ԸՆԿԵՐՎԱՐԱԿԱՆ ԵՐԻՏԱՍԱՐԴՆԵՐՈՒ ՄԻՋԱԶԳԱՅՆԱԿԱՆԻ ՓԱՌԱՏՕՆ

0 0
Read Time:1 Minute, 37 Second

p3 youth  ԵՐԵՒԱՆ.- Հ.Յ.Դ. Բիւրոյի Երիտասարդական գրասենեակը յատուկ հաղորդագրութեամբ մը կը տեղեկացնէ, որ Օգոստոս 20-26, 2014-ին, Մալթայի մէջ տեղի ունեցաւ Ընկերվարական երիտասարդներու միջազգային միութեան համաշխարհային փառատօնը: Փառատօնին մասնակցեցան աւելի քան հազար ներկայացուցիչ` աշխարհի 65 երկիրներէ: Բացման հանդիսութեան մասնակցեցան Մալթայի վարչապետ Ժոզեֆ Մուսքաթը (Աշխատաւորական կուսակցութիւն) եւ Եւրոպական խորհրդարանի ներկայացուցիչներ: Ելոյթով հանդէս եկան Ընկերվարական երիտասարդներու միջազգային միութեան նախագահը եւ ընդհանուր քարտուղարը: Հ.Յ.Դ. Երիտասարդականը փառատօնին մասնակցեցաւ երկու ներկայացուցիչով` Կարապետ Շատոյեան եւ Սարինէ Աբրահամեան: Մասնաւորապէս ընդգծելի էր անոնց ելոյթը Սեւծովեան շրջանի համագործակցութեան օրակարգով աշխատանոցին ընթացքին, ուր Հ.Յ.Դ. Երիտասարդականի ներկայացուցիչները ներկայացուցին Հայաստանի ներկայիս ընկերային, տնտեսական եւ քաղաքական վիճակը` նշելով Թուրքիոյ եւ Ատրպէյճանի կողմէ Հայաստանի շրջափակման հետեւանքները, Եւրասիական միութեան` Հայաստանի անդամակցելու որոշումին եւ Եւրոպայի կողմէ Հայաստանին չօժանդակելու հարցերը: Նաեւ, Հ.Յ.Դ. Երիտասարդականի ներկայացուցիչները մասնակցեցան փառատօնին ընթացքին կազմակերպուած քաղաքական բանավէճերուն եւ աշխատանոցներուն` արդի քաղաքական խնդիրներու վերաբերեալ, ուր ներկայացուցին իրենց տեսակէտները: Իրենց ելոյթին յաջորդ բաժինին մէջ անոնք անդրադարձան Հայաստանի, Արցախի եւ Ատրպէյճանի սահմանին վրայ վերջին շաբաթներուն ընթացքին ստեղծուած պատերազմական իրավիճակին, Ատրպէյճանի մէջ գերեվարուած Կարէն Պետրոսեանի սպանութեան, Ատրպէյճանի իշխանութեան ռազմատենչ յայտարարութիւններուն: Հ.Յ.Դ. Երիտասարդականի ներկայացուցիչները շեշտեցին, որ թէեւ Հայաստանը պատրաստ է պատերազմի, սակայն իրենք համոզուած են, որ պատերազմը լուծում չէ, եւ տագնապի լուծման միակ ուղին խաղաղ բանակցութիւններն են: Փառատօնին ընթացքին քաղաքական բանավէճերէն եւ աշխատանոցներէն բացի կազմակերպուած էին մարզական մրցումներ, շրջագայութիւն դէպի Մալթայի տեսարժան վայրեր եւ երկրին ընդհանուր ծանօթութիւն: Հ.Յ.Դ. Երիտասարդականի ներկայացուցիչները կապեր ստեղծեցին տարբեր երկիրներու ընկերվարական եւ ընկերվար-ժողովրդավարական երիտասարդական կազմակերպութիւններու ներկայացուցիչներուն հետ: Փակման հանդիսութեան ընթացքին հանդէս եկան Ընկերվարական երիտասարդներու միջազգային միութեան նախագահ Ֆելիփէ Խելտրեսը, ընդհանուր քարտուղար Էուին Ինչիրը եւ Մալթայի Ընկերվարական երիտասարդական կազմակերպութեան ատենապետ Ալեքս Սալիպան: Անոնք շնորհակալութիւնը յայտնեցին բոլոր մասնակիցներուն, որոնց շնորհիւ փառատօնը անցաւ յաջող եւ հաճելի մթնոլորտի մէջ: Միաժամանակ բոլորին յաջողութիւն մաղթեցին եւ վստահեցուցին, որ միասին` բոլորին ջանքերով կրնանք ունենալ աւելի արդար եւ ընկերվար աշխարհ: Ընկերվարական երիտասարդներու միջազգային միութիւնը Ընկերվար միջազգայնականին ուղեկից միութիւն է: Միութեան կ՛անդամակցին 143 ընկերվարական, ընկերվար-ժողովրդավարական, աշխատաւորական եւ ուսանողական միութիւններ հարիւր երկիրներէ: Հ.Յ.Դ. Երիտասարդականը Ընկերվարական երիտասարդներու միջազգային միութեան լիիրաւ անդամ է:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles