Գամիշլիի Համազգայինի մշակութային կեդրոնի եւ Ահարոնեանի կիսանդրիի բացում

0 0
Read Time:2 Minute, 0 Second

Հովանաւորութեամբ Ճեզիրէի Առաջնորդական Փոխանորդ Հոգշ. Տ. Լեւոն Վրդ. Եղիայեանի, Ներկայութեամբ Հ.Յ.Դ. Բիրոյի անդամ, ՀՅԴ Հայ դատի եւ քաղաքական հարցերու գրասենեակի պատասխանատու Կիրօ Մանոյեանի, Արժ. Տ. Պսակ Քհնյ. Պէրպէրեանի, Համազգայինի Սուրիոյ Շրջանային Վարչութեան, ազգային պատասխանատուներու, միութիւններու ներկայացուցիչներու, պետական, կրթական պատասխանատուներու եւ Գամիշլիի մշակութային պետական կեդրոնի պատասխանատուներուն, Երկուշաբթի, 21 Նոյեմբերին տեղի ունեցաւ Համազգայինի Գամիշլիի «Ա. Ահարոնեան» նոր կեդրոնի բացումը։

Կեդրոնի մուտքին Հ.Մ.Ը.Մ.-ի Փողերախումբը ողջունեց ներկայ հիւրերը, ապա հնչեցուց Սուրիոյ եւ Հայաստանի քայլերգները, որմէ ետք կեդրոնի բացումը կատարեցին Հոգեշնորհ հայր սուրբը, մեծարգոյ Կիրօ Մանոյեանը, Համազգայինի Ս. Շրջ. Վարչութեան ատենապետուհին եւ մասնաճիւղի ատենապետը։

Այնուհետեւ ներկաները ուղղուեցան դէպի կեդրոնի սրահ, ուր քօղազերծուեցաւ Աւետիս Ահարոնեանի կիսանդրին։ Գամիշլիի «Աւետիս Ահարոնեան» Մասնաճիւղի Վարչութեան ատենապետ Յակոբ Պարսումեան ներկաները ծանօթացուց կեդրոնի գրասենեակներուն եւ տարուող ընթացիկ աշխատանքին, ինչպէս նաեւ կեդրոնի «Աճարեան» լսարան-գրադարանին, ուր այս տարի ընթացք առաւ հայագիտականի առցանց դասընթացքը։

Կեդրոնը ունի «Աճարեան» լսարան-գրադարանը, Կոմիտասի անուան երաժշտական դպրոցը, Այվազովսկիի անուան կերպարուեստի սենեակը։ Կեդրոնին մէջ շքեղ բաժին մը յատկացուած է նաեւ «Վանայ» պարախումբին։

Հ.Յ.Դ. Բիւրոյի անդամ Կիրօ Մանոյեան գնահատանքի իր խօսք ուղղելով ըսաւ. «Մենք Հայաստանի մէջ աւելի հզօր կը զգանք, ամէն անգամ որ սփիւռքի մէջ կրթական, մշակութային նոր հիմքեր կը ստեղծուին մեր ժողովուրդի զարգացման համար։ Այս յանդուգն նախաձեռնութիւնը Գամիշլիի մէջ վկայութիւնն է այս գաղութին հաւատարմութեան եւ Սուրիական Հայրենիքին վստահութեան։ Գաղութ մը, որ որոշած է ոչ միայն իր ինքնութիւնը պահպանել այլ նաեւ ինքզինք զարգացնել, երիտասարդներուն բաց դաշտ ստեղծել, որպէսզի իրենց գիտելիքները հարստացնեն եւ նոր ներդրում բերեն մեր մշակոյթին»։

Ապա պետական պատասխանատուներ իրենց սրտի խօսքը արտասանելով գնահատեցին կեդրոնի պատրաստութեան հսկայ աշխատանքն ու բարի երթ մաղթեցին հայ մշակութային գործունէութեան։

Հոգեշնորհ հայր սուրբը խօսք առնելով լուսարձակի տակ առաւ մշակոյթի եւ գրականութեան կարեւոր դերը սերունդներ դաստիարակելու գործընթացին մէջ, ապա նորանոր վերելք եւ յաջողութիւն մաղթեց համազգայինի յառաջիկայ ծրագիրներուն։

Համազգայինի «Վանայ» պարախումբը հեզաճկուն պարերով գեղեցկացուց ձեռնարկը, գեղ. ղեկավարութեամբ պարուսոյց Նանար Սարգիսեանի։
Ներկաները ջերմ մթնոլորտի մէջ ողջունեցին կեդրոնին բացումը։

Կիրօ Մանոյեան  հանդիպում ունեցաւ Հ.Յ.Դ.-ի ուղղեկից միութիւններու` Համազգայինի, Հ.Մ.Ը.Մ.-ի , Ս.Օ.Խ.-ի Գամիշլիի մէջ գործող պատասխանատու կազմերուն հետ, ինչպէս նաեւ Գամիշլիի Հայ Դատի Յանձնախումբին հետ։

Հանդիպումին իւրաքանչիւր միութիւն իր զեկոյցը ընթերցեց, որուն մէջ ներկայացուց միութեան թուապատկերը, գործունէութիւնները, ապագայ ծրագիրները, եւ դիմագրաւած դժուարութիւներն ու մարտահրաւէրները ։

Մանոյեան գնահատեց միութիւններուն տարած աշխատանքը եւ գաղութի հայապահպանման ի նպաստ բոլոր ճիգերը, շեշտելով որ Հ.Յ.Դ. երիտասարդական գրասենեակը բոլոր կարելիութիւնները ի սպաս կը դնէ զօրավիգ կանգնելու երիտասարդութեան։

Մանոյեան նորանոր վերելք եւ յաջողութիւն մաղթեց բոլոր միութիւններուն, որոնց անսակարկ նուիրումով եւ անկոտրում կամքով կարելի կը դառնայ յաղթահարել տարբեր դժուարութիւններ։

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles