Արդէն Տարի մը անցած է… ՍԻՐԵԼԻ ԱՐԱՅԻ ՅԻՇԱՏԱԿԻՆ

0 0
Read Time:3 Minute, 3 Second
Արա Գաբրիէլեան եւ …Արարատը՝ դիտուած Արեւմտահայաստանէն
Արա Գաբրիէլեան եւ …Արարատը՝ դիտուած Պայազիտէն

ՅԱԿՈԲ ՎԱՐԴԻՎԱՌԵԱՆ

Նիւ Ճըրզի

Բոլոր ծանօթ մտաւորականները մէկ մէկ հեռացան մեզմէ միանալու իրենց տարէց մտաւորական գաղափարի ընկերներուն, սկսելով՝ Արամ Հայկազէն: Այդ համբուրելի տղաքն էին Ժիրայր Ադդարեան, Յակոբ Կարապենց, Ռուբէն Պարսումեան, Արիս Սեւակ ու վերջինը այս խումբէն՝ Արա Գաբրիէլեան: Նիւ Եորքի Համազգային Հայ Կրթական ու Մշակութային Միութեան շուրջ անոնք վառ պահեցին հայ մշակոյթի ճրագը եւ այս ցուրտ ափերուն տարածեցին հայերէն լեզուն եւ մեր գրականութիւնը:
Թէքէեան Մշակութային Միութեան համար ալ ճակատագիրը եղաւ նոյնը երբ մեր տղաքը՝ Սուրէն Մանուէլեան, Յակոբ Ասատուրեան, Անդրանիկ Փոլատեան, Միրճան Գիրեան … հեռացան մեզմէ միանալու Բենիամին Նուրիկեանին:
Այս երկու տարբեր գաղափարական դպրոցներէն եկած մեր մտաւորականները մէկ կողմ ձգելով իրենց քաղաքական վարդապետութիւններն ու համոզումները գործակցեցան սրտբաց ու սերտօրէն: Պատի՛ւ անոնց իւրաքանչիւրին եւ թող անոնց յիշատակը մնայուն կերպով արձանագրուած մնայ, այլապէս հարուստ, Նիւ Եորքահայ տարեգրութեան էջերուն մէջ:
Արան այդ խումբին մաս կը կազմէր, ան իրա՛ւ հայրենասէրն էր, ոչ անպայմանօրէն անոր համար որ ամուսնացած էր Արեւիկին հետ (Խորհրդային Հայաստանի աղուոր օրերու մեր մտաւորական աղջկան հետ), այլ՝ համոզուած էր որ մեր ազգային իտէալներուն, մեր բոլոր ապագայ երազներուն ու ծրագիրներուն հիմնական հողը այդ 30 հազար քիլոմեթր տարածքին վրայ պէտք ենք հիմնել: Սիրել Հայաստանը եւ սիրցնել Հայաստանը:
Անոր համար ալ մեր մօտ չորս տասնամեակներու վրայ երկարող բարեկամութիւնը կ՚ամրագրուէր հայրենիքի յաւերժականութեամբ մեր ունեցած հասարակաց հաւատքով: Ինք արդէն ծանօթ ղեկավարներէն էր ՀՅԴի երբ ես նոր ոտք կը կոխէի Նիւ Եորք: Այդպէս ալ սկսաւ մեր հոգեմտաւոր բարեկամութիւնը եւ սրտակցութիւնը Արայի հետ:
Թէքէեանը բախտաւոր էր եղած խորհրդահայ օրերուն ունենալու առանձնաշնորհումը հայրենիք-սփիւռք կապերուն: Այդպէս ալ, հայրենիքէն ամէն այցելուի համար մեր դռները կը բանայինք ու կը կազմակերպէինք հանդէսներ ու դասախօսութիւններ: Մեծ անուններ՝ Սիլվան, Սերօն, Ֆրունզիկը, Վարդգէս Պետրոսեանը, Շաքէ Վարսեանը եւ բազում սիրելի անուններ: Արան մի՛շտ ներկայ էր եւ մեծապէս կը գնահատէր մեր այդ աշխատանքը: Հանդիսութիւններէ ետք երբ կ՚առանձնանայինք հիւրերու հետ Արան ու Արեւիկը անպակաս կ՚ըլլային այդ մտերմիկ հաւաքոյթներէն: Յաճախ առիթ եղած է հիւրասիրել անոնցմէ շատեր նաեւ իմ տան մէջ եւ պարզուած է որ որքա՜ն հասարակաց մտահոգութիւններ կը պարուրէին մեր երկու մշակութային խումբերը:
Արան յաճախ կ՚այցելէր Հայաստան եւ արդէն մօտիկէն բարեկամն էր խորհրդահայ մեր լուրջ մտաւոարականներէն շատերուն: Ան յամառ կարդացող մը ու հետեւող մը ըլլալով գիտէր այդ գրողներուն գալած ճամբան եւ հայրենասիրական ոգին:
Առիթներ ունեցած ենք խօսելու մեր աւանդական զոյգ քաղաքական կազմակերպութիւններու՝ Հ.Յ.Դ. եւ Ռ.Ա.Կ. բլաթֆորմներու, մօտակայ թէ հեռակայ ծրագիրներուն մասին: Թէեւ երբեմն վիճաբանած ու անհամաձայն գտնուած ենք, սակայն հանգած ենք այն տեսակէտին թէ տակաւին մեր քաղաքական կազմակերպութիւնները ունին մեծ դեր կատարելիք որքա՛ն սրբազան Հայ Դատին, նոյնքան՝ ազգապահպանման գործին համար:
Քուինզի Հայ Կեդրոն այցելութեան մը առթիւ, երբ Համազգայինը կը վերակարգաւորէր իր գրադարանը, Արան զիս հրաւիրեց ներս ու ըսաւ. «Յակոբ այս 5-6 տուբերուն մէջ երկրորդ օրինակները կան Դաշնակցական գրականութենէն. տեսած եմ որ ունիս հարուստ գրադարան մը, մանաւանդ՝ պատմաբանասիրական գիրքերով, ազատ զգայ կրնաս բոլորը ունենալ, կամ այն ինչ որ քեզ կը հետաքրքրէ»: Իրապէս ալ գրադարանս հարստացած եղաւ այդ գիրքերով … այնքա՛ն մը որ կը խորհիմ թէ դարձայ այն ռամկավարը որ ունեցաւ հարուստ կուսակցական գրականութիւն: Շնորհակալութեամբ վերցուցի զանոնք:
Այդ կ՚ըլլար Արային իր նուէրը ինծի: Գիտէր որ կը պատրաստէի Ռ.Ա.Կ.-ի Համապարփակ Պատմութեան շարքը՝ եօթ հատորներով: Ու վստահաբար այդ պիտի ծառայէր որպէս սկզբնաղբիւր:
Յաճախ Թէքէեանն ու Համազգայինը Նիւ Եորքի մէջ գործակցած են սերտօրէն: Առանց որեւէ վերապահութեան, մի՛շտ ալ համաձայն գտնուած ենք: Տարօրինակ, եթէ ազգային քաղաքական բեմին վրայ երբեմն զիրար վիրաւորած ենք, անպատուած ենք, սակայն մշակոյթի կեանքէն ներս զիրար ամբողջացուցած ենք եւ մնայուն յարգանք պարտադրած ենք մեր գաղութներէն ներս: Դարձած ենք օրինակ համերաշխութեան եւ գործակցութեան:
Արան ասո՛ր հաւատացող իրա՛ւ ընկեր մը եղաւ, որուն յիշատակը պիտի մնայ թարմ:
Ու այսօր այդ տղաներէն մնացինք՝ Դոկտ. Հրանդ Մարգարեանն ու ես: Կը շարունակենք պահել այդ աղուոր աւանդութիւնները դառնալով կամուրջ մեր զոյգ մշակութային միութիւններու միջեւ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles