0
0
ԵՐԵՒԱՆ․- Նոյեմբեր 27-ին «Արամ Մանուկեան» երիտասարդական կեդրոնին մէջ հանդիսաւոր ձեռնարկով ամփոփուեցան «Դէպի Սիւնիք» ծրագիրի շրջագիծին մէջ իրականացուող ուսումնասիրութեան մրցումին արդիւնքները եւ յաղթողներուն յանձնուեցան խոստացուած կրթաթոշակները:
Հ․Յ․Դ․ Բիւրոյի Երիտասարդական գրասենեակի եւ «Նիկոլ Աղբալեան» ուսանողական միութեան կազմակերպած Սիւնիքի հիմնախնդիրներու ուսումնասիրութեան նուիրուած մրցումին մասնակցած էին Հայաստանէն, Սուրիայէն, Միացեալ Նահանգներէն եւ Իրանէն հայ ուսանողներ:
Ընտրուած էին հետեւեալ երկու աշխատութիւնները.
Գագիկ Եկմալեան (Հայաստան)․- «Սիւնիքի աշխարհաքաղաքական տեղն ու դերը փանթուրանական ծրագրի իրագործումը կասեցնելու գործընթացին մէջ» խորագիրով: Ան Երեւանի պետական համալսարանի Միջազգային յարաբերութիւններ բաժանմունքի 4-րդ տարուան ուսանող է:
Շողակաթ Դեւրիկեան (Հայաստան)․- «Սիւնիքի պատմութիւնը եւ նկարները Մխիթարեաններու 18-19-րդ դարերու հրատարակութիւններուն մէջ» խորագիրով: Ան Երեւանի պետական համալսարանի Պատմութեան բաժանմունքի, Հայ արուեստի պատմութեան եւ տեսութեան ամպիոնի մագիստրոս է:
Հ․Յ․Դ․ «Նիկոլ Աղբալեան» ուսանողական միութեան ներկայացուցիչ Հայկազ Յարութիւնեան իր խօսքին մէջ նշեց Սիւնիքի կարեւորութիւնը աշխարհաքաղաքական զարգացումներու ծիրին մէջ` աւելցնելով, որ նման նախաձեռնութիւնները միտուած են երիտասարդութեան շրջանակին մէջ մեծցնելու հետաքրքրուածութիւնը Սիւնիքի, եւ անոր շուրջ ծառացող խնդիրներու վերաբերեալ` վստահեցնելով, որ շարունակական բնոյթ պիտի կրեն:
Ելոյթով հանդէս եկաւ նաեւ մրցութային յանձնախումբի կազմէն թրքագէտ Մելինէ Անումեան` յատուկ մատնանշելով, որ նման հարուստ գիտական աշխատութիւնները էական նշանակութիւն ունին պատմական եւ մշակութային ժառանգութեան պահպանման գործին մէջ:
Հ․Յ․Դ․ Բիւրոյի Երիտասարդական գրասենեակի պատասխանատու Արշակ Մեսրոպեանը, ամփոփելով միջոցառումը, ընդգծեց համազգային համախմբման կարեւորութիւնը, որուն հիմքը պէտք է ըլլայ Սիւնիքին սպառնացող ժամանակակից մարտահրաւէրներն ու վտանգները դիմագրաւելու տեսլականը:
