Բաց նամակ Ֆրանսայի Հանրապետութեան Նախագահին

0 0
Read Time:2 Minute, 58 Second

hollandeՌՈՊԷՐ ԱՅՏԱՊԻՐԵԱՆ

Պարոն Նախագահ,
յուզումէն ետք, վերաքննեցէք ձեր արտաքին քաղաքականութիւնը:

Յունուար ամսուան ողբերգութիւնները մեզ մատնեցին խոր յուզումի, բայց հիմա որ անմեղ զոհերը հողին յանձնուած են, պէտք է խորհրդածենք եւ հասկնանք, թէ ո՛ւր կը թաքնուին արմատները անմարդկային այս արարքներուն, որոնց ականատես եղանք փարիզեան շրջանին մէջ՝ մեր տուներէն հազիւ քանի մը քայլ անդին, եւ այն արարքներուն, որոնք շատոնց ի վեր տեղի կ՚ունենան Մերձաւոր Արեւելքի մէջ՝ մեր սիրելի Հայաստանէն ցամաքային ճամբով նուազ քան 15 ժամ հեռաւորութեան վրայ:

Պարոն Նախագահ, ինչպէս Դուք արդարօրէն նշեցիք, վերջ դնելը՝ ատելութեան, բրտութեան եւ ճակատումի այս սանձազերծման, -որ ամբողջ ընկերութիւններ պիտի ապակայունացնէ յառաջիկայ տասնամեակներուն-, կ՚ենթադրէ վերստին կատարել ճի՛շդ հարցադրումներ: Անո՛նք, որոնք կը վերաբերին միասնական կեանքին, ազգային կրթութեան, հանրապետական եւ մամլոյ ազատութեան սկզբունքներու գերապատուութեան: Սակայն, Ձեզմէ կը խնդրեմ նաեւ յաստակօրէն բարձրացնել այն հարցադրումները, որոնք կը վերաբերին մեր արտաքին քաղաքականութեան, ուր մեր նախապատուութիւնները եւ դաշնակցութիւնները պէտք է վերատեսութեան ենթարկել: Ներկայի քաղաքականութիւնը շատ վարդապետական եւ նոր-պահպանողական է: Այդ քաղաքականութիւնը, Թուրքիոյ, Քաթարի, Սէուտական Արաբիոյ եւ Ազէրպայճանի տարապայման փառասիրութիւններուն պատճառով՝ յղի է Ֆրանսան դէպի վատթարագոյն համաձայնութիւններու առաջնորդելու վտանգով:
«Արմատական մահմետականութիւնը որ բոլորէն առաջ մահմետականներուն հարուած կը հասցնէ, սնանեցաւ ամէն տեսակի հակասութիւններով, ազդեցութիւններով, թշուառութիւններով, անհաւասարութիւններով, չափէն աւելի երկար ժամանակէ ի վեր չլուծուած հակամարտութիւններով» այնքան արդարօրէն յայտարարեցիք Արաբական Աշխարհի Հիմնարկին մէջ:
Ուրեմն, Պարոն Նախագահ, խուսափեցէք ա՛լ աւելի ծանրակշիռ դարձնելէ, ի շարս այլոց, «Ֆրանքեւսուրիական յարաբերութեան սեւ թղթածրար»ը, ինչպէս վարպետ կերպով կը ներկայացնէ մեծ թղթակից Ժորժ Մալպրիւնօ (*): Մի՛ կրկնէք վերջին երեսուն տարիներուն գործուած գնահատումի սխալները: Անոնք ծառայեցին միայն կրակին վրայ իւղ լեցնելու Լիպիոյ, Սուրիոյ եւ Ափրիկէի մէջ, հոն ուր ներկայիս մեկնած են ուղեղները լուացուած եւ զինուորագրուած ֆրանսացի աւելի քան 2.000 երիտասարդներ կռուելու համար՝ չենք գիտեր ի սէր ո՞ր գաղափարախօսութեան եւ ուրկէ անոնք կը վերադառնան բոլորովին տմարդի դարձած, Ֆրանսայի մէջ շարունակելու համար իրենց ճիհատը: Բնաջնջելով «Շառլի Հէպտօ»ի խմբագրական կազմը, անոնք մեզ զրկեցին միս ու ոսկոր մարդոցմէ, որոնք հարուստ էին գաղափարներով եւ տէր՝ զանազան տաղանդներու, որոնց կրնանք ծանօթանալ Նումա Սատուլին փոխանցուած մտերիմ խօսքերու ընդմէջէն, որոնք նախազգացական կերպով հրատարակուեցան 2013 Մայիսին (**): Հոն կը յայտնաբերենք, որ Գապիւ՝ իմ սերունդին լաւագոյն ներկայացուցիչը, հանրապետութեան զաւակ, լաւատես մըն էր, որ ամէն օր կը մտածէր մահուան մասին՝ զայն դիմագրաւել կարենալու համար արիօրէն:

Ուրեմն, Պարոն Նախագահ, մեր սահմանափակ միջոցներով պատերազմներ մի մղէք ամէն կողմ: Փորձեցէք գտնել խաղաղ լուծումներ, որոնք պիտի մեղմեն շարունակուող հակամարտութիւնները, Ուքրայինայէն մինչեւ Նիկերիա:
Աւելի՛ լաւ ընտրեցէք ձեր թշնամիները եւ ձեր դաշնակիցները: Ճիհատականներն են, զորս պէտք է վնասազերծել: Անոնք սպառնալիքներ են տարածաշրջանի բոլոր երկիրներուն համար, ներառեալ այն երկիրներուն, որոնք իրենց զօրակցեցան: Ռուսաստանը, Իրանը եւ Սուրիան առարկայական դաշնակիցներ են: Յորդանան կրնայ օգնել սիւննի ցեղախումբերու՝ ծայրայեղական աղանդներէ տարանջատման գործին մէջ: Օգնեցէք սիւննի վերնախաւին, որպէսզի վերագտնէ իր արժանի տեղը սուրիական եւ իրաքեան բանակներուն եւ վարչամեքենաներուն մէջ: Պաշտպանեցէք Քիւրտերը եւ զօրավիգ եղէք անոնց, որպէսզի հաստատեն տարածքային պատշաճ ինքնավարութիւն այն զանազան երկիրներուն մէջ ուր կ՚ապրին: Այդ ուղղութեամբ, դիմեցէք ձեր վարչապետ Մանիւէլ Վալսի գործնապաշտութեան: Տիկին Մերքէլի հետ միասին, լուծեցէք ուքրաինական տագնապը, վերցնել տալով Ռուսաստանի պարտադրուած պատիժները, որոնք ոչ մէկուն ձեռնտու են. նպաստեցէք նաեւ իրանեան հիւլէական համաձայնագրի յաջողութեան:
Գիտէք, որ խաղաղութիւնը ի վերջոյ կախեալ է Փարիզի եւ Մոսկուայի, Ուաշինկթընի եւ Թեհրանի, Թել-Աւիւի եւ Ռամալլահի միջեւ բանակցութիւններէն, եւ ձեր քաղաքացիներուն ապահովութիւնն ալ՝ լրահաւաք ծառայութիւններու եւ կառավարութեան լաւագոյն գործակցութենէն: Պարոն Նախագահ, ցոյց տուէք, որ Ֆրանսա անհրաժեշտ բոլոր դասերը քաղած է Յունուար 7էն 12 պատահած մարդկային այն ողբերգութիւններէն, որոնք զայն հարուածեցին իր սրտին վրայ եւ մտքին մէջ: Այս բոլորը կը պատահի Հայոց տարագրութենէն հարիւր տարի վերջ, երբ անոնք առաջնորդուեցան դէպի սուրիական անապատները՝ բնաջնջման այդ ճամբարները, ուր նոյնիսկ ոսկրակոյտները յարգանքի չարժանացան այս նոր բարբարոսներուն կողմէ:
Կա՞յ արդեօք մեռեալներու նախատումէն աւելի մեծ հայհոյանք:

(*) « Les chemins de Damas » («Դամասկոսի ճամբաները»), Քրիսթիան Շէնօ, Ժորժ Մալպրիւնօ։ Հրատ. Ռոպէր Լաֆոն, 2014։
(**) « Dessinateurs de Presse » («Մամլոյ գծագրիչները»), Նումա Սատուլ։ Հրատ. Կլէնա։

ՓԱՐԻԶ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles