Դերասան Եւ Բեմադրիչ Վարուժան Խտըշեանի Հրաժեշտը

0 0
Read Time:1 Minute, 57 Second

Varoujan-Khedeshian

ՊԷՅՐՈՒԹ.- Երկուշաբթի, Դեկտեմբեր 28-ին, արուեստի աշխարհը կորսնցուց հայ ժողովուրդի արժանաւոր զաւակներէն, բազմավաստակ դերասան եւ բեմադրիչ Վարուժան Խտըշեանը:
Ծնած է 1937-ին, Ալէյ (Լիբանան), ան 16 տարեկանին սկսած էր թատերական առաջին քայլերը Ժորժ Սարգիսեանի հետ:
1960-ին մեկնած Լոնտոն, ան հետեւած եւ աւարտած է Լոնտոնի «Վէպըր Տուկլաս» հիմնարկը:
1965-ին վերադարձած Լիբանան եւ մաս կազմած Համազգայինի Պուրճ Համուտի մասնաճիւղի «Լեւոն Շանթ» թատերախումբին, ան երկու տարի ետք հիմնած է «Թատրոն 67» թատերախումբը: Տարիներու ընթացքին «Թատրոն 67» եւ Համազգային «Գասպար Իփէկեան» թատերախումբին հետ ներկայացուցած է «Սալեմի վհուկները», «Գինը», «Կամուրջէն Դիտուած», «Բոլոր Զաւակներս», «Երկրորդ պողոտայի բանտարկեալը», «Հին Աստուածներ», «Հանրային Պարտէզի Մէջ Բոպիկ», «Մեծ վարպետ Սոլենս», «Վենետիկի վաճառականը», «Շեփորդ Հնչեցուր», «Մարա Սատ», «Վերակացուն», «Վենետիկեան երկուակներ», «Շերի նուար», «Բլրեցի Եփէն», «Ալաֆրանկա», «Հայաստանի Լեռներուն Սրնգահարը», «Արեւելեան Ատամնաբուժը» եւ շարք մը այլ ներկայացումներ: Խտըշեան 1979-էն 1987-ին Հայաստանի մէջ բեմադրած է թատերական 5 ներկայացումներ եւ 1987-ին արժանացած «Պետրոս Ադամեան» շքանշանին; Ան Խորհրդային ժամանակաշրջանին առաջին սփիւռքահայն էր, որ այս շքանշանը կը ստանար: Խտըշեան անգլերէնէ հայերէնի թարգմանած է 22 թատերական կտորներ:
1988-ին, Համազգայինի 60-ամեակին առիթով, Համազգայինի Կեդրոնական Վարչութիւնը եւ Լիբանանի Շրջանային Վարչութիւնը դիմեցին Վարուժան Խտըշեանին, որպէսզի 60ամեակի առիթով բեմադրէ թատերական վաւերական մեծ ու բազմամարդ գործ մը:
«Հին Աստուածներ»ու բեմադրութիւնը, որ մեծ արձագանգ ունեցաւ օրին, ազդանշան եղաւ Վարուժան Խտըշեանի հետ գործակցութեան նոր ժամանակաշրջանի մը: Վարուժան Խտըշեան, որ իր նախնական թատերական փորձերը սկսած էր «Գասպար Իփէկեան» թատերախումբին մէջ եւ ամբողջ 30 տարի անդամ էր խումբին, ամէնէն յարմար անձն էր գործի գլուխ անցնելու այն թատերախումբին, որմէ ծնունդ առած էր:
Վարուժան Խտըշեան շուրջ 15 տարի վարեց այդ պատասխանատու գործը՝ բեմադրելով հայ եւ օտար բազմաթիւ հեղինակներու գործեր, ինչպէս՝ «Հին Աստուածներ», «Կայսրը», «Երկնքի Ճամբով», «Մինչեւ Ո՞ւր»…: Վարուժան Խտըշեանի բեմադրութեամբ օտար հեղինակներէ ներկայացուած գործերէն յատկանշական էր «Գինը» թատերախաղը, ուր բացառիկ խաղարկութեամբ առաջին անգամ ըլլալով լիբանանահայ բեմ կը բարձրանային հայրենի արուեստագէտներ Սօս Սարգսեան, Վիգէն Ստեփանեան եւ ուրիշներ:
Վարուժան Խտըշեան մասնագիտական իր պատրաստութեամբ յաջողեցաւ աւանդականը նորին ընդելուզել: Ան թարմութիւն մը բերաւ Համազգայինի թատերական կեանքին եւ արժանացաւ բազմաթիւ շքանշաններու:
2000-ին Մեծի Տանն Կիլիկիոյ Արամ Ա. կաթողիկոսի ձեռամբ, ան պարգեւատրուեցաւ «Ս. Մեսրոպ Մաշտոց» շքանշանով: Նոյն տարին պարգեւատրուեցաւ նաեւ Համազգայինի Կեդրոնական վարչութեան կողմէ` Համազգայինի շքանշանով: 2008-ին իբրեւ պարգեւատրում կը ստանայ Հայաստանի Հանրապետութեան մշակոյթի նախարարութենէն ոսկի մետալ: Ամենայն Հայոց Գարեգին Բ. կաթողիկոսին ձեռամբ կը պարգեւատրուի Ս. Սահակ Ս. Մեսրոպ շքանշանով:

Համազգայինի Կեդրոնական վարչութիւնը կը
գուժէ Համազգայինի «Գասպար Իփէկեան» թատերախումբի վաստակաւոր դերասան ու բեմադրիչ


khedeshian2                                                                                                         ՎԱՐՈՒԺԱՆ ԽՏԸՇԵԱՆի

մահը, որ պատահեցաւ Երկուշաբթի, Դեկտեմբեր 28,2015-ի առաւօտուն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles