0
0
ԵՐԵՒԱՆ.- Բժիշկները սպիտակ հագուստներով բողոքի ցոյց կազմակերպեցին Յատուկ քննչական ծառայութեան դիմաց` ի պաշտպանութիւն «Իզմիրլեան» բժշկական կեդրոնի տնօրէն, «Հայաստան» դաշինքի ցուցակին մէջ ընդգրկուած բժիշկ փրոֆ. Արմէն Չարչեանի, որուն նկատմամբ դատարանը կալանքի որոշում տուած է:
Բժիշկները կրկին բաց նամակով հանդէս եկան, այս անգամ հասցէատէրը Յատուկ քննչական ծառայութեան պետ Սասուն Խաչատրեանն էր: Փրոֆ. Արմէն Չարչեան կը գտնուի հիւանդանոցը, 27 յունիսին անոր իրավիճակի կտրուկ վատթարացում արձանագրուած է:
539 բժիշկներ բաց նամակ յղած էին իշխանութիւններուն եւ հանրութեան, որպէսզի վերացուի փրոֆ. Արմէն Չարչեանի նկատմամբ կալանքը:
Բժիշկներէն մէկը յայտնեց, որ գրեթէ բոլորը մասնակցած են արցախեան 44-օրեայ պատերազմին եւ ինքն ու իր գործընկերներէն մէկն առաջին իսկ օրէն եղած են խրամատի մէջ:
«Հայաստան» դաշինքի առաջնորդներէն Վահէ Յակոբեան ըսաւ. «Չեմ հասկնար` ինչո՞ւ Չարչեանը: Չարչեանը մտաւորական է, վաստակաշատ բժիշկ, այսօր իրմէ շատ կեանքեր կախեալ են, թէ ինչո՞ւ այս քայլին կը դիմեն` ինծի համար անհասկնալի է, բայց քաղաքական առումով հասկնալի է, որ պետական համակարգը կ՛ուզէ քաղաքական ահաբեկչութիւն կատարել»:
«Անոնք կ՛ուզեն վախցնել մեր համակիրները եւ այն մարդիկը, որոնք մեզի ձայն տուած են», ըսաւ Վահէ Յակոբեան եւ պատասխանելով այն հարցումին, թէ արդեօք «Հայաստան» դաշինքի ղեկավարը պատրա՞ստ է բողոքի ցոյցերուն մասնակցելու, ան ըսաւ, եթէ անոր կարիքը ըլլայ, Ռոպերթ Քոչարեան կը միանայ եւ չի խուսափիր:
Հ.Յ.Դ. Հայաստանի Գերագոյն մարմինի անդամ, բժիշկ Տարօն Տօնոյեան իր խօսքին մէջ ըսաւ. «Այսօր այստեղ հաւաքուած ենք ոչ թէ անոնցմէ հայցելու ներողամտութիւն, մեծահոգութիւն, մենք այստեղ հաւաքուած ենք` պահանջելու արդարադատութիւն իրականացնել: Եթէ դուք արդարադատութիւն կ՛իրականացնէք, ապա ո՞ւր են ձեր մարզպետները, որոնք գիւղապետները կը կանչեն եւ կ՛ըսեն` դիմում գրեցէ՛ք եւ հեռացէ՛ք, ո՞ւր են ձեր նախարարներն ու փոխնախարարները, որոնք նոյնիսկ քաղաքացիական ծառայողները կը կանչեն եւ կ՛ըսեն` դիմում գրեցէ՛ք եւ հեռացէ՛ք: Կ՛ըսեն` տեղական ինքնակառավարման նոր ընտրութիւններուն մնացած է 2 ամիս, կ՛ըսեն` ո՛չ, հիմա պէտք է ընէք»:
