0
0
Սթրազպուրկ (ֆրանսա) .- Եւրոպայի Հայ Դատի Պրիւքսէլ (Պելճիքա) Գրասենեակը կը տեղեկացնէ թէ Եւրոպական հակացեղապաշտութեան եւ անհադուրժողականութեան յանձնաժողովը (European Commission against Racism and Intolerance), Մայիս 31-ին, Ատրպէյճանի մասին զեկոյց մը հրապարակած է, մտահոգութիւն յայտնելով երկրին մէջ տիրող ցեղապաշտութեան մասին:
Պատուիրակութիւնը հանդիպումներ ունեցած է Պաքուի մէջ համապատասխան նախարարութիւններու, պետական պաշտօնեաներու, մարդկային իրաւանց պաշտպանութեան հասարակական կազմակերպութիւններու եւ փոքրամասնութեանց ներկայացուցիչներու հետ եւ հասած համապատասխան եզրակացութիւններու:
Նշենք, որ Մայիս 12¬ին, Եւրոպական խորհրդարանի որդեգրած բանաձեւէն ետք` Ատրպէյճանը դատապարտող երկրորդ պատգամն է, որ կը տրուի Եւրոպայէն:
Յատուկ կերպով մատնանշուած են հայութեան մասին կատարուած հետեւողական եւ յարձակողական ցեխարձակումները եւ յիշուած` պաշտօնական Պաքուի մշտական բացասական կոչերը` Հայաստանի դէմ, որոնք լրատուամիջոցներու եւ քաղաքական բարձրաստիճան պաշտօնեաներու կողմէ կը հրամցուին ժողովուրդին, վառ պահելով հայոց ու Հայաստանի հանրապետութեան դէմ ատելութիւնն ու խտրականութիւնը:
Երկրի տարածքին ապրող խառն ամուսնութեան արդիւնք, անձեր` ընդհանրապէս իրենց ազերի պատկանելիութեան կը կառչին, զոհ չերթալու համար պետական ու հասարակական խտրականութեան:
Եւրոպայի խորհուրդը յանձնարարութիւններ կատարած է Ատրպէյճանին, որ միջոցներ ձեռք առնէ պետութեան մակարդակի վրայ` դէմ դնելու եւ դադրեցնելու ցեղապաշտութիւնը, խտրականութիւնը, այլամերժութիւնը, հակասեմականութիւնն ու անհանդուրժողականութիւնը:
Յանձնախումբը իր զարմանքը յայտնած է Ատրպէյճանի տուած հակասական տեղեկութիւններուն, յատկապէս հայութեան թիւերուն շուրջ: Հոն նշուած է թէ 700 հայեր միայն կ՛ապրին Ատրպէյճանի տարածքին, Արցախի տարածքներէն դուրս, որ կտրուկ կերպով կը հակասէ նախապէս տրուած թիւերուն:
Վերջապէս, ակնարկներ կան Ատրպէյճանի մէջ գտնուող մնացեալ փոքրամասնութիւններուն եւ կրօնական համայնքներուն: Յատուկ յանձնարարութիւններ փոխանցուած են Պաքուի ղեկավարութեան` լուծելու անոնց հետ առնչուած հարցերը` վերջ տալով ցեղապաշտ եւ խտրական քաղաքականութեան:
