ԴԱՐՁԵԱԼ ՔԱՐՏԱՇԵԱՆՆԵՐՈՒՆ ՄԱՍԻՆ (ՅՈՒՍԱՆՔ ՎԵՐՋԻՆ ԱՆԳԱՄ)

0 0
Read Time:4 Minute, 7 Second

kardashians-armenia-02

 

ԱՆԻ ՓԱՆՈՍԵԱՆ ՄՈՒՐԱՏԵԱՆ

ՀԱՅՐԵՆԻՔ

Ապրիլ 15, 2015

 

Զիս այնքան չի հետաքրքրեր այն իրողութիւնը, թէ Քիմ եւ Քլոուի Քարտաշեանները «Հայոց Ցեղասպանութիւն» բառերը տարածեցին իրենց Հայաստան այցելութեամբ, թէ կեանքերնուն մէջ Հայաստանի անունը չլսած մարդիկ, ինչպէս նաեւ քանի մը տասնեակ միջազգային թերթեր եւ լրատուամիջոցներ, հետաքրքրուեցան Հայաստանով ու գրեցին անոր մասին։  Այս բոլորը՝ շատ բարի։ kardashian-armenia

Ինծի համար հետաքրքրականը այն է, թէ ինչո՞ւ այս աղջիկները ուզեցին Հայաստան այցելել։ Ամերիկայի, ինչո՞ւ չէ նոյնիսկ աշխարհի, ամէնէն հանրածանօթ այս ընտանիքի անդամները յանկարծ որոշեցին պեղել իրենց արմատները։ Թէ ի՞նչն է պատճառը իրենց հանրայայտ դառնալուն, առեղծուած մըն է։ Շատեր կ՚ատեն զիրենք, շատեր չեն հանդուրժեր իրենց մակերեսայնութեան, եսակեդրոնութեան։ Մարդիկ կը զարմանան թէ ինչպէ՞ս յաջողեցան այսքան հանրայայտ դառնալ առանց որեւէ տաղանդ մը ունենալու, առանց օգուտ մը բերելու մարդկութեան։ Եթէ ըսենք գեղեցկութիւնը կամ գրաւչութիւնն է պատճառը, իրենցմէ գեղեցիկներն ալ կան վստահ։ Եթէ ըսենք իրենց հօր հարստութիւնը կամ վայելած վարկը որպէս նշանաւոր փաստաբան օգնեց իրենց, դարձեալ բաւարար չէ։ Թէեւ եթէ հայրը տակաւին ողջ ըլլար, պիտի նախանձէր աղջիկներուն վարկին ու հարստութեան։ Քիչեր կը խոստովանին թէ կը հետեւին իրենց, մինչդեռ ընկերային համացանցերու վրայ իրենց հետեւորդներուն թիւը կ՚անցնի յիսուն միլիոնը։ Ոչ մէկը կը խոստովանի թէ կը հետեւի իրենց յայտագիրին, մինչդեռ ան Ամերիկայի ամէնաերկար տեւած reality showն է։ Զիրենք սիրես կամ ատես, իրենց անունն ու լուրերը ամէն տեղ են, օդին մէջ։  Kardashians-in-Armenia

Իմ կարծիքովս, այս խնդրահարոյց ընտանիքին առեղծուածը կը կայանայ նոյնինքն ընտանիքին մէջ։ Մինչ օրըստօրէ Ամերիկայի մէջ դասական ընտանիքը կը կորսնցնէ իր արժէքը, մարդիկ ականատես կը դառնան ընտանեկան արժէքներու բռնաբարման, անհրաժեշտ չեն նկատեր ընտանիքը զաւակներու դաստիարակութեան համար, Քարտաշեանները եկան փաստելու թէ միասնակամ ընտանիք մը ինչքա՛ն ուժ կրնայ ներկայացնել։ Պատկերացուցէք մէյ մը, հինգ չափահաս աղջիկներ, որոնցմէ երկուքը կէս քոյրեր են միւսներուն, միայն մօր կողմէ, որոնցմէ ոմանք աւելի գեղեցիկ ու ճանչցուած են քան միւսները, միասին ապրին, միասին ուտեն-խմեն, միասին քամերաներուն դիմաց դիմագրաւեն իրենց հարցերը, միասին բաժնեն իրենց հարիւրաւոր միլիոնները։ Այս մեծ, աւանդական ընտանիքին անդամները, իրենց ոչ շատ աւանդական ապրելակերպով, միշտ զիրար բռնած են բոլոր բամբասանքներուն եւ գայթակղութիւններուն դիմաց, որոնք կրնային հազար կտորի բաժնել ուրիշ ընտանիք մը, նոյնիսկ սովորական ընտանիք մը։

Ընտանիքին կեդրոնական դէմքը անկասկած որ Քիմն է։ Զարմանալի առինքնութիւն ունեցող այս աղջկան մասին կիներ կը սիրեն ըսել թէ իր գեղեցկութիւնը կեղծ է, իր նշանաւոր ծալքերուն ան հասած է գեղեցկագիտական գործողութիւններով, պաստառի մը պէս շպարուելով գիշեր ցերեկ։ Իսկ տղամարդոց համար այս ամբողջը անիմաստ մանրամասնութիւն մըն է, ինչ տարբերութիւն կեղծ է թէ իրաւ։ Երբ երկու տարի առաջ Քիմը մայրացաւ, մարդիկ յուսացին որ այդ մէկը պատճառ ըլլայ որ այս եսակեդրոն կինը փոխուի։ Զաւակ ունենալը պարզապէս աւելի ուշադրութեան առարկայ դարձուց զինք։ Զինք ամենաանպատկառ անուններով կանչող մարդիկ (յաճախ արդարացիօրէն) կոչ ուղղեցին իրեն որ զգաստանայ։ Այս բոլորին որպէս պատասխան, Քիմը հրապարակ իջեցուց նոր նկար մը։ Մերկ։ Բոլորովին։ Այս ծայրայեղութեան իր քոյրերէն ոչ մէկը գացած էր։  Kardashian-Gyumri-13

Ամերիկայի մէջ երբ մէկու մը ըսես թէ հայ եմ, պատրաստ պէտք է ըլլաս այս պատասխանին «Օ՜, հայ, Քարտաշեաններո՞ւն պէս։ Բոլո՞ր հայ կիները իրենց պէս են»։ Եւ անոնց աչքերը կ՚ոլորուին վեր ու վար, առջեւ ետեւ, փորձելով նմանութիւններ գտնել։

Այս նկարներէն ետք պատուախնդիր հայ կանայք որոշեցին բոլորովին իրենց կապերը խզել Քարտաշեաններուն հետ, յայտարարելով որ իրենք ոչ մէկ ազգակցութիւն ունին այդ…պոռնիկներուն հետ։ Մինչեւ որ…

Մինչեւ որ Քարտաշեանները յայտարարեցին թէ Ապրիլին պիտի այցելեն Հայաստան։

Կարգ մը մարդոց համար շատ առինքնող բան է իրենց արմատներուն ծանօթանալը։ Պատահած է որ որդեգրուած մարդիկ տարիներ աշխատին, մեծ գումարներ ծախսեն, հեռուներ ճամբորդեն, պարզապէս յայտնաբերելու համար իրենց արմատները։

Հայերուն համար անոնց ամէնէն յատկանշական այցելութիւնը Ծիծեռնակաբերդ այցն էր, որ արժանացաւ միջազգային  մամուլի ուշադրութեան (ինչպէս իրենց իւրաքանչիւր քայլ)։ Քիմը եւ Քլոուին (վերջինիս անունը հնչելու մեծ դժուարութիւն կար Հայաստանի մէջ։ Այդ պատճառով ալ հետաքրքրութիւնը իրեն հանդէպ աւելի քիչ էր կարծեմ), հագած էին մետաքսեայ կարմիր եւ կապոյտ համապատասխան հագուստներ։ Հաւանաբար իրենց երրորդ քոյրը, որ վերջին վայրկեան հրաժարած էր իրենց միանալէ երեք զաւակով ճամբորդելու դժուարութեան պատճառով, պիտի ըլլար նարնջագոյն հագուողը։  Kardashian-Gyumri-3

Աղջիկներուս խոստացեր էի որ ընկերային ցանցերու վրայ Քիմին պիտի հետեւիմ միա՛յն եթէ իր աղջնակը մկրտէ Էջմիածինի մէջ։ Երբ Հայաստանէն մեկնեցան առանց Էջմիածին այցելելու, կարծեցի որ ալ վերջ, այդ առիթը կորսնցուց։ Իբր թէ իր ալ հոգն էր։ Յետոյ մէյ մըն ալ ի՞նչ լսենք։ Քիմ Քարտաշեանը աղջկան Երուսաղէմ տարած է ու մկրտած՝ ութ հարիւր տարուայ Սրբոց Յակոբեանց վանքին մէջ։ Աղջիկներս ըսին մամ ալ ճար չունիս։ Հիմա Քիմը ունի 24.4միլիոն եւ առաւել մէկ հետեւորդ։

Քարտաշեաններուն Հայաստան այցով Հայոց Ցեղասպանութիւնը տարածում պիտի չգտնէ։ Ո՛չ, առաւելագոյնը մինչեւ գալ շաբաթ լսողները պիտի մոռնան զայն։ Չեմ կարծեր որ Հայաստանի զբօսաշրջութիւնը աշխուժութիւն պիտի ապրի։ Ամերիկացիները իրենց ճամպրուկները առնելով Հայաստան պիտի չվազեն այս ամառ։ Այս այցէն ամէնաշատ օգտուողները կարծեմ իրե՛նք Քարտաշեանները պիտի ըլլան, որոնք պիտի զգան իրենց խղճի պարտքը կատարած ըլլալ իրենց հօր եւ անոր ծնողներուն հանդէպ։ Պիտի զգան որ իրենց հայկական արմատները տուած են իրենց իւրայատկութիւն մը, ըլլայ այդ ֆիզիքական թէ ընտանեկան չափանիշներով։ Պիտի հասկնան որ կեանքի մէջ դրամէն, հռչակէն եւ լուսարձակներէն աւելի կարեւոր բաներ կան, որոնք կրնան իրենց դրոշմը ձգել մարդու հոգիին վրան։ Կամ ալ…կրնայ դուրս գալ որ այս ըսածներս պարզապէս զգացական ենթադրութիւններ են։ Իրենց համար այս պտոյտը նոր շօ մը պատրաստելու եւ ուշադրութիւն գրաւելու առիթ մըն էր միայն, որուն մասին ա՛լ պիտի չմտածեն երբ սկսին յաջորդ շոյին եւ յաջորդ կիսամերկ (կիսա՞) նկարին մասին մտածել։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles