«Դիմադրութիւն» Շարժումը Յայտարարեց Իր Մարտավարութեան Փոփոխութիւնը

0 0
Read Time:1 Minute, 44 Second


ԵՐԵՒԱՆ.- Երեքշաբթի, Յունիս 14-ին, Ֆրանսայի հրապարակին վրայ տեղի ունեցած «Դիմադրութիւն» շարժման հանրահաւաքին, Հ.Յ.Դ. Հայաստանի Գերագոյն մարմինի ներկայացուցիչ Իշխան Սաղաթէլեան յայտարարեց, որ ընդդիմութիւնը պիտի վերցնէ Ֆրանսայի հրապարակի վրանները, սակայն այս որոշումը ոչ մէկ ձեւով կը նշանակէ, որ պայքարը կանգ պիտի առնէ: Ան շեշտեց, որ իրենց պայքարը դադար չունի, այնքան ատեն որ նախապէս բարձրացուած իրենց տարբեր հարցերուն ոչ մէկ լուծում տրուած է: «Նպատակը նոյնն է` կանխել Արցախի հայաթափումը եւ Հայաստանի թրքացումը, չէզոքացնել Հայաստանի ինքնիշխանութեան սպառնացող վտանգները, իսկ ատոր հասնելու համար պէտք է հեռացնել այս չարիքի իշխանութիւնը, ձեւաւորել ազգային իշխանութիւն, որ կը կասեցնէ պետականութեան կործանման այս ընթացքը, կ՛ապահովէ երկրի սահմաններուն անձեռնմխելիութիւնը, տարածքային ամբողջականութիւնը, կը հաստատէ արժանապատիւ խաղաղութիւն, պետականութիւնը կը վերադարձնէ ժողովուրդին, Հայաստանը կը դարձնէ արժանապատիւ եւ բարեկեցիկ երկիր», յայտնեց ան` շեշտելով, որ իրենց նպատակն է ստեղծել պայմաններ, որպէսզի կարելի ըլլայ կանխել պարտուողական նոր պայմանագիրի ընդունումը, ինչպէս նաեւ հասնիլ Նիկոլ Փաշինեանի հեռացման` հրաժարականի կամ պաշտօնանկութեան միջոցով:
Սաղաթէլեան յայտնեց, որ իշխանութեան իր աթոռին կառչած մնալու իրողութենէն մեկնած, արդէն հիմա կանգնած են մարտավարութեան փոփոխութեան անհրաժեշտութեան առաջ, ընդդիմութեան համար անհրաժեշտ է ստեղծուած նոր իրավիճակին համապատասխան մարտավարութիւն, որ կարելիութիւն պիտի տայ հասնիլ իր նպատակին։
Խօսելով «Դիմադրութիւն»շարժումին բացթողումներուն մասին՝ Սաղաթէլեան յայտնեց, որ Փաշինեանը չընդունող եւ մերժող մարդոց թիւը շատ աւելի մեծ է, քան հրապարակին վրայ գտնուողներունը։ Երկրորդ՝ դեռ կան մարդիկ, որոնք կը կարծեն, թէ ասիկա պայքար է իշխանութեան համար, պայքար է նախկինի վերադարձի համար, ինչ որ կը մղէ մտածելու, որ կարելի չէ եղած երկրին սպառնացող վտանգները յստակ բացատրել քաղաքացիներուն։ Ան խօսեցաւ նաեւ կազմակերպական բնոյթի հարցերուն մասին, որոնց լուծում տալու գծով աշխատանք պիտի տարուի։
«Ես հանրահաւաքներէն մէկուն ընթացքին ըսած էի, որ այս նիւթով աշխուժ քննարկումներու սկսած ենք շարժման մաս կազմող ուժերուն, անհատներուն հետ: Շարժումը դադար պիտի առնէ միայն այն օրը, երբ ընդհանուր նպատակին հասած պիտի ըլլանք: Այսինքն` պիտի կանխենք Հայաստանի նոր պարտութիւնը, յանձնուողականութիւնը եւ պիտի հեռացնենք օրուան իշխանութիւնը: Փողոցային պայքարը, շարժումը դադրեցնելու, հանգստանալու որեւէ այլ տարբերակ շարժումը սկսելու օրուընէ ետք չենք քննարկած: Ստեղծուած իրավիճակը, բազմաթիւ հանգամանքները, ձեռքբերումները եւ բացթողումները գնահատելով` շարժումը պիտի տանինք յառաջ. փողոցային պայքարը երբեք պիտի չդադրի, բայց պայքարին մէջ փոփոխութիւններ պիտի ըլլան», ըսաւ Իշխան Սաղաթէլեան եզրակացնելով, թէ շաբաթական դրութեամբ պիտի կատարուին փողոցային ցոյցեր, մասնագիտական քննարկումներ ու հանդիպումներ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles