ԶՐՈՅՑ ԵՐԵՒԱՆԵԱՆ ՄԱՅԹԻ ՍՐՃԱՐԱՆԻՆ ՄԷՋ

0 0
Read Time:1 Minute, 36 Second

P14-15 I KAGHIAՄակար, Սեպտեմբեր 4, 2016,  Երեւան

Թոշակառուները արձակուրդի կը մեկնին երբ յուլիսականները եւ օգոստոսականները վերադարձած կ’ըլլան: Սեպտեմբերին գացինք Հայաստան, աւելի ճիշդ՝ Երեւան, զբօսաշրջիկներու պէս:
Կեդրոնականցին յաճախ կը յիշէ մեծ գրող մը, որ գրած էր մարգարէական խօսք մը, թէ «մի քաղաքով ինչ երկիր, դու միաւորիր ամբողջը»: Այսօր՝ միաքաղաք Հայաստանի Երեւանը:
Հայրենասէր զբօսաշրջիկներն ալ «երեւանասէր» են: Գորիս, Սիսիան, Տաթեւ, Հաղարծին, լուսանկարի համար են: «Հայրենաբնակներ» գիտեն Երեւանը:
Արմենակի եւ Էլպիսի իջեւանած հիւրանոցի առջեւի մայթին վրայ կանաչի մէջ շրջանակուած սրճարան մը կար: Յետ-միջօրէ էր, նստած կը զրուցէինք: Սուրճով եւ հայրենի սառնորակ «Ջերմուկ»ով դեռ յամեցող ամրան տօթին դէմ կը պայքարէինք:
Հոս սրճարանները գողտրիկ են, Ֆրանսայի Կապուտակ ծովեզերքին (Côte d’Azur) կը նմանին: Արմենակ լուացարան գնաց եւ վերադարձաւ դժգոհ: Կեդրոնակացնին կը տրտնջայ, թէեւ իր տրտունջները միշտ ալ արդար են:
– Սիրելիս, հոս ալ լուացարանները օժտած են ձեռք չորցնող ելեկտրական տաք հով արտադրող սարքով: Արդիականութիւն: Այդ հովը, հոս եւ այլուր, ո՞ր օդը կը փչէ: Փակ շրջանակի մէջ կան լուացարաններ, ուր մարդիկ իրարու կը յաջորդեն, օդին մէջ կը ձգեն մանրէներ, անոնցմով յագեցած օդը, ուժգին հով դարձած, մեր ձեռքերը կը հարուածէ զանոնք չորցնելու համար:
– Բնապահպանութիւն է, թուղթէ թաշկինակի խնայողութիւն,- յուշեցի:
– Բայց ո՞ւր կը մնայ տեւաբար յիշեցուող առողջապահութիւնը: Այդ սարքը մանրէ կը փոխադրէ մեր ձեռքերուն վրայ:
Այս գերարդիական մաքրասիրութեան զրոյցը կրնար երկար տեւել եթէ մեր կողքի սեղանին վրայ չյայտնուէին խումբ մը կիներ: Քչախօս Էլպիս մրմրթալով ըսաւ.
– Ինչե՜ր կ’ըսես, Արմենակ: Նայէ՛ քովդ եղողներուն, նոյն ուռած շրթներով եւ կուրծքերով, նոյն քիթերով եւ նոյն խարտեաշ մազերով: Ի՜նչ բնապահպանութեան: Առողջապահութեա՞ն մասին կը խօսիս: Յիշած գրողդ ըսած էր, որ «խանգարուած է աշխարհի կարգը»: Այդ «ռըթուշ» եղած կիներով ինչպիսի սերունդ պիտի գայ: Խանգարուած է բնութեան կարգը, կեանքով եկած տարբերութիւնը չ’ընդունուիր, եւ մարդիկ կ’ընտրեն ըլլալ այր կամ կին:
Քաղաքակրթական տագնապով չթթուեցնելու համար թոշակառուներու երեկոն, Մակարուհին Պուտտայի պէս ըսաւ.
– Կուշտ ձանձրացողներու քաղաքակրթութիւնն է ասիկա: Չարաչար գործածուած բնութիւնը իր վրէժը սկսած է լուծել: Աւերուած հակաբնական դարձած քաղաքակրթութիւնը յատակը տեսնելէ ետք պիտի վերականգնի:
– Եթէ վերականգնի,- յուսահատի շեշտով եզրակացուց Արմենակ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles