0
0
ԵՐԵՒԱՆ.- Հայաստանի Ազգային ժողովի պատգամաւոր եւ Հ.Յ.Դ. Բիւրոյի անդամ Վահան Յովհաննիսեան, վերջերս “Ա1+“-ի պատկերասփիւռի կայանին հետ հարցազրոյցի մը ընթացքին յայտնեց, թէ Երեւանի աւագանիի ընտրութիւններուն մասնակցելու համար, ոչ իշխանական ուժերը պէտք է միաւորուին, եւ ատիկա ոչ միայն կարելի է, այլեւ անհրաժեշտ: Յովհաննիսեան վստահութիւն յայտնեց, որ միաւորման համար նախադրեալները ստեղծուած են, սակայն քաղաքական դաւադրութիւնը կրնայ վերացնել նաեւ այս կարելիութիւնը:
Հ.Յ.Դ. Բիւրոյի անդամը նշեց, որ առաջնահերթ հարցը պիտի ըլլայ այն, թէ ով պիտի ըլլայ առաջին անունը: Ան աւելցուց, որ քաղաքապետի ընտրութիւնը կը նմանի ոչ թէ խորհրդարանական, այլ նախագահական ընտրութիւններուն: Յովհաննիսեան յայտնեց, որ իշխանութեան նկատմամբ դիրքորոշման աստիճանները կրնան տարբեր ըլլալ, բայց այս հարցը շատ կարեւոր է, որովհետեւ ատիկա այն դաշտն է, ուր իսկապէս կարելի է միաւորուիլ. այստեղ քաղաքական-գաղափարական տարակարծութիւններու հարց չկայ: “Երեւանը իբրեւ քաղաք, կրնայ կարգի բերել ե՛ւ ազատականը, ե՛ւ ընկերվարական-դաշնակցականը, ե՛ւ անկուսակցականը: Կարեւորը ազնիւ ըլլան, որ չգողնան, եւ պինդ ըլլան, որ սակաւապետերու ճնշման դիմանան“, յայտնեց ան: Անդրադառնալով իշխանութեան առաջարկած զիջման` Յովհաննիսեան նշեց, որ ինք միանշանակ վստահ է, որ պէտք է համաձայնիլ սահմանադրական բարեփոխումներու յանձնախումբ ստեղծելու առաջարկին, քանի որ “Ատիկա զիջում մըն է, որ ցոյց կու տայ, որ յաղթանակը այս հանգրուանին իշխանութիւնը ընդունած է: Ուրեմն այդ յաջողութենէն չօգտուիլը քու սխալդ կ՛ըլլայ: Այլ հարց է, որ եթէ շատ կամ քիչ զիջած են, բայց ինչ որ կարելի է ձեռք ձգել, պէտք է ձեռք ձգել, որովհետեւ ատիկա կարելիութիւն կու տայ հետագայի նոր յաջողութեան համար“, եզրակացուց ան:
