ԱՒԱ՜Ղ …«ՄԱՅՐԱՄՈՒՏ»

0 0
Read Time:2 Minute, 1 Second

v14

ՀԱՅՐԵՆԻՔ
Խմբագրական
Դեկտեմբեր 28, 2014

Աւա՜ղ…Հակառակ իր կամքին, ուժին եւ պայքարելու բերկրանքին, Ընկեր Վահան չկրցաւ կասեցնել իր անձին «մայրամուտ»ը:
2013-ի ամրան ընկեր Վահան Յովհաննիսեան լոյս ընծայած էր երկար յօդուածաշարք մը՝ «Մայրամուտ, որը հարկաւոր է կասեցնել», որ կարելի է հաւաքել եւ վերածել գրքոյկի մը:
Դաշնակցական ղեկավարի ակնոցով դիտուած, Վահան Յովհաննիսեան ամենայն մանրամասնութեամբ եւ սրտբացօրէն կը ներկայացնէր Հայաստանի ընկերաքաղաքական հարցերը: Եւ վերնագիրը ո՛չ թէ միայն ահազանգային էր…նաեւ հրամայական: Այդ թուականէն ետքն ալ, երկրէն ներս տիրող անցուդարձերը փաստեցին թէ հարկաւոր էր կասեցնել այդ վտանգաւոր աւարտը՝ ՄԱՅՐԱՄՈՒՏԸ:
Վերջին օրերուն, ահաւոր ցաւերէ կը տառապէր եւ մարմինն ալ հիւծուած էր, հակառակ Պերլինի ամենէն աւելի արդիականացած հիւանդանոցներէն մէկուն մէջ դարմանուելուն: Այլեւս, զինք ոտքի պահող ներքին գործարաններն ալ սկսած էին տեղի տալ եւ …դաւաճանել:
Աւա՜ղ…Կարելի չեղաւ, ռուսերէն լեզուով գրուած իր իւրայատուկ պատմական-արկածային վէպին՝ «Մանտիլիոն»ին հայերէնի թարգմանութեան պատշաճ շնորհահանդէսը կազմակերպել:
Հնագիտուրեան մէջ մասնագիտացած եւ պեղումներ կատարած, այդ գիրքով, ընկեր Վահան, համաշխարհային քաղաքակրթութեան մէջ հայ ազգի տեղի եւ նշանակութեան արժանի գնահատման խնդիրն է որ կը հետապնդէր:
Մերթ երկար, մերթ կարճ ու կտրուկ, եզակի էր անոր գրիչը, անշուշտ նաեւ լի՝ սրամտութեամբ եւ դիտելու կարողութեամբ: Այսպէս, քանի մը տարի առաջ էր, երբ անգամ մը եւս իր մասնագիտացած ընկերաքաղաքական միջավայրին մասին վերլուծում մը կը կատարէր ներակայացնելով ներկայ դասակարգերը, ան ամենայն յանդգնութեամբ կը մերկացնէր արեւմտեան աշխարհը, յայտնելով թէ այդ միջավայրէն ներս, ամենէն աւելի հանգիստ եւ ապահով կեանք ապրողը, այն անձն է որ, միեւնոյն ժամանակ կը պատկանի իգական սեռին, հաշմանդամ ու սեւամորթ է …եւ միասեռական (կարդալ՝ «Քաղաքական Բարեկրթութեան Մասին» յօդուածը, լոյս ընծայուած Օգոստոս 2013-ին եւ վերստին տեղադրուած կայքէջէն ներս):
Այդ նկարագրութիւնը, Վահան Յովհաննիսեան այնքան մը ճկունութեամբ նկարագրած էր, որ մարդկային իրաւունքներու դէմ պայքարող ամենէն աւելի ծայրայեղ անձնաւորութիւնն անգամ վերլուծական եւ դրական ակնոցով կ՛ընդունէր այդ հաստատումը, անգամ մը եւս յանձին յօդուածագրի գրիչին:
Բեմահարթակին վրայ ալ իւրայատուկ էր ան, կազմակերպուած հաւաքներու ժամանակ իր կատարած ճառախօսութիւններով, ուր բարոյական սկզբունքներու վրայ խարսխուած, դաշնակցական ղեկավարի յատուկ գաղափարական մտածողութիւնը կը շեշտադրուէր:
Այո՛, ոչ միայն քաղաքական գործիչ եւ վիպասան էր ան, այլ նաեւ հնագէտ, պատմաբան եւ …անշուշտ ազատամարտիկ եւ դիւանագէտ:
Դեկտեմբեր 28 թուականը, անկիւնադարձային եղած է Վահան Յովհաննիսեանի կեանքէն ներս: Արդարեւ, ճիշտ քսան տարի առաջ՝ Դեկտեմբեր 28, 1994-ին էր որ Հայաստանէն ներս կասեցուեցաւ Հ.Յ.Դ.-ի գործունէութիւնը, եւ բազմաթիւ գործընկերներու կողքին, ինքն ալ բանտարկուեցաւ: Տարի մը առաջ, Դեկտեմբեր 28, 2013-ին, ան պաշտօնապէս նշանակուեցաւ Գերմանիոյ Դաշնակցային Հանրապետութեան մօտ Հայաստանի դեսպան:
…Կիրակի Դեկտեմբեր 28, 2014-ին, «Մայրամուտ»ն էր մեր սիրելի ընկեր Վահան Յովհաննիսեանին… Մայրամուտ մը, որ դժբախտաբար կարելի չէր կասեցնել:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles