ԱՐՏԱՌՈՑ ԵՒ ԱՐՏԱԿԱՐԳ…ԱՐՏԱԳԱՂԹ

0 0
Read Time:1 Minute, 39 Second

Armenian sesional emigrantion  ՀԱՅՐԵՆԻՔ

Յառաջիկայ օրերուն կամ շաբաթներուն, Հայաստանի Ազգային վիճակագրական ծառայութիւնը լոյս պիտի ընծայէ, այս տարուայ` 2014 թուականի առաջին վեց ամիսներուն երկրէն մեկնողներուն եւ ժամանողներուն հաշուեկշիռը:
Անցեալ տարի, տարուան առաջին վեց ամիսներուն, Հայաստանէն հեռացած էին 123 հազարէն աւելի հայորդիներ:
Այս թիւը աննախադէպ էր Հայաստանի համար, նկատի ունենալով հոսքն ու ծաւալը:
Ժամանակագրական ու թուային տուեալներու ետին նայելով, կարելի է աւելի յստակօրէն պատկերացնել թէ ի՞նչ կը ներկայացնէ արտագաղթի թղթածրարը:
Արդարեւ, իննսունականներու սկիզբներէն մինչեւ 2010, այսինքն գրեթէ քսան տարիներու ընթացքին, Հայաստանէն հեռացածներուն թիւը գերազանցած է մէկ միլիոնը:
Աւելի մանրամասնութիւններու եւ պրպտումներու երթալով, այլ հետաքրքրական վիճակագրական պատկերներ ցոյց կու տան թէ երեք նախագահներու ժամանակ ալ գաղթը շարունակուած է: Միայն 2004-05-ի ժամանակաշրջանին է որ թիւը պակսած է եւ ընդհակառակը, արձանագրուած է ներգաղթ:
Անցեալ կատարեալը պարզապէս իբրեւ պատկեր նկատի ունենալով, վերադառնանք ներկայ օրերուն եւ հարցադրենք…Ո՞ր դասակարգի, տարիքի կամ սեռի կը պատկանին եւ ու՞ր կը մեկնին:
Յաւելեալ պեղումներ եւ մանրամասնութիւններ կատարելով, մեկնողներու հիմնական մասը աշխատունակ կացութեան մէջ է, այսինքն անոնց տարիքը կը տարուբերի երեսունէն յիսունի միջեւ: Դեռ աւելին, տղամարդոց թիւը գրեթէ կրկինն է, քան` փափուկ սրտերուն թիւը:
Գաղթողներու ուղղութիւնը երկու երրորդ մեծամասնութեամբ կը կատարուի դէպի Ռուսաստան, ապա Միացեալ Նահանգներ: Յաջորդ կարգին կու գայ Եւրոպան, որոնց կարգին յատկապէս Ուքրայինան: Այս վերջինին պարագային, վերջին ամիսներու անցուդարձերն ու անապահով կացութիւնը ազդած պիտի ըլլայ որ թիւը մեծ նուազում արձանագրէ: Դեռ աւելին, նկատի ունենալով վերջին ամիսներու Սուրիոյ թէժ կացութիւնը, բաւական շօշափելի թիւ մը ցայսօր որոշ ժամանակաշրջանի համար բնակութիւն հաստատած է Հայաստանի մէջ: Այս բոլորը կրնա՞յ նուազեցնել այդ դէպի դուրս հոսքը: Այս մէկն ալ հարցական է, մանաւանդ որ անոնց մէկ մասը կրնայ վերադառնալ երբ վերստին հանդարտութիւն տիրէ, կամ ալ չընտելանալով իր ներկայ իրավիճակին, իր կարգին դիմէ այլընտրանքին՝ արտագաղթին:
Գաղթող ժողովուրդ ենք եւ այս գծով պատմական վերլուծումներ եւ իրողութիւններ ներկայացնելով, կարելի չէ պանդխտութիւնը նկատել հայկական իւրայատուկ “հիւանդութիւն“: Եւ այդ հիւանդութեան արդիւնք՝ համաճարակն այն է թէ, արտագաղթի հոսքին մղում տուող երեւոյթներէն կարեւորագոյնը, նախապէս արտասահման գաղթած եւ հոն ալ արմատ նետած հայորդիներն են:
Հայոց Ցեղասպանութեան 100-ամեակի սեմին, կամայ թէ ակամայ ականատես կ՛ըլլանք այլ աղէտի մը, որն է …ԱՐՏԱԳԱՂԹ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles