլումը կու տան հարազատութեամբ: 
Անցեալ դարու սկիզբի Երկրէն եկած ամերիկահայ սերունդ չունինք այլեւս եւ 60-70ական թուականներուն Պոլսէն, Եգիպտոսէն, Սուրիայէն, Իրանէն ու Լիբանանէն եկած գաղթականներուն միջին տարիքը արդէն հասած է հասունութեան …: Նոր ամերիկահայութիւնը այսօր, կը ներկայացնէ այս սերունդը, ընդունինք կամ ոչ: Այս տղոց ու աղջիկներուն կը վստահուի գալիք տասնամեակներու մշակութային, ընկերային եւ ազգային քաղաքական մեր առօրեայ կեանքը: Եւ գոնէ մենք, լսելու ենք զիրենք եւ եթէ կայ բան փոխելու մեր ընկերային ու հասարակական կեանքէն, դիւրացնենք գոնէ մենք այդ աշխատանքը եւ զայն յանձնենք աւելի ապահով ձեռքերու:
***
Փետրուար 28 եւ Մարտ 1, 2014, Նիւ Եորքի Symphonyspace թատերասրահը բերնէ բերան լեցուցած էին նիւ եորքահայ եւ նիւ ճըրզիահայ նոր սերունդը: Միջին տարիքի ներկայացուցիչները կը կազմէին ներկայութեան հազիւ տասը տոկոսը: Թէքէեան Մշակութային Միութեան Մեծագոյն Նիւ Եորքի “Մհեր Մկրտչեան“ թատերախումբը ունեցաւ յանդգնութիւնը, առաջին անգամ ըլլալով Ամերիկայի Արեւելեան ափ հրաւիրելու այս թատերախումբը, որուն մաս կը կազմէին բացի դերակատարներէն, մօտ 10 թեքնիք աշխատողներ` ձայնային, լոյսի, վիտէոյի, տարազներու, դիմայարդարման, բեմայարդարման բնագաւառներէն ներս:
Թէքէեանի անունով բարի գալուստ մաղթեց յանձնախումբի ժրաջան երիտասարդ լաւագոյն ուժերէն Օրիորդ Թալին Շէշէթեան, որուն անսակարկ հետապնդումներուն եւ մնայուն յարաբերութիւններուն շնորհիւ ալ ընդհանրապէս կարելի եղաւ յաջողցնել այս թատերախումբին հիւրախաղային ելոյթները Նիւ Եորքի մէջ: Դիւրին չէ Մենհեթընի մէջ այս բոլորը կատարել … նիւթական ծանր պարտաւորութեան մը առաջ դնելով կազմակերպող միութիւնը:
Թատերախաղին հեղինակն ու պատասխանատուն է Լորի Թաթուլեան` Գալիֆորնիոյ փոքրիկ մէկ աւանէն` Րիտլիէն (հայաշատ Ֆրէզնոյի շրջանէն, ուր ծնած էր անմահանուն Ուիլիըմ Սարոյեան), ուր հասակ առած է խարբերդցի այգեպաններու եւ գինեգործներու համայնքէն ներս: Լորիի ծնողքը` Լիբանանէն գաղթած հայեր են: Որպէս Goodwill Ambassador Լորին եկած է Նիւ Եորք եւ աշխատած Մ.Ա.Կ.ի կեդրոնատեղիին: Թատերական շնորհներով օժտուած ան արդէն ներկայացուցած է 4-5 տարբեր նմանօրինակ ներկայացումներ: Ան կ՛աշխատակցի, միւս կողմէ, ամերիկեան տեղական տարբեր հաղորդաընկերութիւններու եւ թատրոնի դասեր կու տայ նախակրթարաններու եւ երկրորդական վարժարաններու մէջ: Մեծարուած է National Endowment for the Arts թատերական բնագաւառէն ներս եւ ունի գնահատագիրներ Գալիֆորնիոյ քաղաքական դէմքերէն ստացած:
Բեմադրիչն է Ճէյմս Մարթին. ա՛յո հայ մը, որ հայերէն սորված է այս ներկայացման համար միայն…: Հասակ առած է հայ եւ ըստ իրեն “հայ եմ, շատ հաւանաբար, ձեր բոլորէն աւելի …“ հաստատումը կ՛ընէ յայտագիր-գրքոյկով:
Միւս դերակատարները` Արամ Արթին Ճիպիլեան` Հոլիվուտի Սուրբ Յովհաննու Կարապետ եկեղեցւոյ մէջ ծառայած, Ալեքս Քալոկնոմոս` UCLA համալսարանէն շրջանաւարտ անգլիական գրականութեան մէջ մասնագիտանալով եւ Լոս Անճելըսի Յունական Շարժապատկերի Ֆեսթիվալի տնօրէն բարձրացած է Սարոյեանի Hello Out There ներկայացման մէջ, Հելեն Քալոկնոմոս` մաս կը կազմէ թատերախումբի առաջին ներկայացումէն` 2009 թուականէն սկսեալ եւ Հայկական Թելեթոնի վարիչներէն է (ըստ իրեն` 3/4 հայ է եւ 1/4 ռուս եւ յոյն), Լութֆիկ Մանուկեան` մաս կը կազմէ զանազան ֆիլմերու եւ թատերախաղերու եւ նիւթապէս բաւականին դրամահաւաք կատարած է Հայաստանի համար եւ Ալեքսանտր Մաշիկեան, որ ինքզինք կը նկատէ տիպար հայը, առանց հայերէն խօսելու, կարդալու … սակայն այս ներկայացումը պատճառ կը դառնայ որ այլեւս մտածէ նաեւ սորվելու իր մայրենին:
Ահա՛ այս է պատկերը նոր ամերիկահայութեան, որ պէտք ենք ընդունիլ այնպէս ինչպէս որ է:
Երկրորդ օրուան ներկայացումէն ետք, Թէքէեանի վարչութիւնը ներկաները հրաւիրեց հիւրասիրութեան` սրահի քով եղող պառ–ը, մօտէն ծանօթանալու ներկայացման մէջ բաժին ունեցող դերասաններուն եւ թեքնիք աշխատողներուն:
Կը ծրագրուի խումբը դարձեալ հրաւիրել անյապաղ:
