Արցախի Հանրապետութեան Նախագահին Դէմ Ուղղուած Յայտարարութիւնը Սպառնալիքի Եւ Հայատեացութեան Հերթական Դրսեւորումն Է

0 0
Read Time:1 Minute, 30 Second

Ատրպէյճանի ընդհանուր դատախազութեան կողմէ Արցախի Հանրապետութեան նախագահ Արայիկ Յարութիւնեանը ձերբակալելու սպառնալիքի լոյսին տակ, Հ.Յ.Դ. Արցախի կառոյցը, Արցախի Ժողովրդավարական կուսակցութիւնը եւ Արդարութիւն կուսակցութիւնը հրապարակեցին հետեւեալ միացեալ յայտարարութիւնը.

«Արցախի Հանրապետութեան նախագահի դէմ ուղղուած Ատրպէյճանի դատախազութեան` վերջերս արուած յայտարարութիւնը ոչ այլ ինչ է, քան Արցախի ժողովրդի ու նրա պետականութեան դէմ Ատրպէյճանի ռազմաքաղաքական ղեկավարութեան կողմից սպառնալիքի եւ հայատեացութեան հերթական դրսեւորում:

Չնայած ներքին քաղաքական կեանքում Արցախի Հանրապետութեան նախագահի հետ ունեցած մեր տարաձայնութիւններին` առաջնորդուելով բացառապէս հանրային ու պետական շահերով` չենք կարող անտարբեր մնալ Արցախի Հանրապետութեան պետականութեան հաստատութիւններից որեւէ մէկի նկատմամբ բացայայտ ոտնձգութեան հանդէպ:

1990-ական թուականներից մեր ժողովրդի դէմ յարձակումներ սանձազերծած եւ այդ ընթացքում բազմաթիւ ռազմական յանցագործութիւններով յայտնի դարձած Ատրպէյճանի իշխանութիւնները փորձում են քողարկել իրենց մեղքերը: 2020 թուականի աշնանը պարտադրուած նոր պատերազմի ու դրա արդիւնքում ունեցած ծանր կորուստների խորապատկերի վրայ Արցախի Հանրապետութեան նախագահի հանդէպ քրէական հետապնդման գործընթաց սկսելու յաւակնութիւնների մասին յայտարարութիւնը շնական մարտահրաւէր է բոլոր այն կառոյցներին ու երկրներին, որոնց ջանքերով կանխուել է նոր ցեղասպանութիւն իրականացնելու Ատրպէյճանա-թուրքական ծրագիրը:

Ստեղծուած պայմաններում յորդորում ենք հայութեան բոլոր հատուածներին ու ազգային կառոյցներին հակարշաւ նախաձեռնել եւ Ատրպէյճանի ձեռնարկած հերթական հակաարցախեան ահաբեկչական նկրտումների մասին իրազեկել բոլոր պատկան մարմիններին ու քաղաքական շրջանակներին: Կասկած չկայ, որ այդ քայլով Ատրպէյճանական կողմը նպատակ է դրել արժեզրկել տարածաշրջանում կայունութիւն հաստատելու կոչուած խաղաղարար ուժերի ջանքերը եւ նոր խոչընդոտներ ստեղծել ղարաբաղեան հակամարտութիւնը խաղաղ ճանապարհով կարգաւորելու իրաւագիր ունեցող Մինսքի խմբի համար:

Արցախի Հանրապետութեան իրաւապահ մարմիններից պահանջում ենք գործընթաց սկսել Ատրպէյճանի ռազմաքաղաքական ղեկավարութեան դէմ` որպէս պատերազմի իրական յանցագործների` միջազգային արդարադատութեան առջեւ կանգնեցնելու համար:

Կոչ ենք անում «խաղաղութեան դարաշրջանով» ոգեւորուած ուժերին սթափուել եւ կեդրոնանալ տարածաշրջանային անվտանգութիւնը սեփական ուժերով կազմակերպելու վրայ:

Արցախի դէմ տարուող բոլոր ծրագրերը հայոց պետականութեան ամրութիւնը սասանելու միտում ունեն: Վստահ ենք, որ Արցախի ժողովուրդը հաւատարիմ կը մնայ անցած տասնամեակների որդեգրած սկզբունքներին եւ արժանապատուօրէն կը հակազդի հակառակորդի կողմից նախաձեռնած սադրանքներին ու ահաբեկչական գործողութիւններին»:

Հ.Յ. ԴԱՇՆԱԿՑՈՒԹԵԱՆ ԱՐՑԱԽԻ ԿԱՌՈՅՑ
ԱՐՑԱԽԻ ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹԻՒՆ
ԱՐԴԱՐՈՒԹԻՒՆ ԿՈՒՍԱԿՑՈՒԹԻՒՆ

Ստեփանակերտ
16 փետրուար 2022

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles