0
0
Երեւանի “Ազատութիւն“ հրապարակէն ծայր առած հաւաքները կը շարունակուին ամենուրեք: Արդարեւ, Րաֆֆի Յովհաննէսեան կը շարունակէ իր հաւաքները, նաեւ զանազան շրջաններէ եւ մարզերէ ներս:
“Ժառանգութիւն“ կուսակցութեան ղեկավարը այցելեց Արարատի եւ Արմաւիրի մարզեր եւ ժողովուրդին հետ հանդիպում ունեցաւ շարք մը մարզերու մէջ: Իր խօսքերուն ընդմէջէն ան միջազգային հանրութեան կոչ ուղղեց վերատեսութեան ենթարկելու Սերժ Սարգսեանի յաղթանակը շնորհաւորելու քայլը եւ ընտրութիւններու արդիւնքները ճանչնալու որոշումները: Արարատի մարզի Մասիս քաղաքին մէջ տեղի ունեցած հանդիպման ժամանակ Յովհաննէսեան նշեց, որ պատրաստ է լսելու Սերժ Սարգսեանի բոլոր առաջարկները` այս համազգային տագնապը լուծելու եւ յաղթահարելու համար:
Իր խօսքերուն մէջ, ան կը պնդէր, որ հակառակ “համատարած կեղծիքներուն, ամէնուր յաղթած է ժողովուրդը“: Ան ամէն տեղ կը բարձրացնէր մարզպետներու, քաղաքապետներու հրաժարականներու հարցը: Անդրադառնալով Արմաւիրի քաղաքապետի հրաժարականին` Յովհաննէսեան յայտնեց, որ Ռուբէն Խլղաթեան ունեցաւ “գոնէ նուազագոյն տղամարդկութիւնը“ եւ հրաժարական տուաւ: Ան յայտարարեց, որ Խլղաթեանի օրինակով կը պահանջէ Մարզպետին հրաժարականը:
“Կ՛ուզէք խօսիլ` ես կը խօսիմ ձեզի հետ, ես չեմ վախնար երկխօսութենէն, բայց դուք` ինչպէս Ամերիկան, Ռուսիան, Եւրոպան, Չինաստանը պիտի ճանչնաք հայ ժողովուրդին կամքի արտայայտութիւնը: Հայ ժողովուրդը յաղթած է“, յայտարարեց Յովհաննէսեան` հեռակայ դիմելով Հայաստանի նախագահին:
Արտաշատի մէջ Յովհաննէսեան յայտարարեց, որ “ամէնէն խայտառակ“ կեղծիքները եղան Արարատի մարզին մէջ:
Րաֆֆի Յովհաննէսեան, մամլոյ ասուլիսի մը ընթացքին լրացուցիչ մանրամասնութիւններ բացայայտեց նախագահ Սերժ Սարգսեանի հետ իր հանդիպման վերաբերեալ: “Ո՛չ իր կողմէ, ո՛չ իմ կողմէս կար պաշտօն ստանձնելու, համաձայնական կառավարութիւն ստեղծելու առաջարկ: Իր կողմէ կար առաջարկ, որ իբրեւ հանրապետութեան թիւ երկու քաղաքական գործիչ, (ինչ որ ես մերժեցի), ըսաւ, որ դուն պիտի շարունակես 2017-2018 թուականներուն իբրեւ ընդդիմութեան ղեկավար տանիս քու պայքարդ: Ինծի պէտք չէ, արդէն 2017-2018-ին երիտասարդ սերունդը պիտի տիրանայ իր սահմանադրական իրաւունքին“, ընդգծեց Յովհաննէսեան:
Վերջապէս անդրադառնալով Միացեալ Նահանգներու Արտաքին Գործոց նախարար Ճան Քերիի եւ եւրոպացի պաշտօնատար Խօսէ Մանուէլ Պառոսոյի կողմէ նախագահ Սերժ Սարգսեանին ուղղուած շնորհաւորական ուղերձներուն յայտնեց, որ անթոյլատրելի է ոչ օրինական իշխանութեան ճանաչման միջոցով զիջումներու դիմել Արցախի կամ Ցեղասպանութեան ճանաչման հարցին գծով: “Ես կը դատապարտեմ այդ ճանաչումը… փաստօրէն կը հեգնէ, կը ծաղրէ հայ ժողովուրդի սահմանադրական իրաւունքի պարզ, աննախադէպ արտայայտութիւնը Փետրուար 18-ին: Հետաքրքրական է, որ ատիկա արտայայտուած է ոչ թէ նախագահի մակարդակով, այլ նոր արտաքին գործոց նախարարին մակարդակով: Ատիկա ինքնին արդէն ուշագրաւ է: Ես կ՛ակնկալեմ, որ վերանայումներ պիտի ըլլան: Եւ ի վերջոյ աշխարհի բոլոր պետութիւնները պիտի ճանչնան Հայաստանի ժողովուրդին յաղթանակը Փետրուար 18-ին“, շեշտեց Յովհաննէսեան:
