0
0
Հինգշաբթի, Մայիս 2-ին, խմբագրութեանս հիւրն էր, Լիզպոնի “Գալուստ Կիւլպէնկեան“ հիմնարկի հայկական բաժանմունքի նորանշանակ տնօրէն դոկտ. Ռազմիկ Փանոսեան, որ կարճ այցելութեամբ մը Պոսթըն կը գտնուէր, եւ այդ առթիւ, այցելեց “Հայրենիք“:
Ան յայտնեց թէ գրեթէ երեք ամիսէ ի վեր ստանձնած է այս պաշտօնը եւ ընթացքի մէջ է կատարելու հիմնարկի հայերէն բաժնի գործունէութեան հնգամեայ ռազմավարական եւ ծրագրային յայտագիրը: Ան տեղեկկացուց թէ “Գալուստ Կիւլպէնկեան“ հիմնարկի հայկական բաժանմունքը փոքր մաս մըն է, որուն կիզակէտը, բնականաբար , հայկական աշխարհն է թէ՛ մշակութային եւ թէ՛ կրթական բնագաւառներով: Հետեւաբար, հիմնարկին նպատակն է սատարել հայ լեզուին ու մշակոյթին: Առ այդ, ընդհանուր մօտեցումը, կեդրոնացած է դաստիարակութեան եւ կրթութեան հետ կապուած նիւթերու վրայ: Դոկտ. Փանոսեան նշեց թէ հիմնարկին նպատակն է, աւելի արդիականացած ձեւերով ուղղուիլ դէպի ապագայ եւ առ այդ յստակ որոշումներ առնելով, հաշուետու ձեւով գործել եւ հասնիլ արդիւնքներու:
Դոկտ. Փանոսեան, յայտնեց, թէ զարկ պիտի տրուի նոր եւ արդի հրատարակութիւններու, մանաւանդ որ հետզհետէ նորութիւններ կը ստեղծուին համակարգչային բնագաւառէն ներս, որուն հետ եթէ քայլ չպահուի, կրնայ վտանգուիլ հայերէն լեզուն, յատկապէս արեւմտահայերէնը, որ արդէն իսկ, “Եունեսքօ“ի կողմէ կը նկատուի անհետանալու վտանգին տակ գտնուող լեզու:
Դոկտ. Փանոսեան շեշտեց, թէ այս նոր կացութիւններուն եւ եղափոխութիւններուն հետ քայլ պահելը, արդէն իսկ մարտահարաւէր մըն է, որուն արդիւնք հիմնարկը կը հասնի ներկայ եւ ապագայի արդիական հիմնարկի մակարդակին: Այսուամէնայնիւ, ան շեշտեց թէ տրամադրուելիք կրթանպաստը իր ազդեցութիւնը պէտք է որ ունենայ եւ համընկնի 21-րդ դարու պայմաններուն, ապա թէ ոչ անտեղի է աշխատելաձեւը շարունակելը: Հետեւաբար պիտի կատարուի աշխատանքի հետապնդում եւ բնականաբար հաշուետուութիւն:
Դոկտ. Փանոսեան նաեւ աւելցուց, թէ հիմնարկին ընդհանուր մօտեցումը այն է, որ հայկական բաժանմունքը պէտք է իրապաշտօրէն ներկայացնէ հայկական աշխարհի իրականութիւնը, թէ՛ Հայաստանի եւ թէ՛ Սփիւռքի մէջ:
Մինչ այդ, մարդասիրական օժանդակութեան համար, որոշ գումար մը արդէն իսկ փոխանցուած է Սուրիահայութեան Բարեսիրական Կեդրոնական Մարմինին եւ գումարը կատարուած է Մեծի Տանն Կիլիկիոյ Կաթողիկոսարանի միջոցաւ:
Դոկտ. Փանոսեան նաեւ այցելեց “Արմինիըն Ռիվիու“ի, Հ.Յ.Դ. Արխիւներու եւ Հ.Օ.Մ.-ի Կեդրոնական Վարչութեան գրասենեակները: Նշենք թէ Դոկտ. Փանոսեան ծնած է Լիբանան եւ փոքր տարիքէն գաղթած է Գանատա, ուր հետեւած է բարձր մակարդակի ուսման: Ան դասաւանդած է Լոնտոնի համալսարանէն ներս եւ ներկայացուցած բազմաթիւ դասախօսութիւններ: Հրատարակած է բազմաթիւ յօդուածներ ու գիրքեր` հայութեան, Հայաստանի, Արցախի, հայկական ինքնութեան եւ անոնց առնչուող հարցերու շուրջ, նաեւ խմբագրած է կարգ մը միջազգային հանրագիտարաններու հայութեան վերաբերող բաժինները: Ան, նաեւ գործակցած ու պաշտօնավարած է միջազգային կազմակերպութիւններէ ներս եւ բազմիցս այցելած` պատմական գրաւեալ Հայաստանի կարգ մը շրջանները` Վան, Անի եւ բարձրացած Արարատ լեռ:
