ԱՐԵՒԵԼԵԱՆ Ա․Մ․Ն․-Ի ԱՌԱՋՆՈՐԴ ԱՆՈՒՇԱՒԱՆ ԱՐՔ․ ԴԱՆԻԷԼԵԱՆ ՈՒԱԹԸՐԹԱՈՒՆԻ ՄԷՋ

0 0
Read Time:2 Minute, 4 Second


ՊՈՍԹԸՆ․- Շաբաթ, Մայիս 21-ին, Ա․Մ․Ն․ Արեւելեան Թեմի բարեջան Առաջնորդ՝ Գերշ. Անուշաւան Արքեպիսկոպոս Դանիէլեան ժամանեց Ուաթըրթաուն եւ իր մասնակցութիւնը բերաւ ձեռնարկներու։ Առաջին հերթին, Առաջնորդ Սրբազանը ներկայ եղաւ, տեղւոյն Սուրբ Ստեփանոս եկեղեցւոյ (Ուաթըրթաուն, Մասաչուսէց) հովիւի եւ հոգաբարձութեան կողմէ կազմակերպուած հեծելարշաւի ձեռնարկին «Չարլզ Ռիվըր Փարք»-ի տարածքին։
Քսանհինգ պատանիներ ու երիտասարդներ, հակառակ շոգին (98 ֆարընհայթ ջերմաաստիճան), բարեկամական մթնոլորտի մէջ շուրջ տասնեւհինգ մղոն մարզական հաճելի փորձառութիւն մը ունեցան։
Յանձնախումբը, դիմաւորելէ ետք մասնակիցները, իւրաքանչիւրին յանձնեց ջուրի եւ սննդանիւթի պաշար։

Հ․Յ․Դ․ Արեւելեան Ա․Մ․Ն․-ի Կեդրոնական Կոմիտէի անդամներ՝ Ճորճ Աղճայեանի եւ Փօլ Հարոյեանի հետ

Ապա, Սրբազան Առաջնորդը այցելեց «Հայրենիք» եւ տեսակցեցաւ Հ․Յ․Դ․ Արեւելեան Ա․Մ․Ն․-ին հետ։ Այս հանդիպման ընթացքին արծարծուեցան գաղութին հետ կապ ունեցող հարցեր։ Նաեւ Առաջնորդը այցելեց «Հայրենիք» – մետիայի նոր կեդրոնն ու Հ․Յ․Դ․-ի արխիւները։
Նոյն երեկոյ, Սուրբ Ստեփանոս եկեղեցւոյ մէջ տեղի ունեցաւ Կիրակնօրեայ վարժարանի շրջանաւարտից հանդիսութիւնը։ Տնօրէնուհի տիկ. Նայիրի Պալճեան-Պէլ իւրաքանչիւր շրջանաւարտի ամփոփ կենսագրականի կողքին անոնց առանձնայատկութիւնները նշեց։ Այնուհետեւ, անոնք ստացան իրենց վկայականները եւ տնօրէնութեան կողմէ պատրաստուած յատուկ նուէրներ։ Հանդէսէն ետք տեղի ունեցաւ Կիրակնամուտի ժամերգութիւն։ Աւարտին, Առաջնորդ Սրբազան Հայրը դպիր ձեռնադրեց Տանիէլ Ալեքսանտրը, Աւետիս Պէլը, Յակոբ Քէչէճեանը եւ Արամ Ստեփանեանը, իսկ Կիսասարկաւագ ձեռնադրեց Դաւիթ Թորամանեանը։ Սրբազան Հայրը գնահատեց ձեռնադրեալներուն ծառայելու կամեցողութիւնը եւ քաջալերեց որ նոյն ոգիով շարունակեն իրենց հոգեւոր աճը։
Կիրակի, Մայիս 22-ին, Անուշաւան Արքեպիսկոպոս պատարագեց եւ յընթացս Սուրբ Պատարագին Սարկաւագ ձեռնադրեց Յովհաննէս Կիսասարկաւագ Տաղլեանը, որդին՝ հոգելոյս Տ. Արշակ Ա. Քհն. Տաղլեանին։ Քարոզին մէջ, Սրբազան Հայրը շեշտեց հիմնական այն կէտը, որ սարկաւագութիւնը՝ եկեղեցւոյ նուիրապետութեան առաջին աստիճանը ծառայութեան, կը ցոլացնէ Տիրոջ Յիսուս Քրիստոսի առաքելութիւնը։
Դպրաց, Կիսասարկաւագի եւ Սարկաւագի ձեռնադրութիւններուն խարտաւիլակութեան պաշտօնը կատարեց եկեցեղւոյ Հովիւ՝ Արժպ. Տ. Անդրանիկ Ա. Քհն. Պալճեանը։
Պատարագէն ետք, Հովիւ Հոգաբարձութիւն եւ Տիկնանց Միութիւն ի պատիւ Յովհաննէս Սարկաւագին կազմակերպած էին արժանավայել ընդունելութիւն։ Սրբազան Հայրը, անգամ մը եւս դրուատելով ընծայեալին արժանիքները, յայտնեց, թէ Տաղլեան ընտանիքը Լիբանան իրենց կեցութենէն մինչեւ օրս եղած է օրինակելի եկեղեցասէր եւ ազգանուէր ընտանիք մը, ուրախութեամբ իրենց ծառայական նպաստը բերելով գաղութին, Առաջնորդարանին եւ Կաթողիկոսարանին։ Ապա, ամփոփ կերպով ներկայացուց Առաջնորդարանի նոր ծրագիրները՝ զօրացնելու համար գաղութային կեանքը։
Հոգեպարար արարողութենէն եւ ձեռնարկէն ետք, Առաջնորդ Սրբազան Հայրը Հովիւին եւ Սուրբ Ստեփանոս եկեղեցւոյ ազգային վարժարանի տնօրէնուհի՝ տիկ. Հուրի Պոյամեանի հետ ուղղուեցաւ վարժարան։ Երկու տարուան ընդհատումէ ետք այս տարի շարունակելով գեղեցիկ աւանդութիւն մը, վեց աշակերտներ պիտի մեկնէին Հայաստան։ Սրբազան Հայրը անակնկալ գրաւորի ձեւով աշակերտներուն հարց տուաւ, թէ ի՞նչ կը ներկայացնեն այն վայրերը ուր պիտի այցելէին, այսպէս ՝ Խոր Վիրապ, Սուրբ Էջմիածին, Օշական, Մատենադարան, Սարդարապատ, Ծիծեռնակաբերդ, եւայլն եւ գոհացուցիչ պատասխան ստանալով, գնահատեց անոնց ուսումնական պաշարը։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles