ԳԵՐԱԿԱՅՈՒԹԵԱՆ ԲԱՐԴՈՅԹ…

0 0
Read Time:1 Minute, 57 Second

p1 khemp

ՀԱՅՐԵՆԻՔ
Խմբագրական
Մայիս 10, 2016

Արդեօք գերակայութեան բարդոյթի արդիւ՞նքն է պատահածը, թէ հակառակն էր որ պատահած էր եւ ստորակայութեան բարդոյթի հետեւանք՝ դիմուած էր այդ գերակայութեան:
Այս անգամ, Թուրքիոյ նախագահ եւ այդ բարդոյթներով տառապող Էրտողանի թիրախը՝ տարիներու իր գործընկերն էր, յանձին վարչապետ, նախկին արտաքին գործոց նախարար եւ իշխող «Արդարութիւն եւ Բարգաւաճում» կուսակցութեան ղեկավար՝ Ահմէտ Տաւութօղլուի, որ Մայիս 6-ին, իր հրաժարականը տալէն օր մը առաջ, հարցազրոյցի մը ընթացքին, յայտնած էր թէ Սուրիոյ մէջ ահաբեկչական խմբաւորումներու աշխուժութիւնը սպառնալիք մըն է Թուրքիոյ եւ ամբողջ աշխարհին համար, եւ թէ պէտք եղած ժամանակ, Անգարա կրնայ առանձին ցամաքային զինուորական գործողութիւններու սկսիլ:
Այս հռետորական խօսքերէն օր մը ետք, այս անգամ իր կուսակցութեան խորհուրդի ժողովէն ետք, ան բոլորովին տարբեր պայմաններու տակ, եւ շատ աւելի հեզ ձայնականութեամբ, յայտնեց թէ ան կը հեռանայ վարչապետի պաշտօնէն եւ թէ «Արդարութիւն եւ Բարգաւաճում» կուսակցութեան յառաջիկայ ընդհանուր ժողովին, մտադրած է իբրեւ թեկնածու չներկայանալ:
Ինչպէ՞ս բացատրել, գրեթէ 24 ժամուայ մէջ ստեղծուած այս շրջանցումը, այս ծաւալողապաշտ՝ զինուորական գործողութիւններ կատարելու մարմաջէն ինքզինք չէզօքացնելն ու կծկուիլը: Հանրածանօթ իր «Զերօ Համբերութիւն» նշանաբանով, Տաւութօղլու համբերութիւնը կորսնցուցած կը թուի ըլլալ: Աւելի ճիշտը իր վարպետը՝ էրտողանն է որ անհամբեր է, իրաւասութիւններ ստանալու եւ շարունակ բարձրանալու:
Եւ այս անգամ արտաքին քաղաքականութեան եւ անմիջակայ սահմանակից տարածաշրջանէն կիրարկուած տարբեր «Զերօ Համբերութիւն» մը ներմուծուած է Թուրքիոյ ներքին քաղաքական կեանքէն ներս, որուն տեղին է մօտէն հետեւիլ, հասնելու համար յստակ եզրակացութիւններու:
Արդարեւ, վերջին շաբաթներուն խորհրդաւոր եւ անհասցէ blog-է մը սկսած էր տեղեկացուիլ թէ Թուրքիոյ ազգային շահերուն դէմ դաւադրութիւններ կը պատրաստուին եւ թէ միա՛յն նախագահին կարողութիւնն ու իմաստութիւնը կրնան փրկել հայրենիքը: Յստակ էր թէ այս խորհրդաւոր բառերուն եւ կայքէջին ետին կը կանգնէր նախագահ Էրտողանն ու իր քարոզչական մեքենան, որ այս անգամ շատ աւելի դժուար պարտականութիւն մը ունէր կատարելիք, որովհետեւ ազգային շահերէն աւելի ներազգային՝ ներքին խոհանոցային հարցեր գոյութիւն ունէին, ընդհանրապէս Միջին Արեւելքի եւ յատկապէս Սուրիոյ առնչուած տեղահանուածներու պատճառով, եւ անշուշտ Թուրքիոյ` Եւրոպական Միութեան անդամակցութեան շուրջ տարակարծութիւններու առնչութեամբ, ան որոշած էր գահընկեցնել իր երկար տարիները գաղափարակից ընկերը:
Ուրեմն, յառաջիկայ Մայիս 22-ին, «Արդարութիւն եւ Բարգաւաճում» կուսակցութեան ընդհանուր ժողովին, պիտի չառաջադրուի Տաւութօղլուի թեկնածութիւնը՝ իբրեւ ղեկավար:
Յետայսու անծանօթ եւ «լուսանցքային» անձնաւորութիւն մը՝ Ահմէտ Տաւութօղլու, պիտի յիշուի եւ նշուի միայնումիան՝ որպէս Քոնիայի շրջանէն ընտրուած երեսփոխան մը:
Դեռ ու՞ր պիտի հասնի այս «Սուլթան» Էրտողանին մեծամոլութիւնը: Իսկ եթէ Տաւութօղլուն եւ նախապէս նախագահ Կիւլը հասած են այդ դրութեան, հապա ի՞նչ պիտի ըլլայ արդէն իսկ խորհրդարանէն եւ սահմանադրական յանձնախումբէն ներս ֆիզիքական բռնութիւններու եւ սպառնալիքներու ենթարկուած, այլախոհ հայ երեսփոխան Կարօ Փայլանի իրավիճակը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles