0
0
Ա.Ա.
Արցախահայութիւնը այս օրերուն կը պայքարի իր հայրենիքին համար։ Հարազատ բնօրրանին մէջ ապրելու եւ ազատ ու ինքնիշխան պետութեան մը հովանիին տակ արարելու արցախցիներուն վճռակամութիւնը ցոյց կու տայ, որ այս պատերազմը, որ կը մղուի Ատրպէյճանի բռնապետական իշխանութիւններուն դէմ, անպայման իր նպատակին պիտի ծառայէ եւ ի վերջոյ արցախահայութիւնը պիտի յաջողի թօթափել ատրպէյճանական լուծը։
Արցախահայութեան դէմ ցեղասպանութիւն գործադրելու մերօրեայ միջոցները, որոնք կը կիրարկուին ատրպէյճանական իշխանութիւններուն կողմէ, տարաբնոյթ են։ Շրջափակում՝ Լաչինի միջանցքին փակմամբ, ելեկտրականութեան հոսանքէ եւ բնական կազէ զրկում, նաեւ՝ հոգեբանական ահաւոր ճնշումներ,որոնց նորագոյնը Ստեփանակերտի բնակչութիւնը իբրեւ թէ տարհանելու այն կեղծ փաստաթուղթերն են, որոնք այս օրերուն կը հրապարակուին եւ ընկերային հաղորդակցութեան միջոցներով կը տարածուին ատրպէյճանական իշխանութիւններուն կողմէ։ Ամէնօրեայ դրութեամբ կատարուած ռազմաշունչ յայտարարութիւնները, սպառնալիքները եւ զգուշացումները եւս կ՛իյնան արցախահայութիւնը ահաբեկելու ատրպէյճանական պետական քաղաքականութեան ծիրին մէջ։
Այսօր աւելի քան երբեք ակնյայտ է, որ ատրպէյճանցիները շատ յստակ եւ բացայայտ քաղաքականութիւն կը վարեն Արցախը հայաթափելու համար։Ժողովուրդ մը, որ արդէն իսկ ապացուցած է, որ պիտի չընկրկի եւ ծունկի պիտի չգայ, նոյնիսկ եթէ ամբողջապէս զրկուի ելեկտրականութենէ, բնական կազէ, տարրական եւ կենսական ուտելիքէ, դեղօրայքէ եւ այն ամէն ինչէն, որոնք ժողովուրդի մը, այս պարագային՝ իր հայրենիքին մէջ ապրելու վճռակամութիւնը ցուցաբերող արցախցիներու ֆիզիքական գոյատեւման համար անհրաժեշտ են։
Արցախահայութեան դիմագրաւած վտանգները չէզոքացնելու եւ անոր բնական իրաւունքները ապահովելու եւ երաշխաւորելու գործը համայն հայութեան պարտաւորութիւնն է, որովհետեւ Արցախի անհետացմամբ է, որ ընթացք պիտի առնէ հայութիւնը հարուածելու թուրքեւատրպէյճանական ճակատին ծրագրին երկրորդ հանգրուանը, ուր թիրախը պիտի ըլլան Հայաստանը եւ հայաստանցիները, ապա Սփիւռքը եւ հուսկ ամբողջ հայութիւնը։
Արցախի դէմ կիրարկուող պետական ահաբեկչական ատրպէյճանական այս քաղաքականութեան դէմ արդիւնաւէտ պայքար մղելու համար առաջին հերթին խիստ կենսական է հայութեան բոլոր հատուածներուն մասնակցութեամբ ձեւաւորուած միացեալ ճակատ մը, որպէսզի դիւանագիտական- քաղաքական – առեւտրական – յարաբերական եւ միւս բոլոր մարզերուն մէջ գործող եւ ազդեցութիւն ունեցող հայկական ներուժը իր ամբողջական կարողականութեամբ գործի լծել՝ Ատրպէյճանի դէմ։ Աշխատանք մը, որուն համակարգման եւ ձեռնարկման կարեւոր առաքելութիւնը կ՛իյնայ Երեւանի իշխանութիւններուն ուսերուն՝ գործակցաբար հայ աւանդական եւ միւս բոլոր կուսակցութիւններուն, քաղաքական հոսանքներուն եւ եկեղեցիին։ Ներկայիս բնաւ ժամանակը չէ իրարու հասցէին ուղղել մեղադրանքներ։ Հիմա պահանջուածը միասնականութիւնն է, որ մեզ առաւել ուժեղ պիտի դարձնէ եւ մեր կատարելիք բոլոր աշխատանքներուն ճիշդ հունաւորում պիտի տայ։ Հայկական ճակատին միասնականութիւնը եւ համակարգուած աշխատանքը նաեւ կարեւոր պատասխան մը պիտի ըլլայ ամբողջ աշխարհին, թէ միայն դատարկ կոչերը ոչինչ կ՛իրագործեն, մինչ արցախցին զրկուած կը մնայ սնուելու, ուսանելու, բուժում ստանալու իր տարրական իրաւունքներէն, պարզապէս ընտրած է իր հողին վրայ եւ հայրենիքին մէջ ապրելու իրաւական ուղին։
