0
0
ՊՐԻՒՔՍԷԼ.- Յունուար 9-ին, Եւրոպական Միութեան խորհրդարանի շէնքէն ներս, պաշտօնապէս յայտարարուեցաւ Եւրոպական խորհրդարան – Հայաստան բարեկամական խումբի ստեղծումը, նախագահութեամբ Կիպրոսի Եւրոպայի Ժողովրդական Կուսակցութեան անդամ` տոքթ. Էլենի Թէոխարուսի, եւ ներկայութեամբ Հ.Հ. Ազգային ժողովի 25-անդամ պատուիրակութեան մը, նախագահ Յովիկ Աբրահամեանի գլխաւորութեամբ:
Թէոխարուսի ծանօթ է իր յանդուգն ընկերային ու մարդասիրական հարուստ գործունէութեամբ: Ան Արցախ գտնուած է պատերազմի օրերուն, խնամելով վիրաւոր զինուորներ ու քաղաքացիներ, աշխատելով ծանր պայմաններու տակ: Պատուուած է Լեռնային Ղարաբաղի պատուոյ Ոսկեայ մետալով:
Բարեկամութեան խումբի ստեղծման ներկայ էր նաեւ Եւրոմիութեան կրթութեան, մշակոյթի, բազմալեզուականութեան եւ երիտասարդական հարցերու յանձնակատար տիկին Անտրուլա Վասիլիու: Բացումի պաշտօնական խօսքերուն յաջորդեց հիւրասիրութիւն մը, ներկայ Պելճիքահայ կազմակերպութիւններու ներկայացուցիչներուն եւ անձնաւորութիւններուն համար: Եւրոպական խորհրդարան-Հայաստան բարեկամութեան խումբի ստեղծման գաղափարը յղացաւ Եւրոպայի Հ.Յ.Դ Հայ Դատի գրասենեակը, Եւրոմիութեան մօտ ՀՀ մշտական ներկայացուցչութեան հետ սերտ համագործակցութեամբ եւ տոքթ. Էլենի Թէոխարուսի անվերապահ համաձայնութեամբ` ստանձնելու խումբի նախագահութիւնը, յաջողութեան հասաւ սոյն նախաձեռնութիւնը: Եւրոխորհրդարան-Հայաստան բարեկամութեան խումբի նախագահ Էլենի Թէոխարուս իր խօսքին մէջ նշեց, թէ ան մեծ պատուով ստանձնած է սոյն պաշտօնը, որ իրար աւելի մօտ պիտի բերէ Եւրոմիութիւնն ու Հայաստանը, եւ թէ այս խումբը Հայաստանի դէպի Եւրոմիութիւն ճամբան աւելի լայն պիտի բանայ: Ան շարունակելով ըսաւ, թէ հայ ժողովուրդը անցեալին եղած է ցեղասպանութեան զոհ Թուրքիոյ կողմէ, ճնշուած` Խորհրդային կարգերու կողմէ եւ ինքզինք ազատած ազերի լուծէն` Արցախի անկախութեամբ: Թէոխարուս իր խօսքը աւարտեց ըսելով, թէ հայկական մշակոյթով, երաժշտութեամբ, արուեստով ու բանաստեղծութեամբ եւ Մասիսներու կախարդական ներկայութեամբ մենք հոգեպէս միա՛յն կը հարստանանք: Ապա, Հ.Հ. Ազգային ժողովի նախագահ Յովիկ Աբրահամեան, իր խօսքով բարձր գնահատեց այս խումբին կազմութիւնը, որ աւելի պիտի խթանէ Եւրոմիութիւն-Հայաստան կապերը, որոնք ներկայիս արդէն կը գտնուին ամենէն բարձր մակարդակի վրայ:
Հ.Հ. Ազգային ժողովի նախագահը նշեց Հայաստանի կառուցողական մասնակցութիւնը Եւրոպական միութեան զանազան ծրագիրներուն, ինչպիսին են Արեւելեան հարեւանութիւնը, Եւրոնեսթի խորհըրդարանական վեհաժողովը, ներկայիս ընթացքի մէջ եղող եւ գրեթէ իր աւարտին հասնելիք Եւորմիութիւն-Հայաստան համագործակցութեան համաձայնագիրը եւ խոր ու համապարփակ առեւտրական ազատ գօտիի համաձայնագիրն ու վիզաներու ազատ համակարգը: Յովիկ Աբրահամեան յատկապէս նշեց Ատրպէյճանի ապատեղեկատուութիւնը Եւրոմիութեան շրջանակներէն ներս, եւ թէ բա-րեկամութեան խումբի անդամները իրենց կարելին կ՛ընեն ու պիտի ընեն բացայայտելու իրականութիւնը որպէսզի ճիշդ կողմնորոշուի եւրոխորհրդարանը: Եւրոպայի Հայ Դատի գրասենեակի նախագահ Գասպար Կարապետեան ողջունելով խումբի կազմութիւնը, իր գոհունակութիւնը յայտնեց, որ երեսունէ աւելի եւրոերեսփոխաններ ընդունած են մաս կազմել բարեկամութեան այս խումբին, որոնց կարեւոր մէկ մասը ներկայ էր եւ ստորագրութեամբ վաւերացուց իր մասնակցութիւնը, իսկ պիտի շարունակուի աշխատանքը ապահովելու համար այլ եւրոերեսփոխաններու անդամակցութիւնը: Գասպար Կարապետեան բարձր գնատահատելով Էլենի Թէոխարուս – Հ.Հ. դեսպանատուն – Եւրոպայի Հայ Դատի Գրասենեակ համագործակցութիւնը, իր վստահութիւնը յայտնեց, թէ այս խումբը պիտի ունենայ յաջող աշխատանքային ծրագիր եւ գործունէութիւն, ա՛լ աւելի մօտ բերելով Հայաստանն ու Եւրոպական Միութիւնը` խորհրդարաններու ճամբով: “Ծրագրի մէջ է Եւրոպական խորհրդարանի անդամներու այցը Հայաստան եւ Արցախ“, ըսաւ Կարապետեան:
