0
0
Հոծ բազմութիւն մը ներկայացած էր Չարլի եւ Հռիփ Մինասեաններու բնակարանը (Լեքսինկթըն, Մասաչուսէց), ուր տեղի ունեցաւ “Երազարթ“ի գեղարուեստական ընթրիք-գեղարուեստական ձեռնարկը:
“Երազարթ“ հիմնարկի անունով խօսք առաւ պատասխանատու Նիքոլ Հաժժար, որ յայտնեց թէ տիարք Նուպար Աֆէյեանի եւ Ռաֆֆի Ֆըսթըքճեանի կողմէ հիմնուած այս հիմնարկը 2006-էն ի վեր կը գործէ, քաջալերելով երիտասարդ երաժիշտներ:
Հաժժար յայտնեց թէ, այս տարուայ ընթացքին, կարելի եղած է 12 հազար տոլար ապահովել եւ տրամադրել Կապանի Երաժշտանոցին: Նաեւ, հիմնարկը յաջողած է ապահովել աւագասրինգ, Երեւանի “Սպենդիարեան“ եւ “Չայքովսքի“ երաժշտանոցներուն: Կարելի եղած է եօթ հազար տոլարի գումար մը ապահովել եւ տրամադրել երիտասարդ արուեստագէտներու, որոնք յաւելեալ մասնագիտութիւններու պիտի հետեւին:
Ընթրիքէն ետք, տեղի ունեցաւ յատուկ գեղարուեստական յայտագիր: Ելոյթ ունեցան դաշնակահար Նարա Աւետիսեան (քսան տարեկան) եւ թաւջութակահար Վարդան Գասպարեան (23 տարեկան), որոնք նուագեցին գործեր` Շոսթաքովիչէն, Ռախմանինովէն, Պախէն, Պապաճանեանէն եւ Կոմիտասէն եւ հմայեցին ներկաները:
Նարա Աւետիսեան, որ մասնակցած էր 2007-ի “Երազարթ“ի ելոյթներուն, այժմ կը շարունակէ իր մասնագիտութիւնը` Քլիվլէնտի երաժշտանոցէն ներս: Իսկ Վարդան Գասպարեան կը մասնագիտանայ Լոս Անճելըսի “Քոլպըրն“ երաժշտանոցէն ներս:
Ելոյթէն գերտպաւորուած, ներկայ ընտրանին կատարեց նուիրատուութիւններ: Կարելի եղաւ ապահովել 18 հազար տոլար:
“Երազարթ“ի մասին յաւելեալ տեղեկութիւններու համար, այցելել.- www.yerazart.org.
