Արցախեան Կամքով Եւ Ինքնավստահութեամբ

1

ՀԱՅՐԵՆԻՔ
Մայիս 5, 2015
Խմբագրական

Զանազան մութ հաշիւներու եւ տարածաշրջանէն ներս աշխարհաքաղաքական ճնշումներու արդիւնք, Արցախի խորհրդարանական վեցերորդ ընտրութիւնները անընդունելի եւ նոյնիսկ ապօրինի նկատուեցան կարգ մը դէտերու կողմէ:
Շատեր մատնանշեցին թէ պիտի չընդունին այս ընտրութիւններուն արդիւնքները: Այս գծով, ատրպէյճանական եւ բնականաբար թրքական աղբիւրներու մասին խօսիլը անտեղի է, փոխարէն ԵԱՀԿ-ի Մինսքի խմբակի համանախագահներն ու անոնց մաս կազմող մեծ պետութիւններն ու Եւրոպական Միութեան կատարած մերժողական եւ ժխտական յայտարարութիւններն են, որոնց մասին կարելի է արտայայտուիլ, քննարկել եւ եզրակացութիւններու յանգիլ:
Սակայն մէկ բան յստակ է թէ Արցախի ժողովուրդը ինքն է որ գործունեայ դեր խաղաց եւ իր ապագան յստակացուց: …Յանկերգ մը, որ շարունակ նշուած է Մինսքի խմբակի համանախագահներուն կողմէ:
Այո՛…«Արցախի ժողովուրդը ինք պէտք է դեր խաղայ իր ապագան յստակացնելու հարցին մէջ» եւ այդ մէկը կատարուեցաւ Սեպտեմբեր 2,1991-ին երբ Արցախի ժողովուրդը պաշտօնապէս ազդանշանը տուաւ իր ապագային, անկախութիւն յայտարարելով: …Անկախութիւն մը, որ բնականաբար դիւրին չեղաւ եւ կերտուեցաւ քանի մը տարի բուռն պայքարներ մղելով, արիւն թափելով եւ ճակատամարտներ յաղթանակելով:
Դիտորդներուն համար, ե՛ւ յիշատակելին ե՛ւ զարմանալին այն էր թէ ընտրութիւնները կատարուած էին ազատ, արդար ու թափանցիկ մթնոլորտի մէջ եւ աւելի՛ն, մասնակցութեան համեմատութիւնը եղած է 71 առ հարիւր:
Ո՛չ մէկ դէպք, ո՛չ մէկ միջադէպ կամ զեղծարարութիւն:
Աննախատեսելի երեւոյթ էր պատահածը: Ընտրական անխախտ եւ թափանցիկ
գործընթացը կը համապատասխանէր եւրոպական չափանիշներուն:
Այս երեւոյթը կարելի է նկարագրել, նշելով Եւրոխորհրդարանի պատգամաւոր Ֆրանք էնկելի մէկ հաստատումը, կամ աւելի ճիշտ սրամտութիւնը՝ «Պլէք Հիւմըր»ը թէ այս ընտրութիւնները երբեք կարելի չէ բաղդատել 2013-ին շրջանէն ներս երկրի մը մէջ, որուն անունը Ատրպէյճան է, նախագահական ընտրութիւններ կատարուած էին եւ նախքան քուէատուփերու բացումը…արդէն իսկ յայտնի էր, թէ ո՞վ էր յաղթականը:
Եզրակացութեան համար, տեղին է անգամ մը եւս հաստատել Հ.Յ.Դ. Արցախի Կեդրոնական կոմիտէի ներկայացուցիչ եւ մեծամասնական ընտրակարգով Ազգային Ժողովի անդամ ընտրուած՝ Դաւիթ Իշխանեանի խօսքը թէ.- «Ընտրութիւնները մի միջոց են՝ վերահաստատելու ժողովրդավարական ուղին որդեգրած մեր կամքը: Արցախը ունի բաւականին ուժ եւ քաղաքական կամք՝ ժողովրդավարական ընտրութիւններ անցկացնելու համար»:
Այսպէս, Արցախը անգամ մը եւս ապացուցեց իր ժողովրդավարական բարձր մակարդակն ու պատրաստակամութիւնը:

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles