0 0
Read Time:2 Minute, 58 Second

Ա.Ա.   

     Լեռնային Ղարաբաղն ու Հայաստանը իրարու կապող Կեանքի Ճանապարհին փակ ըլլալուն զուգահեռ մէկէ աւելի խնդիրներ իրավիճակը առաւել կը սրեն եւ կը ստիպեն հաշուի առնել կացութեան բարդացման առաջնորդող այն բոլոր տուեալները, որոնց ընդհանուր գումարը արցախահայութեան վրայ անհամեմատելիօրէն բարձր ճնշումն է՝ զայն ծունկի բերելու եւ հայրենաթափելու նպատակով։

    Ներքին թէ արտաքին առարկայական եւ ենթակայական ազդակներ արցախեան իրավիճակին կապուած զարգացումներուն վրայ ունին իրենց ազդեցութիւնները, որոնք եթէ առանձնացուին, կրնան ընդհանուր պարունակէն դուրս բերել Արցախի ժողովուրդին դիմագրաւած տագնապին էութիւնը եւ խնդրին տարբեր երանգներ տալ։ Այս ազդակներէն են Հայաստանի վարչապետին եւ Ատրպէյճանի նախագահին անջատաբար տրուած  վերջին մամլոյ ասուլիսներուն ընթացքին կատարուած յայտարարութիւնները։

     Մինչ Հայաստանի վարչապետ Նիկոլ Փաշինեան  հաստատեց, որ Արցախի ժողովուրդին ապահովութիւնը երաշխաւորելու Հայաստանի իշխանութիւններուն խոստումը ի զօրու կը մնայ, սակայն շեշտելով,որ  Արցախի ժողովուրդը պէտք է ինք խօսի Լեռնային Ղարաբաղի հայերու իրաւունքներուն եւ ապահովութեան մասին, աւելցնելով,որ Հայաստան պիտի աջակցի կարելի բոլոր միջոցներով։ Մինչդեռ Արցախեան երկրորդ պատերազմէն ետք հաստատուած կառավարութեան հնգամեայ ծրագրին մէջ յստակօրէն արձանագրուած է.«Հայաստանի հանրապետութիւնը պիտի շարունակէ ըլլալ Արցախի ժողովուրդին ապահովութեան երաշխաւորը եւ պիտի շարունակէ գործել Արցախի ժողովուրդի իրաւունքներու պաշտպանութեան համար։ Աջակցութիւն եւ Երաշխաւոր հասկացութիւնները բնականաբար պիտի մղէին արցախցիները տեսնելու եւ անդրադառնալու տարբերութեան, որովհետեւ Արցախի Ապահովութեան Խորհուրդը՝ թարգմանը հանդիսացաւ արցախցիներուն պատճառաբանուած մտահոգութիւններուն։

    Փաշինեան նաեւ առանց մանրամասնելու, թէ ինչի կ՛ակնարկէ, խօսեցաւ Ատրպէյճանի հետ խաղաղութեան պայմանագրին վերաբերեալ կարմիր գիծի  մը մասին եւ յայտարարեց, որ եթէ խաղաղութեան համաձայնագրին բնագրին պայմանները չհամապատասխանեն Հայաստանի հանրապետութեան պետական  շահերուն, ապա խաղաղութեան համաձայնագիր պիտի չստորագրէ։ Չյստակացաւ, թէ Հայաստանի հանրապետութեան պետական շահերուն մէջ տեղ ուն՞ին Արցախն ու արցախահայութիւնը։

    Հայաստանի վարչապետը նաեւ անպատասխան ձգեց լրագրողի մը այն հարցումը, որ կը վերաբերէր Արցախի կարգավիճակին, թէ ի վերջոյ անիկա Ատրպէյճանի կազմին մէջ պիտի գտնուի՝ խաղաղութեան պայմանագրով կամ այլ տարբերակով մը։Փաշինեան հարցումին պատասխանեց հարցադրումով մը, թէ Ատրպէյճան արդեօք կը ճանչնա՞յ Հայաստանի հանրապետութեան հողային ամբողջականութիւնը։ «Եթէ Ատրպէյճան կը ճանչնայ Հայաստանի հողային ամբողջականութիւնը, ապա Հայաստանի հանրապետութիւնն ալ կը ճանչնայ Ատրպէյճանի հողային ամբողջականութիւնը, առանց սակայն ուղղակի պատասխանելու իրեն ուղղուած հարցումին, թէ Հայաստանի համար ընդունելի՞ է Ատրպէյճանի կազմին մէջ տեսնել Արցախը։

      Ինչ կը վերաբերի նախկին խորհրդային օրերու էնքլէյվներուն, որոնց մասին Ատրպէյճանի նախագահ Իլհամ Ալիեւ յաճախ կը խօսի եւ կը յայտարարէ, որ հայկական կողմը գրաւուած կը պահէ Տաւուշի շրջանի Վերին Ոսկեպար, Ներքին Ոսկեպար, Բաղանիս Այրում, Խեյրիմլի, Սոֆուլու, Բարխուտարլու եւ Ղըզըլհաճըլը գիւղերը, ինչպէս նաեւ Արարատի մարզի Տիգրանաշէնը, որ նախկին Քյարքին է, Փաշինեան նախապէս իր կատարած յայտարարութիւններէն շրջադարձ կատարելով՝ նշեց,որ հայկական կողմն ալ կը պահանջէ Արծուաշէնը, որ նախկին խորհրդային օրերուն Ատրպէյճանի մէջ հայկական էնքլէյվ մըն էր։ Փաշինեան անցեալ տարի յայտարարած էր ,որ Ատրպէյճան ինը նոյեմբերի յայտարարութեան բանաձեւման ընթացքին այս խնդիրը սեղանի վրայ դրած էր, բայց հայկական կողմին պահանջով չեղեալ համարուած էր։

    Ամենայնդէպս, ամէնէն նշանակալից յայտարարութիւնը կատարուեցաւ Արցախի վերջնական կարգավիճակին մասին։ Փաշինեանի համաձայն, ինչպէս այսօր, անցեալին եւս միջազգային ընտանիքը Լեռնային Ղարաբաղը ընկալած է իբրեւ Ատրպէյճանի մասը, մինչդեռ  Մատրիտեան սկզբունքներուն հիմամբ, միջազգային ընտանիքը կը յայտարէր, որ Արցախի կարգավիճակը պէտք է որոշուի պարտադիր իրաւական ուժ ունեցող հանրաքուէի միջոցով։ Ըստ հայաստանեան ընդդիմութեան, Փաշինեան ուղղակիօրէն չըսաւ, որ մենք Արցախը Ատրպէյճանի մաս կը ճանչնանք, այլ քողարկելով՝ ջանաց Մատրիտեան սկզբունքները աղաւաղել։

     Փաշինեանի այս յայտարարութեան հակադարձեց նաեւ Արցախի Ապահովութեան Խորհուրդը, որ Արցախի Ազգային Ժողովին բոլոր ուժերուն ներկայացուցիչներուն մասնակցութեամբ կայացած իր ժողովէն ետք Երեւանի իշխանութիւնները յորդորեց առաջնորդուելու բացառապէս Արցախի ժողովուրդին ինքնորոշման իրաւունքի խնդիրը միջազգային շրջանակներու մէջ հետապնդելու, յառաջ տանելու եւ պաշտպանելու դիրքորոշմամբ՝ օգտագործելով միջազգային ճանաչում ունեցող՝ Հայաստանի հանրապետութեան բոլոր հնարաւորութիւնները եւ կարելիութիւնները։

    Մինչ հայկական ճակատին վրայ այս դիրքորոշումները կ՛արձանագրուէին, անդին Ալիեւ կը յոխորտար, թէ այն հայը, որ չ՛ուզեր Ատրպէյճանի կազմին մէջ ապրիլ, ապա Լաչինի (Բերձոր) անցքը բաց է։ Կրնայ հեռանալ։Ահա իսկական վտանգին ամբողջ տարողութիւնն էր, որ կը բացայայտուէր։ Արցախի հայաթափման հոլովոյթին առնչուած Ատրպէյճանի նախագահին իսկապէս անկեղծ դիրքորոշում մը, որ հայկական ճակատը դէմ յանդիման կը դնէ Միանալու եւ Մէկ ու Միացեալ Ճակատով դիմակալելու Ատրպէյճանի իշխանութիւններուն հայաթափման քաղաքականութիւնը։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles