0
0
ՍՏԵՓԱՆԱԿԵՐՏ․- Արցախի խորհրդարանի խմբակցութիւնները՝ «Ազատ Հայրենիք- ՔՄԴ»-ը, «Միասնական Հայրենիք»-ը, «Արդարութիւն»-ը, «Հայ Յեղափոխական Դաշնակցութիւն»-ը, «Արցախի ժողովրդավարական կուսակցութիւն»-ը, Մարտ 13-ին յայտարարութիւն մը լոյս ընծայելով տեղեկացուցին, թէ իրենք անընդունելի կը նկատեն Պաքուի հետ ուղիղ բանակցութիւնները այս իրավիճակին մէջ: Ստորեւ յայտարարութիւնը․-
Մի քանի օրից կը լրանայ Արցախի Հանրապետութեան 120 հազար բնակչութեանը Ատրպէյճանի կողմից շրջափակելու 100 օրը: Արհամարհելով Արցախի ապաշրջափակման վերաբերեալ Լա Հէյի միջազգային դատարանի որոշումը` Ատրպէյճանի ղեկավարութիւնն ուժի սպառնալիքով եւ կիրառմամբ շարունակում է Արցախը հայաթափելու քաղաքական ուղեգիծը:
Արցախի Հանրապետութիւնն իրեն բռնակցելու մտադրութեան մէջ Ատրպէյճանը չի խորշում հակամարդկային միջոցներից եւ ահաբեկչական գործողութիւններից: Բնական կազի եւ ելեկտրականութեան մատակարարման խափանումները, խաղաղ բնակչութեան ահաբեկումն ու ազատ տեղաշարժի սահմանափակումները, իսկ վերջերս էլ` Մարտ 5-ին, իրենց ծառայողական պարտականութիւնները կատարելու ժամանակ ոստիկաններին գնդակահարելու փաստը գալիս են ապացուցելու, որ նման պայմաններում անընդունելի են ուղիղ երկխօսութեան մասին խօսակցութիւնները:
Միեւնոյն ժամանակ, համոզուած ենք, որ ղարաբաղեան հակամարտութիւնը, որպէս միջազգային օրակարգի հարց, պէտք է լուծուի բանակցութիւնների միջոցով համապատասխան միջազգային կառոյցների միջնորդութեամբ ու երաշխիքներով, մասնաւորապէս, այդպիսի լիազօրութեամբ օժտուած Մինսքի խմբի համանախագահ երկրների ներգրաւմամբ:
Ատրպէյճանի ռազմաքաղաքական ղեկավարութիւնը քարոզչական տարբեր հնարքներով ապատեղեկացնում է սեփական հանրութեանն ու միջազգային կառոյցներին` նպատակ ունենալով Արցախի ժողովրդի դէմ կիրառուող ճնշումների եւ ահաբեկումների պայմաններում պատրանք ստեղծել «խաղաղութեան դարաշրջան»-ի մասին:
Արցախի Հանրապետութեան Ազգային ժողովի խմբակցութիւնները, արտայայտելով ժողովրդի կամքն ու դիրքորոշումը, պահանջում են Հայաստանի Հանրապետութեան իշխանութիւններից հաւատարիմ մնալ Հ․Հ․ Գերագոյն խորհրդի Յուլիս 8, 1992-ի որոշմանը եւ կասկածի տակ չդնել Արցախի ժողովրդի ինքնորոշման իրաւունքը:
Արցախի խորհրդարանի բոլոր խմբակցութիւնները վերահաստատում են իրենց հաւատարմութիւնը մեր ժողովրդի կամքն արտայայտող հիմնարար փաստաթղթերին եւ շարունակելու են առաջնորդուել դրանցից բխող գաղափարներով եւ սկզբունքներով:
«Ազատ Հայրենիք- ՔՄԴ»
«Միասնական Հայրենիք»
«Արդարութիւն»
«Հայ Յեղափոխական Դաշնակցութիւն»
«Արցախի ժողովրդավարական կուսակցութիւն»
13 Մարտ 2023
Ստեփանակերտ
