ԴԱԳԱՂ Կ’ՈՒԶԵՄ

0 0
Read Time:1 Minute, 18 Second

Յ. ՀԵԼՎԱՃԵԱՆ

Պէյրութ

  • Բարեւ, Պարոն Յակոբ, մեռելի սնտուկ մը կ’ուզեմ: Կրնա՞ք հատ մը տրամադրել:
  • Մա՞հ ունիք, Պարոն:
  • Ոչ:
  • Հապա մեռելի սնտուկ ինչո՞ւ կ’ուզես:
  • Պարոն Յակոբ, մէջը մեռել պիտի չտեղաւորեմ, ոչ ալ ես պիտի գործածեմ: Պարզապէս բեմին վրայ պիտի ցուցադրեմ:
  • Մեռելի սնտո՞ւկը:
  • Այո: «Հայ մօր կամքը» թատերախաղի վերջաւորութեան, հերոսին թաղումը պիտի ներկայացնեմ ժողովուրդին, Յակոբ Տէր Մելքոնեան թատերասրահին մէջ:
  • Քառասուն տարուայ մեռելաթաղ եմ, դեռ օր մը տրամայի համար սնտուկ ուզող չեղաւ ինձմէ…:
  • Հիմա եղա՛ւ ուրեմն, Պարոն Յակոբ, կրնա՞ս հատ մը տրամադրել:
  • Սիրով, բայց ուշադրութեամբ պիտի գործածէք, որովհետեւ եթէ սնտուկը գծուի՝ դժուար կը ծախուի:
  • Աչքի լոյսի պէս կը պահեմ սնտուկդ, – ըսելս, սնտուկը Պարոն Յակոբին հետ ինքնաշարժին տանիքը տեղաւորելն ու ճամբայ ելլելս մէկ եղաւ:

Ճամբան մարդիկ կարեկցանքով կը դիտէին դագաղս, մինչեւ իսկ պատշգամներէն տիկիններ լալով կը հետեւէին ինքնաշարժիս տանիքը զետեղուած ճերմակ սնտուկին:

Ճամբու խճողումը պատճառ եղաւ որ շատեր տեսնեն զիս ու սնտուկը: Մինչեւ իսկ ծանօթ մէկը հետաքրքրութեամբ հարցուց.

  • Յովհաննէս, ո՞վ մեռած է:
  • Մարդ չէ մեռած: Ինծի համար է,- ըսի ու քշեցի:

Հասայ Տէր Մելքոնեան թատերասրահի մօտիկ թաղը, ինքնաշարժը շարեցի ու ծանօթ երիտասարդ մը կանչելով, ըսի.

  • Կարօ՛, եկուր, օգնէ, սրահ տանինք:

Ծառայասէր ընկերս ընդառաջեց խնդրանքիս ու սնտուկի ետեւի մասէն ինք շալկած, իսկ առջեւի կողմէն ալ՝ ես, թեքուեցանք Տէր Մելքոնեանի թաղը:

Շարքի բոլոր խանութները մէկ-մէկ գոցելու սկսան իրենց դռներն ու փեղկերը ի յարգանս իմ թափուր դագաղին…:

Երբ հասանք Տէր Մելքոնեանի մուտքին ու բարձրացանք վեր, յստակ լսեցինք  վաճառականներուն խնդուքը.

  • Հելվաճեանը տրամայի համար սնտուկ կը տանի սրահ, Սիմո՛ն, բա՛ց խանութը. Ապրիլ 1 չեղած խաբուեցանք:

…Բոլոր խանութները ետ բացուեցան, մինչ մեր խնդուքի ախորժակը գոցուելիք չունէր:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles