Գրախօսական.- Լոյս Տեսաւ Վեր. Դոկտ. Վահան Յ. Թութիկեանի 38-րդ Հատորը

0 0
Read Time:2 Minute, 21 Second

tootikian Վեր. Գէորգ Թերեան

2016-ի Նոր Տարուան առաջին շաբթուան ընթացքին՝ Տիթրոյթի Հայ Ժառանգութեան Յանձնախումբը լոյս ընծայեց Վեր. Դոկտ. Վահան Յ. Թութիկեանի 38-րդ երկլեզուեան հատորը Տօներ Եւ Նշմարներ վերտառութեամբ: Գիրքը կը բաղկանայ 158 էջերէ — 26 անգլերէն եւ 15 հայերէն յօդուածներէ, որոնք աղերս ունին կրօնական, ազգային, ընկերային, աստուածաբանական, դաստիարակչական բնոյթ ունեցող նիւթերու հետ: Հեղինակը իր այս հատորը ձօնած է իր մանկութեան յաճախած առաջին եկեղեցիին, Էքիզ Օլուքի (Քեսապ) էմմանուէլ Հայ Աւետարանական Եհեղեցիին, ուր ան ստացած է իր նախնական հոգեւոր դաստիարակութիւնը:
Կրօնական աշխարհի մէջ ուսումնական մարդիկ հարցումներ կը հարցնեն: Օրինապաշտ մարդը առ հասարակ կը հարցնէ «ի՞նչ» հարցումը, որովհետեւ ան առաւելապէս հետաքրքրուած է այն նիւթով որ շիտակ կեանք մը ապրելու համար ինչ պէտք է ընել եւ կամ ինչ պէտք չէ ընել: Կրօնի պատմութիւնով հետաքրքրուող մարդը կը հարցնէ «ո՞ր մէկը», որովհետեւ ան կ’ուզէ գիտնալ ո՞րն է ճշմարիտ ուղին, որ կ’առաջնորդէ Աստուծոյ: Վախճաբանական նիւթերով կլանուած անհատ մը, կը հարցնէ «ե՞րբ», որովհետեւ ան կ’ուզէ գիտնալ երբ պիտի գայ աշխարհի վախճանը: Մտաւորական մարդը կ’աշխատի գտնել պատասխանը «ինչո՞ւ» հարցումին՝ գոհացնելու համար կեանքի իմաստին նկատմամբ մարդոց փնտռտուքը:

Վեր. Դոկտ. Վահան Թութիկեան , որպէս խոհուն մտաւորական, իր Տօներ Եւ Նշմարներ գրքին մէջ, կրօնական, աստուածաբանական եւ ազգային նիւթերու մասին խորհրդածութիւններ ըրած ատեն թէեւ որոշ չափով կը պատասխանէ «ի՞նչ» «ինչպէ՞ս» եւ «ե՞րբ», հարցումներուն, բայց առաւելապէս կը կ’աշխատի պատասխանել «ինչո՞ւ» հարցումին: Օրինակ ինչո՞ւ համար կը տօնենք կրօնական եւ ազգային տօներ (էջ 11-40). ինչո՞ւ համար մարդիկ աւելի «շրթունքի ծառայութիւն» կ’ընծայեն իրենց Արարիչին եւ իրենց նմաններուն, փոխանակ «սրտի ծառայութիւն» ընծայելու (էջ 48-51). ինչո՞ւ համար արհեստավարժ մարդիկ, նոյնիսկ կղերականներ, կը նախաձին իրարու եւ ինչպէս կրնան դարմանել այդ ահաւոր ախտը (էջ 58-60). ինչո՞ւ համար անհրաժեշտ է քրիստոնէական նկարագիրը մարդոց առօրեայ կեանքին մէջ (էջ 68-70). ինչո՞ւ համար անկարեւոր նիւթեր առաջնահերթ տեղ կը գրաւեն մարդոց կեանքին մէջ (61-63): Ասոնք, եւ ասոնց նման հարցեր, սոյն հատորին մէջ վաստակաշատ հեղինակը կը վերլուծէ եւ պատասխաններ կը հայթայթէ քրիստոնէական տեսանկիւնէն:

Սոյն հատորին մէջ գործածուած անգլերէն եւ հայերէն լեզուներու ոճը ինքնատիպ եւ դիւրահաղորդ է, իսկ անոր բովանդակութիւնը՝ ներշնչիչ եւ օգտաշատ:
Վերապատուելի Թութիկեանի սահմանազանց սէրը քրիստոնէական սկզբունքներու եւ հայ մշակոյթի հանդէպ բացայայտ եւ վարակիչ են այս հատորի զանազան էջերուն վրայ: Ընթերցողը դիւրաւ կը տեսնէ թէ հեղինակին կրօնական խորունկ համոզումներու հետ զուգահեռ՝ անոր հայկականութիւնը իրեն համար խորունկ ապրում մըն է:
Վերապատուելի հեղինակին անխախտ համոզումը այն է թէ հայ ժողովուրդի գոյութեան պահպանման ամենավստահելի երաշխիքներէն մին իր քրիստոնէական կրօնին հետ, իր մշակոյթն է: Ա’ն է որ կ’իմաստաւորէ հայ մարդու ազգային ինքնութիւնը (էջ 128-130). Ան նաեւ կը հաւատայ որ հայապահպանում եւ Հայ Դատ սերտօրէն կապուած են իրարու, զիրար կը բացատրեն, իրարմով կ’ամբողջանան եւ իրարմով կ’իմաստաւորուին:
Ահավասիկ, այս բազմավաստակ Աստուծոյ ծառան, որպէս արգասիք իր անձնդիր ճիգերուն, մտաւորական խոհունակութեան եւ անսակարկ նուիրումին, լոյս կ’ընծայէ իր այս նոր հատորը, զոր անվերապահօրէն կը յանձնարարենք ընթերցասէր հասարակութեան:
Գիրքը ստանալու համար կարելի է դիմել Armenian Heritage Committee, 3922 Yorba Linda Blvd. Royal Oak, Michigan 48073-6455 (USA).

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles