Արցախ Ամիսէ Մը Ի Վեր Շրջափակուած․- Սննդեղէնի Կողքին Ելեկտրականութեան Սահմանաջակ Մատակարարում

0 0
Read Time:1 Minute, 45 Second

Ահաւասիկ ամիսէ մը ի վեր, Արցախ կը մնայ շրջափակուած։ Արդէն իսկ, սննդեղէնը հաւասար բաշխելու համար, որդեգրուած է կտրօնային համակարգ:

Ստեփանակերտի եւ շրջաններու խանութներուն մուտքերուն երկար շարքեր կը գոյանան, որպէսզի իւրաքանչիւր քաղաքացի կարենայ ստանալ իր բաժինը։

Միւս կողմէն, Ատրպէյճանի վերահսկողութեան տակ գտնուող Աղաւնոյ-Բերձոր հատուածով անցնող միակ բարձր հոսանքի գիծի խանգարումին պատճառով, Արցախի մէջ անջատումներ կ՛ըլլան: Գորիս-Ստեփանակերտ 110 քլմ․ (70 մղոն) Արցախը Հայաստանէն սնուցող միակ բարձր լարման ելեկտրականութեան գիծի 33-րդ քլմ․-ին (Աղաւնոյ-Բերձոր հատուածի շրջան) մօտ, Յունուար 9-ին արձանագրուած էր խանգարում:

«Ատրպէյճանական կողմի ապակառուցողական դիրքորոշումին պատճառով նշուած հատուածին մէջ այս պահու դրութեամբ կարելի չէ իրականացնել այցելութիւն եւ կազմակերպել վնասի վերանորոգութեան աշխատանքներ, ուստի որոշում տրուած է հանրապետութեան ելեկտրամատակարարումը իրականացնել տեղական արտադրող կայաններու միջոցով` համապատասխան սահմանափակումներով», կը տեղեկացնէ «ԱրցախԷներկօ»-ի մէկ պաշտօնական հաղորդագրութիւնը:

Արցախի մէջ կան կասկածներ, որ խանգարումը միտումնաւոր եղած է, որովհետեւ այդ հատուածին մէջ` մինչեւ Աղաւնոն Ատրպէյճանին յանձնելը, թեքնիք հարցեր չէին եղած։

«Ե՛ւ հաղորդալարը, ե՛ւ համապատասխան բոլոր նիւթերը թարմացուել են, այդ իսկ պատճառով վթարը որպէս այդպիսին, մեր կարծիքով, ինքն իրեն չէր կարող լինել», կը տեղեկացնէ «Արցախէներկօ»-ի փոխտնօրէն Տիգրան Գաբրիէլեան:

Յունուար 11-էն սկսեալ երկու ժամով անջատուեցաւ Ստեփանակերտի որոշ թաղամասերու եւ շրջաններու ելեկտրականութիւնը: Այսպէս մէկ ամսուան շրջափակման պայմաններուն մէջ, ուտելիքէն բացի, նաեւ հոսանքը սահմանափակ պիտի ըլլայ:

Արցախի մէջ ելեկտրականութիւն արտադրող ջրելեկտրակայաններուն զգալի մասը Ատրպէյճանի վերահսկողութեան տակ անցաւ 2020-ի 44օրեայ պատերազմէն ետք: Ասոր իբրեւ արդիւնք՝ շեշտակի կերպով նուազած է ելեկտրականութեան հզօրութիւնը:

Դեղարաններուն մէջ իրավիճակը ճգնաժամային է: Ստեփանակերտ-Գորիս մայրուղիի փակման պատճառով Արցախի դեղարաններուն մէջ որոշ տեսակի դեղերու եւ մանկական ուտելիքներու անհրաժեշտութիւնը հետզհետէ աւելի կը զգացուի:

Ըստ Արցախի կառավարութեան տուեալուն՝ անցեալ չորս շաբաթներուն ընթացքին Արցախ չէ ստացած առաւել քան 12 հազար թոն կենսական նշանակութիւն ունեցող ապրանքներ:

Կարմիր Խաչի միջազգային կոմիտէն ու Ռուսիոյ խաղաղապահները անոր միայն չնչին մասը մատակարարած են: Ուտելիքի շեշտուող սղութեան պատճառով փակուած են 41 մանկապարտէզներ, 56 նախադպրոցական խումբեր եւ 20 երկարօրեայ ուսումնական հաստատութիւններ: Ստեփանակերտէն կը շարունակեն ահազանգել, որ շրջափակման պատճառով, Արցախի 120 հազար բնակչութիւնը, որոնց մէջ շուրջ 30 հազար մանուկներ, կանգնած են սովի վտանգին առջեւ:

Ստեփանակերտէն Հայաստան տեղափոխուած են անյապաղ բժշկական օգնութեան կարիք ունեցող 3 քաղաքացիներ եւս: Իսկ, Կարմիր Խաչի միջնորդութեամբ եւ ընկերակցութեամբ, արդէն 18 ծանր հիւանդներ տեղափոխուած են Հայաստան, անոնց կարգին մանուկներ ու օտարներ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles