Ընկերվարական Երիտասարդներու Միջազգային Միութիւնը Կոչ Կ՛ուղղէ Թուրքիոյ Ճանչնալու Ցեղասպանութիւնը Եւ Հատուցում Կատարելու

0 0
Read Time:2 Minute, 47 Second

socialist1

ԵՐԵՒԱՆ.- Մայիս 8-9-ին Հայաստանի մէջ տեղի ունեցած աշխարհի մեծագոյն երիտասարդական, քաղաքական կազմակերպութեան` Ընկերվարական երիտասարդներու միջազգային միութեան համաշխարհային խորհուրդի ժողովը ընդունեց բանաձեւ Հայոց Ցեղասպանութեան 100-րդ տարելիցին առիթով:
Հ.Յ.Դ. Երիտասարդականի կողմէ ներկայացուած բանաձեւի քննարկումը անցաւ աշխուժ մթնոլորտի մէջ: Բանաձեւի ընթերցումէն ետք, ձայնի իրաւունք խնդրեցին Իսրայէլի, Պուլկարիոյ, Չատի, Ուկանտայի եւ Գերմանիոյ պատուիրակութիւններու ներկայացուցիչները: Հակառակ կազմակերպութեան ժողովարարական կանոններուն, ըստ որոնց, ամէն մէկ բանաձեւ ներկայացնելէ ետք միայն մէկ կողմ կամ դէմ ելոյթի իրաւունք կը տրուի` Հայոց Ցեղասպանութեան մասին բանաձեւը ներկայացնելէ ետք հինգ հոգիի ելոյթի իրաւունք տրուեցաւ` ամէն անգամ առանձին քուէարկութեամբ հաստատելով ելոյթի իրաւունքը, որովհետեւ այդ մէկը կը հակասէ ժողովի կանոններուն:
Իսրայէլի Աշխատաւորական կուսակցութեան ներկայացուցիչը խօսեցաւ հրեաներու ու հայերու պատմական նոյն ճակատագիրը կիսելու փաստին մասին: Ան կարծիք յայտնեց, որ Հայոց ցեղասպանութեան պատճառներէն մէկը հայերու` ազգային պետականութիւն չունենալը եղած է: Հրեայ պատուիրակը իր կազմակերպութեան անունով յայտնեց, որ Հայոց ցեղասպանութեան հարցը տեղ պիտի գտնէ Քնեսեթի օրակարգին վրայ: Ըստ անոր, Իսրայէլը պէտք է ճանչնայ Հայոց Ցեղասպանութիւնը:
Պուլկարիոյ Ընկերվարական կուսակցութեան երիտասարդական կառոյցի ներկայացուցիչը զօրակցութիւն յայտնեց Հայոց Ցեղասպանութեան ճանաչման եւ հատուցման պահանջին: Ըստ անոր, Հայոց Ցեղասպանութիւնը պատմութեան չի պատկանիր: Թուրքիոյ յաջորդական կառավարութիւններուն եւ յատկապէս Էրտողանի վարչակարգի ժխտողական քաղաքականութիւնը զայն դարձուցած է այժմէական խնդիր:
Հեռաւոր Չատէն Երեւան հասած պատուիրակութեան ներկայացուցիչը խօսելով ժողովին ներկայ ափրիկեան պետութիւններու պատուիրակութիւններուն անունով, կոչ ուղղեց Թուրքիոյ կառավարութեան ճանչնալու Հայոց ցեղասպանութիւնը եւ զօրակցութիւն յայտնեց Հ.Յ.Դ. Երիտասարդականին` մաղթելով ուժ եւ կամք, արդարութեան համար մղուող պայքարին մէջ:
Թուրքիոյ կառավարութեան ճանաչման եւ հատուցման կոչ ուղղելով` Արեւմտեան Սահարայի ընկերվար երիտասարդը ընդգծեց, որ Հայոց ցեղասպանութիւնը զուգորդուած է հայերու հայրենազրկումով` իրենց պապենական հողերէն եւ դժբախտաբար նոյնը տեղի կ՛ունենայ այսօր` աշխարհի տարբեր ժողովուրդներուն նկատմամբ:
Ուկանտացի ներկայացուցիչը, որ նաեւ Ընկերվարական երիտասարդներու միջազգային միութեան փոխնախագահն է, իր խօսքին մէջ շեշտեց 1915-ին Հայոց ցեղասպանութեան նկատմամբ Արեւմուտքի լռութեան վրայ. կոչ ուղղեց միասնաբար պայքարելու, որ մարդկութեան հանդէպ նման յանցագործութիւններ այլեւս տեղի չունենան:
Յատկապէս ուշագրաւ էր Գերմանիոյ Ընկերվարական կուսակցութեան երիտասարդականի ներկայացուցիչին ելոյթը: Ըստ անոր, Գերմանիան ոչ միայն պէտք է ընդունի Հայոց ցեղասպանութիւնը, որ արդէն իսկ ընդունած է, այլ նաեւ Թուրքիոյ հետ միասին կրէ պատասխանատուութեան իր բաժինը:socialist2

Այնուհետեւ պատուիրակները միաձայնութեամբ ընդունեցին Հ.Յ.Դ. Երիտասարդականին կողմԷ ներկայացուած բանաձեւը: Բանաձեւը իր տեսակին մէջ եզակի է այն առումով, որ միջազգային երիտասարդական-քաղաքական մակարդակի վրայ նման կշիռ եւ ընդգրկում ունեցող կազմակերպութիւնը Հայոց ցեղասպանութեան ճանաչման եւ դատապարտման զուգահեռ, թրքական կառավարութենէն կը պահանջէ անյապաղ ձեռնարկել միջոցառումներու` ցեղասպանութեան հետեւանքներու հատուցման համար:
Նշենք թէ «Հաւասար Աշխարհ Կարելի Է» կարգախօսով տեղի ունեցող երկօրեայ ժողովին կը մասնակցին աշխարհի 60 երկիրներու ընկերվարական կուսակցութիւններու երիտասարդական կառոյցներու 160 պատուիրակներ, ինչպէս նաեւ Հայաստանի, Արցախի եւ սփիւռքի Հ.Յ.Դ. երիտասարդական եւ ուսանողական միութիւնները ներկայացնող աւելի քան երկու տասնեակ երիտասարդներ:
Ժողովին բացման խօսքերը արտասանեցին Ընկերվար միջազգայնականի փոխնախագահ, Հ.Յ.Դ. Բիւրոյի նախկին անդամ Մարիօ Նալպանտեան, Ընկերվարական երիտասարդներու միջազգային միութեան համաշխարհային խորհուրդի նախագահ Ֆելիփէ Խելտերես Քարտա եւ Հ.Յ.Դ. երիտասարդականը ներկայացնող Կարապետ Շատոյեան, որ իր խօսքին մէջ նշեց, որ 2015 թուականը կը զուգադիպի Հայոց ցեղասպանութեան 100-ամեակին եւ շեշտեց, որ հայ երիտասարդութիւնը հայ ժողովուրդի իրաւունքներու հատուցման պայքարին համար նոր փուլ կը թեւակոխէ` փուլ մը, որուն ընթացքին մեր երիտասարդութիւնը զուգահեռաբար հետեւողական պիտի ըլլայ նաեւ մեր երկրի շարունակական զարգացման եւ հզօրացման գործին:
Աշխարհի մեծագոյն երիտասարդական կազմակերպութեան ընդհանուր ժողովը պիտի քննարկէ իր երկամեայ քաղաքական եւ նիւթաբարոյական գործունէութեան տեղեկագիրը: Ժողովը պիտի անդրադառնայ բնապահպանական, երիտասարդութեան աշխատանքին, անոնց կրթութեան, ինչպէս նաեւ մարդկային հիմնարար իրաւունքներու պահպանման գործին մէջ երիտասարդութեան դերակատարութեան առնչուող հիմնահարցերուն:
Մասնակիցներուն այցելեցին Ծիծեռնակաբերդ` Ցեղասպանութեան թանգարան հիմնարկ եւ ծաղկամատոյց` յարգանքի տուրք մատուցելու անմեղ զոհերու յիշատակին: Կատարուեցաւ այցելութիւն՝ Երեւանի տեսարժան վայրեր եւ թանգարաններ` հիւրերը Հայոց պատմութեան եւ մշակոյթին հաղորդակից դարձնելու համար:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles